《台文通訊精選》

 | | | 轉寄

名片

作者 徐來 2008.02.03

「阿光，你有看著作咖哩餃ê鍾先生ê電話無？」阿碧一面翻手摺簿á，一面問。「無ah。」阿光對冊堆hia gia̍h頭應講，「你tō是物件攏無beh khǹg tī固定ê所在。」阿碧a koh去péng名片簿á，名片簿á真大本，內面ê名片五花十色，有ê是真熟ê朋友，有ê是kan-na見過一擺ê人。有ê名片真幼秀，有ê印kah全全是頭銜(hâm)，有ê真樸素、簡潔，有ê利用中西頭銜名稱ê差別，膨風kah hō͘人看著會起愛笑。Hit個tī多倫多市作咖哩餃真chē年，品質永遠保持一流，派送時間永遠準時ê鍾先生ê名片chhōe bē著，阿碧心內暗暗著急。Eng-暗，有一kóa朋友beh來厝裡開會，伊自認廚藝無精，買kóa咖哩餃來補充，會減少心理負擔。Tī péng chhōe ê中間，作頭毛ê亞伯ê名片，出現tī眼前，伊安心微微á 笑一下。

頂禮拜六就是因為beh參加餐會，chhōe無亞伯ê名片thang約時間作頭毛。中文‘黃頁’廣告又koh hō͘阿光sóa走，只好無約時間強去。亞伯ê生理真好，伊ê太太teh替伊預約。Hit工，規間髮廊全全是人，等不止一khùn á 才輪到伊。亞伯kap另外一個少年家作伙經營這間美髮店，店面無大，總是佈置kah真幽雅。伊ê手藝精，而且koh不斷求新求進步，所以客戶攏自自然然愛chhōe伊。Hit日，碧a作好頭毛了後，真慎重kā伊ê名片袋入手袋，轉去了後，馬上khǹg tī名片簿。確實也真心適，平時tī名片the̍h出the̍h入ê中間，碧a也無感覺特別啥物。M̄-kú，ùi這擺ê經驗，伊認為名片the̍h出去就是傳達一種信息，講出名片者ê功用kap服務範圍。設使寫kah規大堆，印kah真súi，真高尚，卻無半項實質ê效能，mā無啥意思。或者，講khah嚴格一點á，當收名片ê人，失去這張名片ê時，若是bē感受著一種損失kap不安，按呢，這種名片就是無路用，che只不過是一張白紙，而且這張白紙是teh浪費空間，製造pùn-sò niā-tiāⁿ。

想著eng-暗ê開會，伊又koh煩惱起來。減採，上蓋好ê辦法就是拍電話去介紹鍾先生ê朋友ê厝，koh再kā伊問一擺lah ！