《台語chit條路》

 | | | 轉寄

《台語chit條路》--加學、加聽，做肥底 ─ 洪惟仁訪問(二十三)

作者 楊允言 2008.10.05

言：頂kái看楊麗花ê廣告，天狗熱著是「登革熱」chit-ê尚記會tiâu。

洪：這天狗，日本人叫做thian-kù，thian-kù tō thian-kù，是按怎一定愛寫「登革熱」？chit-ê名ùi台語來ê a！

我對大本字典khah無趣味，我對語言kap文化ê關係khah有趣味，我以前想beh編chiok chē chit款ê字典，結果禮俗字典編了tō無koh再編a，實在是無hiah ni chē精力。

像植物ê部分，日本時代tō出過三、四本，日本時代有一ê中央研究所，我講日本人感心ê所在，tī台灣，政府出錢所做ê研究，全部hām台灣有關係，in留chiok chē好ê物件，無像中央研究院，做ê研究大部分kap台灣無關係，成立一ê台灣史研究所，kā你tēⁿ死死，講歸晡mā iá bōe成立，所以國民黨實在比日本khah差。{註：最近已經通過beh成立台灣史研究所}

言：老師，你《台語文摘》做到chit-má，有啥麼值得檢討ê物件bò͘？

洪：檢討toh一方面？尚重要ê對是檢討銷路ê問題，革新號四期tō了瞌beh死，m̄ chiah會改做專刊，目的著是beh hō͘伊賣khah久ê。 言：khah無時間ê問題。

洪：he本來tō無時間性，你著致hō͘伊有時間性，有ê人tō無愛kā你買a。其實，《台語文摘》一期排出去chiah賣二、三百本娘niâ，訂戶to比這khah chē，攏是靠訂戶teh支持，這siáu-ê to beh做這，kā支持一下，有teh看ê可能mā無gōa chē，這是一ê檢討；另一ê是講，《台語文摘》過去ê方式，會使講全漢字lah，對讀者來講是khah好讀，m̄-koh人beh tòe寫有khah困難，所以咱後期mā會使採用漢羅。

言：我感覺《台文通訊》有一ê尚大ê特色，你mài講印刷品質好iá是m̄好，人會感覺khah óa，khah敢投書iá是投稿。

洪：《台語文摘》著是人khah無法度參與lah，所以伊是kā你當做資料來kā你收，這mā會使講是《台語文摘》ê缺點。

言：老師，你家己認為這是缺點iá是優點？

洪：就運動ê觀點是缺點，但是若準講用漢羅來講，銷路是無一定會增加，因為漢羅，排斥ê人khah chē mà，比全漢字ê排斥性khah厲害。

另外，《台語文摘》編輯ê人才mā少，你逐項攏beh做ê時，根本to無hia ê精力mā無hia ê錢。所以若準講一期一期會凍kap別人合作，按呢khah好，若無別人攏無參與感，你講你做了hiah好，人無愛tòe你mā是無路用，白做ê，按呢to真正替台語做墓牌，無意思a，會凍兼顧是尚好lah，mài siuⁿ過極端，chit-má講beh用全漢字、全羅馬字，無人買a，賣你自敬tō好a，你kā我買一百本我仝款了錢。

iá koh有一點，台灣ê本土語言教育若是實施了後，情形會khah好。

言：chit-má ê學生mā有beh舞母語教育ê問題。

洪：按怎舞？

言：這hō͘會長講khah清楚。

卵：過去一冬，學生攏teh舞刊物{註：《台語學生》}，真正一寡問題出聲ê機會真少。chit-má ê共識著是講，刊物出khah少ê，以前是半年十八期，chit-má beh變兩期，季刊tō著lah，頂遍是各校照輪，chit chūn是編輯逐家討論一下；另外koh有一ê運動部，hō͘學生會凍出一寡聲，譬如講邀請立委辦公聽會…等等，像台大in無想beh編刊物，想beh舞運動；像最近縣市長選舉beh到a，阮beh設計一份問卷，kā候選人問，你對推行母語教育有啥麼看法，到時會使做一ê調查結果，發hō͘報社，當然，一寡物仔家己愛討論kah真清楚。

(討論母語教育kap教育部可能ê態度)