《田岡良食筆尾》

 | | | 轉寄

按怎看待改變

作者 田岡良 2011.06.19

Facebook 頂懸，一位朋友舉越南話 ê 例，來批評一寡學者對台語漢字／本字 hām 語音 ê 稽考，伊主張咱 mài hiah 見古，比論：「姊」ê 越南話講做「chị」，寫做台羅是「chih」，照漢語聲韻學是入聲，無合 tī 漢字聲韻，總--是越南人嘛無 kā 當做誤 tâⁿ,講 beh 正音。Chit-ê朋友就自按呢主張講台語嘛 tio̍h 取現代人 ê 語音做標準，因為語言是 ē tòe 時間演變--ê。

我 kā 應講：毋過，現代人 ê 語音變了真緊，若有影攏照 chit-má 少年人 ê 台語呼音，台語應該參華語仝款是一個chiâu「無入聲」、攏「無濁音」ê 語言，按呢敢好？

現此時真濟少年人，「我／góa」攏講做「óa」，「囡仔／gín-á」攏呼做「ín-á」，濁音韻頭 lóng 落落--去，若入聲--leh,mài 講「h」韻尾 ê 第四、第八調 bē 曉分，連「p, t, k」都嘛倒床，teh beh 去塗州賣鴨卵--a。

問題是，咱按怎看待 chit 號變化，有 beh 據在 in 按呢「變--落-去」--無？

我 ê 朋友講：che 是無 ta-ôa ê 結局，歸尾 chit 款 choa̍h 音嘛是會做主流。

是--lah!終其尾 ē 變主流是一款可能，毋過，自按呢就順風駛船 káⁿ 是另外一回事！按怎號做順風駛船？真簡單，kah 若按算 chiah-ê 呼音 ē 變做主流，按呢，台語教學材料（包括教科書），taⁿ 就 thang 好攏照少年仔 ê 呼音來寫、來標，mài koh 滾 lèng--a!按怎？？？

無量講chit-ê朋友 ê 回答是：che 愛看編寫者是啥人來決定，若是編寫權落 tī 取新 ê 呼音 ê 人 ê 手頭，自然改了了；若是猶原踮「保守派」ê 手頭，教學定著是用「古典」ê 音。

伊按呢講，我部份贊成--lah!無毋著，文學經典 kap 語言標準本來就是 hit-ê時代有權力 ê 人 teh 主張 teh 決定--ê，咱看美國烏人 ê 英語真時行，rap 佮 Hollywood ê 電影內底都也不時聽 ē 著烏人英語，毋過，烏人英語就是無法度出現 tī 美國 ê 學校 hām 英語教科書內底，就準 in 現任 ê 烏人總統 teh 講話，都嘛愛學白人主流 ê 呼音佮詞彙，是按怎？？？

因為，這究真是「權力」teh主張，毋是「人額」teh主張。台語現此時濟濟呼音 ê 改變，並毋是單純為著「講話呼音較利便」（親像連詞「kap」變讀做「kah」ê例），毋管是入聲尾落--去，或者是濁音韻頭消失，計計是受華語 ê 影響，有權力者透過體制、教育、媒體、法律等等，hō͘ 華語來制壓台語，hō͘ 台語 tī leh 滅無進前，先變款，chit 號變化，就是政治「權力」所造成--ê,也伊 kiau 一個族群語言 tòe 時間所產生 ê 自然呼音變化，本質上 kài 無仝 tī--leh。

我想，就是因為對 chit-ê變化背後 ê「權力」／「權力者」真不目（袂爽--啦！），我無啥愛 beh tòe 伊去變化、或者是接受 chit 號變化。也任何一個beh 攑順風旗 ê 人，lóng 應該先問 he 風是 àn 佗位來--ê，了後，chiah 來徛旗 khah 定當。