《押韻啟應詩篇》

 | | | 轉寄

台語押韻啟應詩篇 39

作者 Tīⁿ Jî-gio̍k 2006.10.08

Tāi-pi̍t ê si, kau hō͘ Ga̍k-koaⁿ, Iâ-tō͘-tùn.

1a　Góa bat kóng, góa beh kín-sīn góa ê lō͘ ,
　　我　曾　講 ：　我　要　謹　慎　我　的 路，
1b　　　Bián-tit ēng góa ê chi̍h hoān-chōe kóng chhò-gō͘ .
　　　　免　得　用　我　的 舌　犯　罪　講　錯　誤。


1c　Pháiⁿ-lâng tī góa bīn-chêng ín- iú ,
　　歹　人　在　我　面　前　引　誘，
1d　　　Góa beh iok-sok góa ê chhùi, chhin-chhiūⁿ bé -kā -kiuⁿ.
　　　　我　要　約　束　我　的　嘴 ，　親　像　馬　咬　韁。


2a　Góa chēng-chēng bô siaⁿ, liân hó-ōe ia̍h bô kóng chhut chhùi;
　　我　靜　靜　無　聲，　連　好 話　亦　無　講　出　嘴 ；
2b　　　Góa ê iu-būn chiū giâ-khí-lâi thó͘-khùi.
　　　　我　的 憂 悶　就　舉　起　來　吐　氣。


3a　Góa ê sim teh jia̍t kàu góa ê pak-lāi,
　　我 的 心 在 熱 到 我 的 腹 內，
　　góa chēng-chēng siūⁿ ê sî , hé chiū to̍h--khí--lâi ;
　　我 靜 靜 想 的 時，火 就ｔｏｈ８ 起 來；
3b　　　Góa chiū ēng chi̍h kóng--chhut--lâi .
　　　　我 就 用 舌 講 出 來。


4a　Iâ-hô-hoa ah , kiû lí hō͘ góa chai pún-sin ê kiat-kio̍k,
　　耶 和 華 啊，求　Ｌｉ２使 我 知 本 身 的 結 局，
　　kap góa nî-hè ê siàu-gia̍h jōa-chōe chiū chiok;
　　及 我 年 歲 的 數 額 偌 多 就 足；
4b　　　Hō͘ góa chai kàu cháiⁿ-iūⁿ loán-jio̍k.
　　　　使 我 知 到 怎 樣 軟 弱。


5a　Lí hō͘ góa ê ji̍t-chí chhin-chhiūⁿ chi̍t-pa ê chhiú-chiúⁿ,
　　Ｌｉ２ 使 我 的 日 子 親 像 一 把 的 手 掌，
5b　　　Góa it-seng ê nî-hè, tī Lí ê bīn-chêng chhin-chhiūⁿ bô chi̍t-iūⁿ.
　　　　我 一 生 的 年 歲,在 Ｌｉ２ 的 面 前 親 像 無 一 樣。


5c　Ta̍k-lâng khiā-chāi ê sî ,
　　各 人 站 在 的 時，
5d　　　Chin-chiàⁿ lóng sī khang-hi .
　　　　真 正 都 是 空 虛。


6a　Sè-kan-lâng chòe si̍t-chāi chhin-chhiūⁿ iáⁿ khang-khang,
　　世 間 人 做 實 在 親 像 影 空 空 ，
6b　　　I só͘ chek-chū--ê , m̄-chai chiong-lâi kui tī siáⁿ-lâng.
　　　　他 所 積 聚 的，不 知 將 來 歸 在 甚 人。


7a　Chú ah , góa taⁿ thèng-hāu sím-mi̍h?
　　主 啊， 我 今 等 候 甚 麼 ？
7b　　　Góa ê ǹg-bāng chāi-tī Lí .
　　　　我 的 盼 望 在 於　Ｌｉ２。


8a　Kiû Lí kiù góa thoat-lī góa it-chhè pōe-poān Lí ê chōe-kio̍k,
　　求　Ｌｉ２救 我 脫 離 我 一 切 背 叛 Ｌｉ２的 罪 局，
8b　　　M̄-thang hō͘ góa siū gōng-lâng ê lêng-jio̍k.
　　　　不 通 使 我 受 憨 人 的 凌 辱。


9a　Góa chēng-chēng bô khui-chhùi;
　　我 靜 靜 無 開 嘴 ；
9b　　　In-ūi sī Lí ōe ūi góa kè -ūi .
　　　　因 為 是　ＬＩ２會 為 我 計 劃。


10a　Lí só͘ kàng ê chek-hoa̍t kiû Lí kā góa tû--khì;
　　Ｌｉ２　所 降 的 責 罰 求　Ｌｉ２給 我 除 去；
10b　　　In-ūi Lí ê chhiú ê tok-chek, góa chiū siau-bia̍t--khì .
　　　　因 為 Ｌｉ２的 手 的 督 責， 我 就 消 滅 去。


11a　Lí in-ūi lâng ê chōe-ok, kéng-kài i ê sî ,
　　Ｌｉ２因 為 人 的 罪 惡，警 戒 他 的 時，
11b　　　Hō͘ i só͘ hoaⁿ-hí--ê siau-bia̍t bô--khì.
　　　　使 他 所 歡 喜 的 消 滅 無 去。


12a　Iâ-hô-hoa ah,kiû Lí thiaⁿ góa ê kî-tó, àⁿ hī-khang thiaⁿ góa ê kiû-thó.
　　耶 和 華 啊, 求 Ｌｉ２聽 我 的 祈禱,俯 耳 孔 聽 我 的求 討。
12b　　　Góa lâu ba̍k-sái, kiû Lí m̄-thang liân chhut-siaⁿ iā bô .
　　　　我 流 目 屎， 求　ＬＩ２不 通 連 出 聲 也 無。


12c　In -ūi góa tī Lí ê bīn-chêng sī chhut-gōa-lâng chi̍t-iūⁿ,
　　因 為 我 在Ｌｉ２的 面 前 是 出 外 人 一 樣，
12d　　　Sī kià-kha--ê , chhin-chhiūⁿ góa ê lia̍t-chó͘ chi̍t-poaⁿ-iūⁿ .
　　　　是 寄 腳 的，親 像 我 的 列 祖 一 般 樣。


13a　Kiû Lí khoan-iông góa, hō͘ góa iáu-bē khì kui tī sí-bô ê tāi-seng,
　　求 　Ｌｉ２寬 容 我，使 我 尚 未 去 歸 在 死 無 的 事 先，
13b　　　Thang hō͘ góa ke-kiám an-lo̍k ê jîn-seng.
　　　　通　給　我　加　減　安 樂　的 人　生。