台語信望愛 - Chútê 13：Sòng Te̍klâi kah Gô͘ Kímhoat pittâm kóng honggiân（lênggí）ê kenggiām

《宋澤萊新著《天路拾穗》TOJ/台灣字版》

| |

Chútê 13：Sòng Te̍klâi kah Gô͘ Kímhoat pittâm kóng honggiân（lênggí）ê kenggiām

作者 Sòng Te̍klâi 2026.05.31

Ta̍hōethâu：Che sī pitchiá kah Gô͘ Kímhoat ê chi̍t phiⁿ bīnchheh pittâm. Lāibīn siōng tiōngiàu ê pō͘hūn sī káiphòa Gô͘ Kímhoat kóng honggiân（lênggí）ê sînkî kenggiām, ētàng chiahni̍h siôngsè koh siôngsi̍t tînsu̍t chhut lâi ê chin chió! Gô͘ Kímhoat ê kóng honggiân kenggiām kòetêng chin to̍kiú te̍ksû, sī tùi Sènglêng kàng tī i sengkhu téng, liáuāu iû i chūhoatsèng kóng chhut lâi ê, khòaⁿ khí lâi chiok ū khìsè! I inūi ánne kengkòe Sènglêng ê sélé, chhim lònglòng kámsiū tio̍h SiōngChú só͘ amkhàm ê bôhān òpì.

※Chiaⁿ Goe̍h 14 chákhí bīnchheh pittâm：
Sòng Te̍klâi：Góa tú kah Ô͘ Tiôngsiông thong tiānōe, i kóng lí bat kóngkòe "honggiân", iā to̍h sī chi̍t chióng kah SiōngChú kauthong ê gígiân, kóng ê lâng bô ittēng chaiiáⁿ he sī siáⁿmi̍h ìsù, m̄koh ētàng itti̍t kóng kah bô thêng, mā ū chi̍tkóa kàuhōe kóng che kiòchò "lênggí". Ē chi̍t pái nāsī Sènglêng ài lí kóng chit chióng gígiân, lí m̄thang tī simlāi chó͘tòng, chhōe chi̍tê pa̍tlâng thiaⁿ bē tio̍h ê só͘chāi, tōasiaⁿ kóng chhut lâi, kóng kui kang mā bô iàukín, ti̍tkàu lí thiám à bô siūⁿ beh koh kóng ûichí lóng thang. Che mā sī chi̍t chióng Sènglêng ê insù, m̄bián kiaⁿhiâⁿ giâugî.

Gô͘ Kímhoat：Góa tāiiok cha̍p nî chêng khaisí, tiāⁿtiāⁿ tī pòaⁿmê chhéⁿ khí lâi, hutjiân kóngkhí góa m̄bat ê gígiân, m̄koh he sī ū cho͘chit ê gígiân, góa tiāⁿtiāⁿ inūi ánne siūⁿ beh tékhòng, itti̍t kàu siūⁿ beh chèchí ê sî liām "Amen", chiū ánne thêng lo̍h lâi. Tāiiok nn̄g nî chêng, koh ū chi̍t pái, tng góa pòaⁿmê chhéⁿ khí lâi ê sî, chhìthàm lâi khuichhùi, itti̍t kóng, kàu kóng "Amen" ê sî to̍h thêngchí. M̄koh ji̍tsîthâu kahná bô hoattō͘ ánne, chitmá khah chió à. Tú khaisí, góa kiaⁿ sī chengsîn chèngthâu, āu lâi thauthau'á mn̄g kúiê lâng, in lóng kóng bô chit chióng kenggiām; siūⁿ beh mn̄g sînhū, m̄koh thâubóe itti̍t bô khuichhùi. Ūsî khaktēng koh ū chúnchek kámkak ná chhinchhiūⁿ sī kó͘ La̍hteng gí, ū nn̄g pái khaktēng sī kó͘ Ji̍tgí, lóng m̄ chaiiáⁿ i sī siáⁿ ìgī. Góa chêng kàu taⁿ m̄bat ha̍ksi̍p kòe chit chióng gígiân, chit chióng kenggiām chhiaukòe 50 pái, bat kah chi̍tê chengsîn kho iseng pêngiú kóng, i hôetap kóng, "Chhùsò͘ chiāmchiām kiámchió to̍h bô iàukín."

Sòng Te̍klâi：Honggiân sī engkai tiāⁿtiāⁿ kóng ê, i ē ínkhí chin chē sînjiah kîsū; tôngsî mā ētàng kiámkhin simlāi ê iusiong, tit tio̍h anùi.

Gô͘ Kímhoat：Thâukhak sī chhengchhéⁿ ê, chhùi soah itti̍t kóng, m̄koh sim sī pêngchēng ê, ti̍tkàu góa khuichhùi liām chhut "Amen", to̍h sûisî ē thêng lo̍h lâi.

Sòng Te̍klâi：Góa hō͘ lí chi̍tkóa kóng honggiân iáⁿphìⁿ, to̍h sī chit lūi ê gígiân. Kîtiong ū chi̍tê Bíkok lâng Kam Kiansìn bo̍ksu, sī honggiân ê léngsiù, i ētàng sùnkan ēng Sènglêng phahtó chi̍t tōa phiàn sìntô͘, lóng sī tùi honggiân lâi ê. Tī iáⁿphìⁿ tiong, Kam Kiansìn seng ēng Enggí kîtó chi̍t chām'á, liáuāu to̍h tn̂g sîkan ēng honggiân kîtó, lí seng khòaⁿbāi leh, iáⁿphìⁿ bāngchí jû hā： http://www.youtube.com/watch？v=9ew4XXc1c5k Lēnggōa ū chi̍tê iáⁿphìⁿ, mā sī Kam Kiansìn kángtō ê hiāntiûⁿ, ū chi̍tê simchōng hōanchiá kóng i ū simchōng pēⁿ, i khólêng ē sí. Tng i kóngōe ê sî, sī seng ēng Enggí kóng, m̄koh Kam Kiansìn bo̍ksu tôngsî kîtó i ētàng kóng honggiân, liáuāu, i sûisî kóng chhut sio liânsòa ê honggiân. Kam Kiansìn kohchài kinkì i kóng ê honggiân kā i hoane̍k, lāibīn ū chi̍t kù SiōngChú ê ōe, kóng i ê simchōng pēⁿ ē tit tio̍h i hó, i bē sí, chhiáⁿ lí mā khòaⁿ māi! Iáⁿphìⁿ bāngchí jû hā, Http://www.Youtube.Com/watch? v=rU3NhwqufaI

Gô͘ Kímhoat：Bô m̄ tio̍h, kiaⁿ chi̍t tiô, tekkhak to̍h sī chit chióng gígiân. Tú khaisí ê sî, góa tiāⁿtiāⁿ tī chhn̂g thâu khǹg chi̍t pún "sèngkeng", beh khùn chìnchêng, sûipiān tha̍k chi̍t tōaⁿ, putti-putkak I chiū chhuthiān à. Góa ē tī chhn̂g thâu khǹg "sèngkeng", sī inūi góa théchit te̍kpia̍t tùi im ê sūbu̍t ū kámèng. Góa siūsé liáuāu, to̍h koh khah ánchóaⁿ to bô im ê lâi óakīn góa, m̄koh hit kóa góa m̄chai ê gígiân koh khah tiāⁿtiāⁿ chhuthiān à.

Sòng Te̍klâi：Lí kèsio̍k kóng, m̄thang thêng. Tongjiân nāsī ū lâng ētàng hoane̍k chhut lâi siōng hó, bô lâng hoane̍k mā bô koanhē. Pêngsiông simchêng bô hó ê sî to̍h kóng chi̍tē, simchêng hó ê sî koh khah engkai kóng. Chit chióng to̍h ētàng hùnliān chhut itliû ê kóng honggiân ê púnléng à. Góa hō͘ lí ê chiahê iáⁿphìⁿ thang ke khòaⁿ kúi pái, chengka kakī tùi honggiân ê jīnbat, chiah bē hō͘ lâng m̄ chai beh ánchóaⁿ. Hiānchāi ū kóa kàuhōe huisiông hoántùi sìntô͘ kóng honggiân, che sī m̄tio̍h ê; in bēhiáu kóng honggiân khiok hoántùi pa̍tlâng kóng, si̍tchāi tùi Sènglêng chin sitlé; lí m̄bián chhap in, lí chīnliōng kóng honggiân lâi chhinkīn SiōngChú, m̄bián khehkhì.

Gô͘ Kímhoat：Chìnchêng góa tī Bûnkiànhōe jīm lāi mā ū kóng honggiân ê hiānsiōng, hit sî góa siū bēng chhúlí tiûsiat "Jînkoân Hn̂gkhu" ê jînkoân pênghoán sūbū. Āu lâi koh tiāⁿtiāⁿ chhuthiān tī Pîntong Bûnhòa Chhù, góa ūi tio̍h póhō͘ kó͘chek, khaisí chútiuⁿ siuhō͘ hòekhì ê Thianchú kàutn̂g, jîchhiáⁿ oânsêng kîtiong chi̍t chō "Ge̍kkhoân Kàuhōe", góa itti̍t tùi Sèngbó chin ū kámèng. Gō͘ cha̍p gōa hòe liáuāu ê góa chhuthiān chit chióng sînpì ê kenggiām, si̍tchāi sī hō͘ góa tōa kiaⁿhiâⁿ ê giâugî à.

Sòng Te̍klâi：%lí ū honggiân to̍h chīnliōng hiòng Iésu kóng, seng tī simlāi tùi Iésu kóng lí beh kóng honggiân, liáuāu to̍h khaisí kóng. Kóng soah ê sî kohchài hiòng Iésu soeh tosiā, ánne to̍h ēsái tit à. Kitoktô itchhè lóng tùi Iésu hūchek, titkiù á sī kóng honggiân lóng lâichū Iésu ê sìngióng, iûkî sī ittēng tio̍h ū sìn Iésu sí liáuāu saⁿ kang kohoa̍h ê sujîn líiû, jîchhiáⁿ káⁿ tī ta̍k lâng ê bīnchêng tōasiaⁿ kóng chhut sìn Iésu kohoa̍h ê líiû hō͘ pa̍tlâng thiaⁿ, chiah chinchiàⁿ tāikong-kòsêng, sǹg sī tī sìngióng siōng chiok ū sêngchiū. Koanhē Sèngbó, thang chiāmsî khǹg tī piⁿ'á, pài á sī m̄pài lóng bûsó͘ūi. Kitokkàu ê he̍ksim sìngióng kantaⁿ ū chi̍t tiám, to̍h sī sìn Iésu sí liáuāu saⁿ kang kohoa̍h. Ánchóaⁿ chiah sǹg sī sìn leh? To̍h sī ài ū kakī to̍kiú te̍ksû ê chi̍t thò líiû, m̄ koán ánchóaⁿ tio̍h chhōechhut líiû, chóng kóng chi̍t kù to̍h sī ài ū chi̍t thò sio̍k tī kakī ê líiû! Gô͘ Kímhoat, Tī góa simlāi Sèngbó kah Iésu sī chi̍t thé ê. Góa ê gōakong, a'î, góa saⁿ tāi lâng lóng ū lêng ī théchit, goán a'î ê chabó͘ kiáⁿ sīmchì ē khòaⁿ tio̍h, i chò hō͘sū m̄ káⁿ tī kahō͘ pâng. Góa chìnchêng khì kok chióng biōsī to̍h ē ū kámkak, chitmá siūsé liáuāu chin chūjiân to̍h bô siūⁿ beh chhinkīn hit só͘chāi, chí chhun kakī thó͘tē téngbīn chū sèhàn sêngtióng ê Thótīkong 祠 ūtangsî'á iáu ē tú tio̍h.

※Chiaⁿ Goe̍h 15 bīnchheh pittâm：
Gô͘ Kímhoat：Êngàm khùn chêng hōaⁿ"sèngkeng" kîtó, kàu chìsêng ê sî kèngjiân kìm bē tiâu bô thêng kóng Png gí, kā "sèngkeng" sûi hiankhui, honggiân kèngjiân khoàisok tha̍kkòe, choânsī m̄bat ê gígiân, gíim chhiauchhut 12 imchat ísiōng, m̄sī pêngsiông ētàng tha̍k ê soktō͘ thò͘chhut, huisiông kiaⁿhiâⁿ ê giâugî lah, che sī thâu chi̍tpái thang chūchú kóng honggiân. M̄ chai sī siáⁿmi̍h? Mā kiámchhái chísī âu im loān kóng? góa siūⁿ chūjiân to̍h hó, hō͘ i chūjiân lâikhì siōng hó lah.

Sòng Te̍klâi：Sìntô͘ thâu chi̍tpái tùi Sènglêng kámtōng ēhiáu kóng honggiân, sòachiap to̍h ē kakī sûi'ì kóng honggiân, siu pàng chūiû-chūchāi, to̍h kahná thâu chi̍tpái o̍h ēhiáu siûchúi, íāu itseng sûisî lóng ē siûchúi, che sī chin chūjiân ê. Honggiân thang hunchò nn̄g chióng, chi̍t chióng sī tan imchat honggiân, chíū kóng chi̍tê im, pílūn kóng"lah lah lah lah"á sī"tatata tap", chhinchhiūⁿ gín'á tútú ēhiáu kóngōe, che sī píkàu khah kántan ê, pēng m̄sī gígiân, bô hoattō͘ hoane̍k. Lēnggōa chi̍tê chióng sī to imchat honggiân, pílūn kóng"kham kha̍h lī to lī 帝斯……"chit chióng itti̍t kóng, kahná gōakok gígiân, kah itpoaⁿ ê gígiân ēsái kóng sī bô chhapia̍t, chísī ū chin chē chi̍h im jîí, chit chióng to imchat ê honggiân sī gígiân, inūi ánne ētàng hoane̍k, lōeiông khólêng sī oló, mā khólêng sī SiōngChú kautài ê ōe, nāsī ētàng hoane̍k chhutlâi, kóng ê lâng to̍h khólêng ē piànsêng sianti. M̄ koán tan imchat á sī to imchat, lóng sī honggiân, lóng lâichū tī Sènglêng ê insù. Tâioân itpoaⁿ ê kàuhōe tī lépài chūhōe ê sî bô kóng honggiân, kantaⁿ ū chi̍t nn̄g ê kàuhōe tī lépài ê sî kiámchhái ē chòhóe kóng honggiân kúi hun cheng, lí thang hótáⁿ khì kah in chòhóe kîtó, m̄bián kiaⁿ. Lí kóng ê engkai sī to imchat ê honggiân, góa ū chi̍t phiⁿ bûnchiuⁿ pun saⁿ pái tengchài tī bānglō͘ "Kitokkàu Thongsìn" ni̍h, kiòchò, 〈 lí mā ētàng kà lâng kóng honggiân（lênggí）〉, tiámoa̍t lu̍t phòa bān. Góa ēhiáu kóng honggiân mā sī tùi Sènglêng ê kámtōng só͘ tòa lâi, m̄koh khiok sī tùi liânsòa liāmsiōng"Halélú'iah"chit 4 jī, ti̍tkàu Sènglêng kànglîm sengkhu téng to̍h ēhiáu kóng honggiân; só͘í góa thang kàutō pa̍tlâng ánchóaⁿ kóng honggiân. Goán Lo̍kkáng Sìngīhōe ê sìntô͘ lóng ēhiáu kóng honggiân, tōapō͘hūn lóng sī góa kàutō ê. Góa chitmá kā chit phiⁿ tâm góa ánchóaⁿ kóng honggiân kah ánchóaⁿ kà lâng kóng honggiân ê bûnchiuⁿ thoân hō͘ lí, chionglâi lí mā thang ánne khì kà lâng kóng honggiân, bāngchí jû hā, Http://christcom.Ning.Com/....../ni-ye-ke-yi-jiao-ren......

Gô͘ Kímhoat：Chiū lí kóng ê honggiân, góa sī nn̄g chióng lóng ū, to imchat ê itti̍t kóng, tiongkan tútn̄g chhuthiān sio liânsòa"tap, tap, tap..."ê liânchhoàn khoàisok im, tútn̄g iáu ē ū chi̍t, nn̄g pái giú tn̂g im chhinchhiūⁿ gîm oh.

Sòng Te̍klâi：Ánne sī chin hó, si̍tchè siōng sī to imchat honggiân ni̍h amkhàm tan imchat; m̄koh tan imchat honggiân bô hoattō͘ amkhàm to imchat. Che to̍h sī sī ánchóaⁿ ū chi̍tkóa kàuhōe ê lâng bē hiáu kóng to imchat honggiân ê goânin, in kantaⁿ ēhiáu kóng tan imchat, lí khì in hia chò lépài, kîtó to̍h ē chaiiáⁿ à. Ūsî chūn goán chhiùⁿkoa, kā koasû kái chò honggiân, to̍h piànsêng lêngkoa à.

Gô͘ Kímhoat：Bêngpe̍k, kengkòe lí chi̍t kóng, góa sim an loh, bē kiaⁿ à. Púnlâi inūi bô hoattō͘ chhengchhó hoatseng siáⁿmi̍h tāichì, tī che chìnchêng mā m̄bat thiaⁿkòe honggiân ê kónghoat, kantaⁿ siàuliân ê sî tī pō͘lo̍k ê Chin Iésu kàuhōe tiong, khòaⁿkòe goânchūbîn kîtó, tōasiaⁿ hoah; ū kóa lâng chhichhám khàu, lâu ba̍ksái, kiaⁿ chi̍t tōa tiô, kàu taⁿ iáu ìnsiōng chhimkhek. Góa chhuthiān chit chióng hiānsiōng mā m̄ káⁿ tùi lâng kóng, kiaⁿlâng kóng góa"khísiáu"! chìnchêng kakī tha̍k sèngkeng, khòaⁿ tio̍h"kóng honggiân"saⁿê jī, lia̍hchò sī teh chí tongsî Êlúsalèm ê só͘chāi"honggiân". Sòng Te̍klâi, Chitmá kóng honggiân ê kàutô͘ kiòchò Gō͘sûncheh kàuphài, bo̍kchêng tī A'chiu, Huichiu, La̍hteng bí kah Bíchiu, chóngkiōng ū chi̍t ek gōa lâng, sī sèkài siōng tōa ê Kitokkàu phài. Tī Wiki Pahkho ētàng chhâ tio̍h Gō͘sûncheh kàuphài ê káisoeh, khòaⁿbāi leh to̍h ētàng ū tāikhài ê liáukái. Gō͘sûncheh kàuphài ê sìntô͘ bô ittēng lóng ēhiáu kóng honggiân, tāikhài ēhiáu kóng honggiân ê lâng ū 2 chiâⁿ chóiū, sǹg khílâi ba̍k chêngsì kài siōng siōngchió iáu ū 2 chhengbān lâng ēhiáu kóng honggiân, sò͘bo̍k huisiông pângtōa, pēng bô hikî!

※Chiaⁿ Goe̍h 16 bīnchheh pittâm：
Gô͘ Kímhoat, kin'áji̍t hujîn khì tông ha̍khōe, bô tī chhù, góa kā mn̂g koaiⁿ khí lâi tha̍k keng, kîtó, ho͘ hiàm Iéhóbah, kèngjiân ū loánliû tùi thâu koàn lo̍hlâi, liáuāu kìm bē tiâu itti̍t kóng honggiân, jîchhiáⁿ ba̍ksái lâu ba̍ksái tih. Góa kòkái chōe, honggiân chiokchiok kóng liáu chi̍t tiámcheng, hókachài hujîn bô tī leh, nā bô, i kiámchhái ē heⁿh tio̍hkiaⁿ, kámkak putkhó-sugī. Kiatsok liáuāu kui sengkhu sùsī sóngkhoài, liāusióng bē kàu ê pêngchēng. Pa̍tlâng nāsī khòaⁿ góa kóng honggiân, ittēng ē kóng"siáulâng ê gígiân", si̍tchāi chiok sînkî lah, jînseng thâu chi̍tpái hiahni̍h tōa ê chhiongkek. Íāu, góa engkai ánchóaⁿ hôeèng?

Sòng Te̍klâi：Ti̍t kóng honggiân to̍h íkeng sī hôeèng à, chhiáⁿ kèsio̍k ēng honggiân kîtó, inūi tùi lí lêngmiā ê sêngtióng ū tōa ê pangchān kah līek. Tôngsî chhōe ūi pa̍tlâng kîtó ê kihōe, khah chia̍p ūi kakī ê khanchhiú kah kiáⁿjî kîtó, mā ūi chhinchiâⁿ pêngiú kîtó. Bôlūn in ū kiānkhong, kengchè, kangchok, sengoa̍h ê khùnlân, lóng ūi in kîtó. Thang ēng phó͘thong ê gígiân seng kîtó, liáuāu ēng honggiân kîtó, lâi hùnliān kakī kîtó ê hāukó. Ji̍tji̍t kîtó, chē chē kîtó.

Gô͘ Kímhoat：Kin'áji̍t ê kenggiām hō͘ góa chìn chi̍t pō͘ ū kiantēng ê Kitok sìngióng. Góa phahsǹg beh kā hujîn soatbêng, jîchhiáⁿ ūi khanchhiú kah chabó͘kiáⁿ kîtó. Goán khanchhiú mā sī itpoaⁿ bînkan sìngióng chhutsin ê katêng, i kiámchhái it sî chi kan bô hoattō͘ choánpiàn liāmthâu, góa tùi Kitok jīnbat suijiân iáu chhián, m̄koh góa ē kā i kóng góa ê thégiām, hō͘ i bêngpe̍k. Kin'áji̍t ê chhiongkek huisiông tōa, sī góa sèⁿmiā ê tiōngiàu thégiām. Chìnchêng siàuliân sîsiông kā"sèngkeng" tòngchò kò͘sū lâi tha̍k, ūsî iáu huisiông tékhòng, bô siūⁿ tio̍h i só͘ kóng ê lóng sī chinsi̍t ê chûnchāi.

Sòng Te̍klâi：Sènglêng tùi thâukhak téngbīn koànak lo̍hlâi, che to̍h sī siū Sènglêng ê sé, sī chi̍t chióng chin chhim ê Kitokkàu thégiām. Lí nāsī téchiām khǹg bē tíntāng lí ê hujîn lâi siūsé, mā m̄bián kip. Tiāⁿtiāⁿ thè i á sī i ê chhinchiâⁿ pêngiú kîtó, hō͘ i bānbān'á liáukái sìn Kitokkàu ê hóchhù to̍h ēsái. Góa siūⁿ i ē chiapsiū lí ūi i á sī i ê chhinchiâⁿ pêngiú kîtó.

※Chiaⁿ Goe̍h 20 bīnchheh pittâm：
Gô͘ Kímhoat：Chísī kóng, kakī iáu bē bêngpe̍k, sī ánchóaⁿ téngpái Sènglêng kànglîm, tōa kóng honggiân, jîchhiáⁿ ba̍ksái lâu ba̍ksái tih chi̍t tiámcheng kú chiah thêngchí. M̄koh chòekīn nn̄g pái góa kîkiû, I soah 没 koh lâi, chísī simlāi pêngchēng. Téngpái Sènglêng lâi ê sî, kui sengkhu loánliû sùsī sóngkhoài bôpí, honggiân ná kóng ná kín koh ná khàu. Putkhó-sugī, sūāu, chhinchhiūⁿ kui sengkhu pī sé chhengkhì itpoaⁿ.

Sòng Te̍klâi：Honggiân ētàng kakī kóng, tio̍hsǹg bô Sènglêng bênghián ê kànglîm mā thang kóng, bô ittēng ài kîkiû.

Gô͘ Kímhoat：Ēkìtit hit sî sī ēpo͘ chi̍t tiám chóiū, góa chi̍tê lâng koaiⁿ tī seklāi, pòaⁿ kūi leh tha̍k "sèngkeng" kîtó, ho͘kiû Iéhóbah, Iésu Kitok, I to̍h lâi à. Tī chhengchhó chūchú ê kîkiû hē kóng honggiân, íkeng ū nn̄g pái ê kenggiām. Góa m̄bat ánchóaⁿ kîkiû, chísī kîkiû Iéhóbah, kîkiû Iésu Kitok saⁿ pái, Sènglêng kèngjiân chinchiàⁿ lâi à, góa bô sai chū thong.

Sòng Te̍klâi：Inūi lí íkeng ū kóng honggiân ê kenggiām, chíiàu pîn sìnsim, àn chiàu lí chêng kúi pái kóng honggiân ê kenggiām, sûisî lóng thang kóng. Nāsī ta̍k pái lóng tio̍h Sènglêng kànglîm chiah kóng, he iáu bô kàu chūchú. Lí tio̍h cháuchhōe kakī chitmá to̍h ētànḡ kóng chhutlâi., ánne to̍h tāikong-kòsêng à.

Gô͘ Kímhoat：Sèⁿmiā tiong bô jīmhô kenggiām thang píphēng."kui sengkhu pī sé chīn", góa ēng chitê hêngiôngsû, lí ittēng ētàng bêngpe̍k ìsù.

Sòng Te̍klâi：Sènglêng kànglîm ê bo̍ktek sī hō͘ lí ū sînsèng ê kenggiām, ētàng bêngpe̍k SiōngChú ê bûsó͘-putchāi kah sînpì ê Kitok òpì, hō͘ lí chi̍tē’á to̍h chìnji̍p Kitokkàu ê chhimchhim ê só͘chāi. Liáuāu kohchài chiàu khíkang chi̍t pō͘ chi̍t pō͘ lâi, bānbān'á koh khah se̍kchhiú. Tī Kitokkàu chákî（Páulô iáu oa̍h leh ê sî）lóng iaukiû sìntô͘ ài siū nn̄gê sélé, chi̍tê sī chúi ê sélé, lēnggōa chi̍tê sī Sènglêng ê sélé. Āu lâi Sènglêng ê sélé pī hòekhì tiāu, sìntô͘ to̍h piàn kah chin chhiánpo̍h.

Gô͘ Kímhoat：Bô m̄ tio̍h, góa kakī thang kóng, m̄koh góa bô khaktēng he sī m̄sī lênggí, m̄koh Sènglêng kànglîm hit chi̍t pái, inūi gígiân m̄sī góa só͘ khòngchè ê, siōng tiōngiàu ê sī kui sengkhu pī loánliû pauûi à.

Sòng Te̍klâi：Lí kengle̍k tio̍h ê to̍h sī Sènglêng ê sélé. Nāsī ū kihōe, góa ētàng pôe lí kóng honggiân. Chitmá lí mā thang khì chi̍tkóa kóng honggiân ê kàuhōe kah chin chē sìntô͘ chòhóe kóng honggiân. Kah tāike chòhóe kóng honggiân pí kakī tanto̍k kóng honggiân ē koh khah ū khùila̍t, khìsè koh khah kiôngtāi!

Gô͘ Kímhoat：Chìnchêng cha̍p nî, sī tī pòaⁿmê pòaⁿ môa bū tiong chhuthiān kóng honggiân, chhengchhéⁿ chhinchhiūⁿ pôngkoanchiá, chit nn̄g pái mā sī oânchoân chhengchhéⁿ. Inūi khòaⁿ lí ê bûnchiuⁿ beh sìn koh giâugî, chútōng ho͘kiû SiōngChú, I kèngjiân chèngbêng hō͘ góa khòaⁿ, hō͘ góa siōng tōa ê chhiongkek sī, Sènglêng kahná teh kóng,"lí chitê sìngióng bô kiantēng ê lâng, góa hiánhiān hō͘ lí bêngpe̍k!" Sòng Te̍klâi, lí m̄thang ko͘ chi̍tê lâng cháuchhōe, ài khì ū Sènglêng ê kàuhōe kah chin chē lâng chòhóe lépài, tapchhùikó͘, ánne chìnpō͘ chiah ē kín!

Gô͘ Kímhoat： OK.

Sòng Te̍klâi：Khaihòng kakī, bô kiaⁿhiâⁿ khì thiauchiàn, ke khòaⁿ ke o̍h, ánne to̍h ētàng ji̍tji̍t ū chìnpō͘, jú lâi jú ū chhimtō͘.
──2022, 01, 21 tah tī "Kitokkàu Thongsìn"

《宋澤萊新著《天路拾穗》TOJ/台灣字版》

Chútê 13：Sòng Te̍klâi kah Gô͘ Kímhoat pittâm kóng honggiân（lênggí）ê kenggiām

作者 Sòng Te̍klâi 2026.05.31

【相關網站搜尋】

【字型】

《台語工具》