《田岡良食筆尾》

 | | | 轉寄

第三者是koh按怎？

作者 田岡良 2011.06.26

一齣號做『犀利人妻』ê 連續劇，tī 社會上歕風攇柴，對「第三者」ê 怨恨 hām 對敵，像雄火燒 kah 嶄然仔 mé。毋過，凡勢 chit 件代誌 káⁿ tio̍h 顛倒頭來講，chit 齣戲會 chhèng kah 掠袂 tiâu,檢采就是「戲劇」本身有 tòe 著社會 ê 主流思想，真合市場 ê 喙路所致，人講卵生雞、雞放卵--lah。

Chit 號「拍夥計」ê 風氣，在我來看，干焦是一種對「婚姻」ê 偶像崇拜 niā-niā。Chhím 想，男女朋友若無法度做伙，chhé-chhé leh kám 無準拄好？若無法度鬥陣，或者是有 koh 較好 ê 選擇，beh 分開、beh 同齊，是有啥物著抑毋著？結婚，究真就是一個形式而已，kán tio̍h kā 看做一種「特別無仝」ê 感情形態？事實上，就是 chit 款對婚姻 ê 執迷，chit-ê戇社會，才會一直輕視未婚者佮離婚者，kám 講毋是？

人對傳統價值 kiau 主流意見，定定欠缺反省、批判、思考 ê 能力，che 無--打-緊，若 kā 當做是天地理路、萬年久遠 ê 真理，he 就有影譀 kî-koa--ah！

我不時會去想著講，若佗一工一陣人發現「國家」、「民族主義」只不過是 chit 一、兩百冬 ê 新項物，會著驚 kah 落下頦；Sio-siâng ê 道理，若準 hō͘ in 知「婚姻」kap「家庭款式」tī 人類歷史上 ê 演變、無仝文化內底 ê 變款、hām 目今 chit 个樣式 ê 頭來尾去，拍算嘛會有一大陣人目白舌吐、想攏袂 chhun！

欲追殺「夥計」，koh 較輸反省看家己 ê 感情生活（不管有嫁娶、無結婚）hām 本身參 a-ná-tah ê 交流，有出啥物問題抑無，有無張持 hō͘ 別人空縫 thang 軁--無，或者是，根本早就白汫無味、煞煞--leh 較贏--ah。看問題袂曉看本底，干焦直直欲卸責任、卸身離，想起致、想因端攏 ùi 別人 hia 做頭想起，che kám 無 sêng hit 款驚破病驚 kah 欲死 ê 人，拚勢消毒、過 tiû、洗 thōa,愛 thang kā 微菌一盡除減，結果，對 hit 个因為生活習慣 kài 歹款所造成 ê lám 身命，是自頭 kah 尾目睭放瞌？

Tòe 人時行，chit 種 lám 路 sai 仔 ê gè-muh 有時仔 bóng chhit-thô 無要緊，毋過，若點陳頂真、用心計較，he 就有影拍損一粒頭殼、無彩有讀冊--a。