《宋澤萊新著《天路拾穗》TOJ/台灣字版》

 | | | 轉寄

Chútê 14：Sînkî ê honggiân（lênggí）kîtó ipēⁿ kì

作者 Sòng Te̍klâi 2026.06.07

Tējī pō͘ Sènglêng Koànak
Chútê 14：Sînkî ê honggiân（lênggí）kîtó ipēⁿ kì

Honggiân（lênggí）sī chi̍t chióng sînpì ê gígiân, sī SiōngChú seng sù hō͘ lâng chi̍t chióng te̍ksû ê kháuchâi, liáuāu chiah kóng chhut ê ōegí. I sī lâng kah SiōngChú chi kan kauliû ê gígiân, kóng ê lâng bô ittēng ētàng oânchoân líkái i púnlâng só͘ kóng ê gígiân ìsù, m̄koh SiōngChú khiok thang líkái, lāibīn tōapō͘hūn lóng sī tùi SiōngChú ê oló kah kèngpài. K íkeng ū chin chē nî bô chò liânsòa pòaⁿ kang á sī chi̍t kang ê honggiân kîtó à. Chit chūn’á, sengkhu ê thiàⁿthàng teh kā i khùnjiáu …….

Chi̍t lépài chêng, K hiônghiông siūⁿ tio̍h engkai tiôngsin chò kóa honggiân kîtó. Chiū ánne tī tiongtàu, K kiâⁿ chhutmn̂g, khì hùkīn ê Lo̍kkáng tìn li̍p ūntōngtiûⁿ kiâⁿkiâⁿ leh, siōng bóe chhōe tio̍h lō͘piⁿ ê chi̍t keng Choânke Piānlī tiàm, i tī têng’á kha ê chi̍t tiuⁿ sió polê toh chêng chē lo̍h lâi, kā Bíkok honggiân kîtó ka Kam Kiansìn （Kenneth E. Hagin）ê chi̍t pún chheh "Honggiân" phahkhui, ná khòaⁿ chheh, ná chò honggiân kîtó. Inūi honggiân kîtó bô suiàu ēng tio̍h tōanáu sukhó, chísī chi̍t chióng tansûn ê kháuthâu kîtó tōngchok, só͘í ētàng teh khòaⁿ chheh ê sî mā choh honggiân kîtó, sīmchì chò chin chē kasū ê sî, lóng thang lâi phòeha̍p chò honggiân kîtó, si̍tchāi sī chin hongpiān ê chi̍t chióng kîtó. I chit pái te̍kpia̍t kā kîtó tōngchok ap kē tī hoâiⁿkehmo̍͘h íhā, iā to̍h sī sú'iōng itpoaⁿ lâng só͘ kóng ê "pak sek ho͘khip hoat", khaisí chò kîtó. Inūi chitê ūntōngtiûⁿ khu, chhutji̍p piānlī tiàm ê lâng bô chē, i chē tī hia, bô lâng kansia̍p kiáujiáu, honggiân kóng kah chin liúlia̍h, ná chhinchhiūⁿ chi̍tê gōakok ê sinbûn hòngsàng thâu, ti̍tti̍t kóng chhut sioliân sòa ê ōegí, gígiân piànsêng chi̍t chióng iubí ê ga̍kim, tī i ê chhùi ni̍h teh hiángtōng, chìntōng i ê sengkhu, tòa lâi kuiê sengkhu lāipō͘ ê tháupàng, putti-putkak hoatkiàn i khòaⁿliáu 50 ia̍h ê chheh, íkeng kîtó chi̍t tiámcheng. Chit sî i mā hoatkiàn, āmkún kah khachiahphiaⁿ ê thiàⁿ（he sī inūi khòaⁿ siuⁿ chē ê tiānsī kah sú'iōng tiānnáu phah jī só͘ tòa lâi ê thiàⁿthàng）kiámkhin chin chē, sīmchì chhiúkó͘thâu kah tōathúi ê sngthiàⁿ lóng phahm̄kiàn khì. I kámkak huisiông sînkî! Chi̍tê Mô͘kúi ê siaⁿim kahná teh khausé i kóng, "Honggiân kîtó sī bô hoattō͘ i pēⁿ, lí thiàⁿthàng ê kiámkhin kah honggiân kîtó bô koanhē, he chísī inūi lí kin'áji̍t khùn khah pá, chengsîn hó ê iânkò͘!"

K thiaⁿ Mô͘kúi ê siaⁿim, kámkak chin bô hoaⁿhí, to̍h tùi i kóng, "Pêngiú, lí kóng tio̍h chi̍tpòaⁿ, bô m̄ tio̍h, góa kin'áji̍t sī khùn píkàu khah pá, m̄koh iáu bē tìkàu kiámkhin góa sengkhu ê thiàⁿthàng; inūi tútú góa iáubōe choh honggiân kîtó ê sî, sengkhu iáu sī thiàⁿthàng ê. Chèngkhak ê goânin sī chitmá chò kîtó, sengkhu chiah kámkak píkàu khah bē thiàⁿ!"

Mô͘kúi ê siaⁿim koh kóng, "Góa m̄ siongsìn!" K chhiò khí lâi, kóng, "Hó, ánne góa to̍h koh chò chi̍t tiámcheng ê honggiân kîtó! Che sī Kam Kiansìn siansiⁿ kà góa ê."

K chiū ánne chiūkīn toh'á, koh chò chi̍t tiámcheng ê honggiân kîtó, kámkak koh khah khinsang, thiàⁿ koh kiám kē chin chē. Mô͘kúi koh kóng, "Suijiân sī kiámkhin, lí iáu sī ētàng kámkak sengkhu ê thiàⁿ kám m̄sī? Kiámchhái sī chiāmsî ê jîí." K thiaⁿliáu koh chhiò khí lâi, to̍h kóng, "Lí kìjiân ánne kóng, góa to̍h kohchài kèsio̍k chò honggiân kîtó." K chiū ánne kā chheh ha̍p khí lâi, līkhui toh’á, tī ūntōngtiûⁿ ê pō͘tō kiâⁿkiâⁿ koh chē chē leh, kèsio̍k honggiân kîtó.

I ê kîtó koh khah liúlia̍h, ná chhinchhiūⁿ chi̍t chióng chúichhiâng ê siaⁿim, chìntōng i ê kui sengkhu, piàⁿkhang sengkhu, hō͘ i kahná sitkhì sengkhu, paktó͘ kahná piànsêng teh chò tōachúi, bô thêng hiòng téngkoân éng khí lí, tōachúi ni̍h ū Iésu kah Sènglêng ê hêngiáⁿ. I kámkak Iésu kah Sènglêng to̍h tī i ê lāibīn, kah i tôngchāi.

Putti-putkak, ji̍t lo̍h sai soaⁿ, i kèngjiân tahtah koh kîtó saⁿ tiámcheng, chengsîn koh khah ōng.

Liáuāu, i liânsòa kîtó saⁿ kang, só͘ū ê thiàⁿthàng lóng phahm̄kiàn khì, sengkhu ióngchòng khí lâi, kámkak khantîⁿ tī sinchiūⁿ ê Mô͘kúi lóng siausit, sinsim khongchiân ê tháupàng! Chahng, ū chi̍tê kàuhōe khà tiānōe hō͘ K, kiò K khì chhamka in Pài sì ê siócho͘ chūhōe, i hoaⁿhí tapèng.

Che sī chi̍tê ū pehê lâng ê sèsè chūhōe, lāibīn ū chi̍tê sióchiá chengsîn théla̍t bô hó, kóng sī chòekīn ū chin chē hō͘ i kámkak kíntiuⁿ, bē sóngkhoài ê tāichì hoatseng. Tī chūhōe āu, K kā i kóng chi̍tê pak sek ho͘khip ê honggiân kîtó pìkoat, K kóng, "Seng tn̂gtn̂g khip chi̍t kháu khùi, seng mài kîtó; liáuāu bānbān'á thó͘khùi, chi̍tbīn thó͘khùi chi̍tbīn kîtó, itti̍t kā khùi thò͘ oân, honggiân kîtó sû mā chiāmsî kóng soah. Liáuāu kohchài khip chi̍t kháu khùi, seng mài kîtó; liáuāu bānbān'á thó͘khùi, chi̍tbīn thó͘khùi chi̍tbīn kîtó, itti̍t kā khùi thò͘ oân, honggiân kîtó sû chiāmsî mā kóng soah……ánne hoánhok chò lo̍h khì. Chengsîn théla̍t to̍h ē chiāmchiām piàn hó!"
──2021, 03, 26 tī Lo̍kkáng