《台語chit條路》

 | | | 轉寄

《台語chit條路》--加學、加聽，做肥底 ─ 洪惟仁訪問(十七)

作者 楊允言 2008.08.24

洪：著a，著變做一種需要，譬如講新加坡hia ê人攏有夠利害，伊一ê人會凍講chiok chē種話ê─chit-má khah無a，攏hō͘華語kòng倒去─一時仔講潮州話，一時仔講廣東話，一時仔講客話，伊攏無問題，歐洲人mā是chiok巧ê，in一ê人會曉德語、會曉法語、會曉義大利語、英語，hò͘，伊哪hiah-nī gâu？其實m̄是，伊需要。 進：假使你講ê chit寡物件攏是正確ê，你beh按怎kā寫做一ê政策，說服別人？你講按呢chiok簡單ê mà，你ê目的著是beh hō͘ chia ê客人接受福佬話。 洪：我是講，各族有各族in使用家治語言ê權利。

進：he是你teh看，但是客人teh看m̄是按呢，你講e5chiok簡單ê，但是假使我是一ê客人，你beh按怎說服我？

洪：所以我講，客人是m̄是beh學福佬話，hō͘ in選擇。 進：到時演講ê時chūn beh按怎？

洪：這伊家治決定a，福佬區mā會使選修客話。

卵：我是認為講，咱koh愛khah尊重客語族，咱福佬人加減學客語，咱若tú著客人，咱kā講，你mài叫我講北京話，我鼓勵你講客語，請你大聲講出來。

言：著愛像滷卵按呢lah，福佬話客話攏會曉講。我chit kái去peh山，tī水尾﹝註：瑞穗﹞hia坐車，車頭邊a kám仔店ê頭家娘，伊是客人，結果伊原住民話頭(Amis)、客話、福佬話、北京話，正經啥麼話攏會曉講。

洪：客人khah gâu。福佬人攏想講，你to會曉講福佬話a，無需要學客話。

進：但是咱愛改變chit-ê時習慣，chit-má人kā咱講，逐家攏會曉講華語，你tō講華語，是仝款ê想法。

洪：我若去tòa苗栗，我著愛學客話a，今仔日問題是出tī客人tòa ê所在無一ê經濟中心，所以福佬人beh生活，根本m̄免去客人ê所在，但是客人beh生存，一定愛離開客語庄chiah下有發展。

進：所以咱若擬政府愛寫一條，鼓勵福佬人學客人ê生活語言。

洪：劉克明﹝註：日本時代ê台語教官﹞有出一本冊，教人客話ne。 言：伊toh位人？

洪：大稻埕，客話mā會曉講，厲害ne。

卵：像新加坡a，李光耀本身是客人，伊客話無發展，伊mā無愛hō͘福佬話發展。

言：he鄭良偉有講，伊提倡華語ê出發點著是beh消滅福佬話。 卵：漢人ê 70﹪是福佬人。

洪：七成是漢人，所以福佬人差不多佔一半。廣東人來講，你若入去廣東，一定愛講廣東話，若無，in to無愛chhap你a，但是若準tī福建，kap福佬人做伙，伊tō講普通話，chit內底有兩ê原因，一ê著是閩語內底無一ê佔大優勢ê腔口，你講廈門是標準ê，he是tòa閩南ê ne，你廈門人走去潮州，潮州話著聽無a。講著潮州話，頂kái我去hia，我kap伊講koh講會通，m̄-koh，in teh講我tō聽無a，in ê音kap人無仝款，這koh小代誌，用詞kap咱無仝款，差介chē，「按呢」in講「chiòⁿ seⁿ」，你講廣東話mā不離複雜，有四、五種，但是伊khah統一，in中間koh小垮khóa聽有；閩語來講，潮州koh小khóa聽有，但是你到閩北、莆仙，根本聽無，平平福佬話，去海南島，海南島mā是福佬話，一句你to聽無，jia̍k nò͘ ta tì gō͘ la̍k sit poih kàu ta̍p﹝註：1到10﹞第二ê原因，閩語內底閩南語佔優勢，閩南語內底廈門話佔優勢，但是廈門ê地位kap廣州bōe比ê，廈門人口三十萬niâ，廣州是九百萬ne，人口ê勢力，經濟ê勢力，koh一ê香港，香港koh khah厲害。