《台文通訊精選》

 | | | 轉寄

我beh學客語

作者 江蓋世 2006.04.09

「江先生，你寫hit篇『我ê台語生涯』真趣味！」

這句話，是我tī美國巡迴推動「1995年百年建國運動」，有一kóa同學或者同鄉定定kā我o-ló ê話。因為hit篇文章，bat tī公論報kap自立週報刊過。

「恁講簡單簡單一句“趣味”，敢知影he是我十幾年來ê心路歷程。」每一擺我心內lóng按呢teh想。

＜漂撇ê台語＞

我讀建中ê時，內心歧視「台灣國語」，我讀台大ê時拚命學捲舌ê｢北京話」，我入去黨外陣營ê時，我覺醒：「我是台灣人，為甚物我bē曉講漂撇ê台語？」

所以，以後規年，阮hit班ê同學拚命teh讀「拖福」ê時，我真認真teh學台語。1991年，獨盟事件入獄。詩人阿仁來鼓勵我：「趁這陣á好好練寫台語。」Chit-má我會曉講、會曉寫，雖然m̄是真gâu。

回想éng過，tī台大讀冊ê時，一kóa中南部ê查某同學，明明會曉講台語，soah顛倒堅持一定beh講北京話，為甚物？「驚台灣國語ê腔，會hō͘人笑lah！」這就是國民黨歧視台語所造成台灣人ê自卑感。

但是，我chit-má所知影ê台大學弟學妹，受台語文運動ê影響，情形soah無仝a。

「這個讚！台語真gâu講！bú學運ê，一上台á頂，台語siah-siah叫，讚就是讚！」這種觀念ê改變，雖然來了有khah慢，我猶原是足歡喜ê。

＜劉慧真ê啟示＞

今年熱天，我kap一陣青年朋友，tī新店烏來辦一擺「台灣青年歇熱研討營」。會中，有一位學員，叫做劉慧真，伊是師大客語社ê社長。有一擺 ī討論ê中間，伊講，伊beh用客語來講，請伊ê男朋友盧誕春當場翻譯。

「Ôa，原來客語慢慢á聽，mā是會tàng聽bat六、七成，koh hiah-nih súi ....，hmh，我也beh學。」我一面聽一面teh想。

研討營結束進前，我就kā劉慧真講：「慧真，我決定beh好好來練客語，半年了後請來驗收我ê客語程度。」「好a，半年後看你ô͘!」伊笑笑á回答。

＜四界chhōe錄音帶＞

但是我話講了siuⁿ過頭緊。

Beh學語言，上緊ê方法就是錄音帶。台大附近ê冊店，我一間一間去chhōe。「對不起，我們沒有賣客家話錄音帶。」Chhōe無真m̄甘願，我四界拍電話問人，結局，人kā我報：「你去長老教會總會chhōe邱善雄牧師。」Chhōe tio̍h這位客家人牧師，伊足熱心ê，替我chhōe兩套客語錄音帶，一套是「約翰福音」，一套是「啟應文」。

「真好，我會使好好á練，希望我ê『客語生涯』真緊就會tàng成功！」

可惜，這套m̄是一般ê日常用語，是聖經經節，我聽起來有khah食力。有時聽kah會tuh-ku。這hō͘我真感慨：「為甚物tī台灣ê市面上，有俄語、法語、德語、日語....甚至廣東話ê錄音帶thang學習，thái會無客語leh？國民黨壟斷ê媒體，koh真少有客語節目，hō͘ beh學ê人輕鬆就得tio̍h機會來學....」

＜我ê客語之望＞

我希望有一工，我會使用客語來讀報紙，來kap苗栗莊腳ê阿公阿婆用客語開講，來用客語講「咱beh出頭天，台灣ài獨立！」

這個望，tang時會成真？「好好á練，我一定會成功ê！」我按呢不時teh kā家己鼓勵。