《押韻啟應詩篇》

 | | | 轉寄

台語押韻啟應詩篇 5

作者 Tīⁿ Jî-gio̍k 2006.01.29

Tāi-pi̍t ê si, kau hō͘ Ga̍k-koaⁿ; ēng pûn ê ga̍k-khì.

1a　Iâ-hô-hoa ah, kiû Lí àⁿ hī-khang thiaⁿ góa ê ōe .
　　耶 和 華 啊，求 您 俯 耳 孔 聽 我 的 話。
1b　　　Kàm-chhat góa ê sim-su kúi-nā-kòe.
　　　　鑑 察 我 的 心 思 幾 若 過。

2a　Góa ê Ông, góa ê Siōng-tè ah ,
　　我 的 王， 我 的 上 帝 啊，
2b　　　Kiû Lí àⁿ-lo̍h thiaⁿ góa kiû-kiò ê siaⁿ,
　　　　求 您 俯 落 聽 我 求 叫 的 聲，
　　　　in-ūi góa ǹg Lí teh kî-tó lah ?
　　　　因 為 我 向 您 在 祈 禱 啦？

3a　Iâ-hô-hoa ah, chá-khí-sî Lí ōe thiaⁿ góa ê siaⁿ lâi chí-sī .
　　耶 和 華 啊，早 起 時 您 會 聽 我 的 聲 來 指 示。
3b　　　Chá-khí-sî góa beh gióng-bōng Lí, sòa tùi Lí pâi-lia̍t góa ê sim-ì.
　　　　早 起 時 我 要 仰 望 您，續 對 您 排 列 我 的 心 意。

4a　In-ūi Lí m̄-sī hoaⁿ-hí chōe-ok ê Siōng-tè ;
　　因 為 您 不 是 歡 喜 罪 惡 的 上 帝；
4b　　　Pháiⁿ--ê bōe-tit-thang kap Lí khiā-khí tâng-chê.
　　　　歹 的 未 得 通 與 您 居 起 同 齊。

5a　Kiau-ngō͘ ê lâng bōe-ōe khiā tī Lí ê bīn-chêng tit -un.
　　驕 傲 的 人 未 會 站 在 您 的 面 前 得 恩。
5b　　　Chòe-pháiⁿ ê lâng lóng sī Lí só͘ oàn-hūn.
　　　　做 歹 的 人 攏 是 您 所 怨 恨。

6a　Kóng pe̍h-chha̍t--ê , Lí beh bia̍t in ;
　　講 白 賊 的，您 要 滅 伊；
6b　　　Ài thâi lâng kap kan-kúi--ê , Iâ-hô-hoa lóng thó-iàm in .
　　　　愛 殺 人 及 奸 詭 的，耶 和 華 攏 討 厭 伊。

7a　Lūn-kàu góa, góa beh pîn Lí hong-sēng ê chû-ài ;
　　論 到 我， 我 要 憑 您 豐 盛 的 慈 愛；
7b　　　Ji̍p Lí ê chhù kúi-nā pái.
　　　　入 您 的 厝 幾 若 次。

7c　Góa beh chûn kèng-ùi Lí ê sim lâi ho̍k-sāi,
　　我 要 存 敬 畏 您 的 心 來 服 事，
7d　　　您 Lí ê sèng-tiān lâi kèng-pài.
向 您 的 聖 殿 來 敬 拜。

8a　Iâ-hô-hoa ah, kiû Lí tī góa ê tùi-te̍k ê bīn-chêng,
　　耶 和 華 啊，求 您 在 我 的 對 敵 的 面 前，
8b　　　Pîn Lí ê kong-gī chhōa góa chòe kiàn-chèng,
　　　　憑 您 的 公 義 導 我 做 見 證 ，
　　　　hō͘ góa kiâⁿ tī chèng-ti̍t ê lō͘ tī Lí ê thâu-chêng.
　　　　使 我 行 在 正 直 的路 在 您 的 頭 前 。

9a　In -ūi in ê chhùi bô láu-si̍t ū ún-môa,
　　因 為 伊 的 嘴 無 老 實 有 隱 瞞，
9b　　　In ê sim ok-to̍k móa-móa;
　　　　伊 的 心 惡 毒 滿 滿；

9c　In ê nâ -âu sī khui-khui ê bōng-khang,
　　伊 的 咽 喉 是 開 開 的 墓 孔，
9d　　　In ēng chi̍h thiám-mī lâng.
　　　　伊 用 舌 諂 媚 人。

10a　Siōng-tè ah , kiû Lí tēng in ê chōe;
　　上 帝 啊， 求 您 定 伊 的 罪；
10b　　　Hō͘ in tùi ka-kī ê kè-bô͘ poa̍h-tó lâi sit-chì.
　　　　使 伊 對 自 己 的 計 謀 跌 倒 來 失 志。

10c　In ê chōe-kòa chin-chōe,
　　伊 的 罪 過 真 多，
10d　　　Goān Lí chiong in kóaⁿ--chhut--khì, in-ūi in pōe-poān Lí .
　　　　願 您 將 伊 趕 出 去，因 為 伊 背 叛 您。

11a　Kìⁿ-nā ū lâng óa-khò Lí ,
　　見 若 有 人 倚 靠 您，
11b　　　Goān in hoaⁿ-hí ;
　　　　願 伊 歡 喜；

11c　Goān in éng-éng hoaⁿ-hí chhut-siaⁿ;
　　願 伊 永 永 歡 喜 出 聲；
11d　　　In-ūi Lí pì- iū in ê sìⁿ-miā.
　　　　因 為 您 庇 祐 伊 的 性 命。

11e　Koh goān hiah-ê thiàⁿ-sioh Lí ê miâ ê lâng,
　　又 願 那 些 愛 惜 您 的 名 的 人，
11f　　　Lóng tiàm-tī Lí lâi hoaⁿ-hí kui-kang.
　　　　都 站 在 您 來 歡 喜 歸 工。

12a　In-ūi Lí beh sù-hok hō͘ gī-lâng tī mî-ji̍t ta̍k-sî ;
　　因 為 您 要 賜 福 給 義 人 在 暝 日 逐 時；
12b　　　Iâ-hô-hoa ah, Lí beh ēng un-hūi,
　　　　耶 和 華 啊， 您 要 用 恩 惠，
　　　　chhin-chhiūⁿ tîn-pâi, sì -bīn ûi--i .
　　　　親 像 盾 牌，四 面 圍 他。