《台文通訊精選》

 | | | 轉寄

火車

作者 罔想 2007.12.02

細漢ê時，阮tòa tī台南，台北是遠遠ê所在。我有阿伯tī台北做醫生，有時阿媽beh去台北看in，爸爸tō chhōa阿媽去坐火車。Tī火車頭，我看火車拖長長，一直駛遠去，希望有一日我mā會tàng坐火車去遠遠ê所在。

讀小學ê時，阿兄kap阿姊開始去台北讀大學，in坐火車去，坐火車轉來。我去車頭接in，in講火車票無好買，火車便當無好食，in講khah愛坐快車，m̄免停真chē站。我心內想，停khah chē站，慢慢á駛，慢慢á到，敢m̄是khah好？

10歲ê時，第一擺坐火車，火車叫做「光華號」，一路搖來搖去，駛4點外鐘到台北。Tùi火車ê窗á，我這個都市gín-á第一擺看著一片一片ê田園、作穡（sit）人ê稻á，看著青瓦紅牆ê厝，看著水牛、白鴒鷥，看著咱ê美麗島。

大學ê時流行peh山、行路，hit時陣上熱ê路線是tùi阿里山行到溪頭。行tī山路，有時行tī鐵枝路頂，有時mā有小火車對面駛過來，hō͘恬恬ê山加添趣味。

後來，火車去，火車來。火車帶來有甜甜、酸酸、澀澀ê滋味。有一擺tùi潮州恁ê厝出來，你ê老pē送我去車頭，買車票beh hō͘我轉去台南，心頭紛紛亂亂，火車來就peh起lih坐，等我心定ê時，火車已經到枋寮。

出國了後，北美洲公路發達，無啥物機會坐火車。有一擺去Mississauga chhōe朋友，時間已經真趕，無想到koh hō͘一列火車擋tiâu leh，擋真久，頭前ê車有ê等bē落，開始越頭。算看有幾節，哇！超過100節，koh加算無著ê，應該有200節，che是載貨ê火車。我想tī北美洲，火車拖真長，用來載貨ê功用比載人khah大。

前二工，tùi台灣送出來ê衛星新聞，看著一台小火車慢慢駛到集集車站，知影集集線ê小火車恢復通車，心裡感覺真歡喜。咱受傷ê故鄉一節一節，一段一段ê恢復，引起我對火車ê回想，希望後擺轉去台灣，有機會koh去坐火車。