《台文通訊精選》

 | | | 轉寄

癭á

作者 清風 2007.09.30

若是bat tī台灣tòa過ê人，加減攏bat生過粒á，有ê大，有ê細，有ê紅紅腫腫無膿，兩三工就無代誌，總是，你m̄知bat聽過癭á無？Che是我tī高二hit年發生ê代誌。

Hit年ê熱天，有一日，tī洗身軀ê時，發現腹肚邊，有生一粒粒á。當時，感覺紅紅chiūⁿ（癢） chiūⁿ，也無特別掛意。嘴同嘴kā媽媽講，媽媽有六個kiáⁿ，平時對我hoah疼hoah酸；常常褒so(搓)一下就好ah；無想著，伊看了後，隨時chhōa我去民生西路口，chhōe田仙。田仙是一間tī民間開業ê漢醫，差不多阮民生西路矮厝莊á人ê腫瘤、粒á，攏用伊ê膏藥，貼(tah)貼leh就好。普通時，伊ê生理真ka-ia̍h,若是普通粒á,大約攏是看看一兩擺，就叫你the̍h藥膏轉去貼貼leh，幾工了後，就好kah離離。 總是，伊第一擺看著我ê細粒粒á ê時，伊kap媽媽講：「Che若準m̄是普通粒á，m̄-koh，幾工了後，我就會知，你這貼膏藥the̍h轉去貼看māi…。 」我就照田仙ê吩咐，乖乖就將膏藥貼tī腹肚邊ê粒á頂面。

兩工了後，我發現粒á已經漲大，比膏藥koh khah大，去hō͘田仙koh換藥ê時，伊用koh khah大ê膏藥貼tī粒á頂，真稀罕ê,並無半點膿，也無看著白頭。田仙講： 「Che是癭（eng）á，你ài khah忍耐淡薄，ài每三工來換膏藥，一直到看著膿頭走出來，chek出來了後才會好。」田仙是阮莊頭上蓋受尊重ê草藥醫，伊看過ê症頭bē算得chē ；所以雖然hit時升學ê壓力真大，補習、自習一大堆，總是去田仙hia換膏藥ê代誌，攏m̄敢chhìn-chhái馬馬虎虎。

就按呢，過了大約三禮拜外，hit粒ná紅豆á ê粒á，已經漲kah差不多有一粒柳丁ê大癭á｡天氣koh熱，功課也chē,猶koh ài細膩無beh hō͘人動著hit個疼ê所在，有時感覺真chhiah-ia̍h，也正正就是tī hit個上chhiah-ia̍h ê暗暝，田仙tī拍開膏藥，看我ê癭á ê時，雄雄puh一句：「膿頭看著lah，koh兩三工，大概就會發出來lah，khah細膩leh。」 然後，koh用酒精消毒，照常換一塊上大ê膏藥。兩工了後，洗身軀soah，突然感覺癭a2e5所在，癢癢溼溼，媽媽就隨時用酒精tī四邊消毒，然後，就將膏藥拆開，hit時陣，累積tī癭á內ê膿就慢慢á che̍k出來。Hit暗，chek出來ê膿，差不多有七分半碗頭á hiah chē，小弟小妹攏tī邊a看kah目睭青kìm-kìm;敏感ê二妹真m̄甘問我：「會疼bē?」因為，膿實在chē kah驚人。上稀罕ê是；經過hit段ê診療，我tī這個時陣，反倒轉，規身軀輕鬆起來，因為，我感覺我體內ê lah-sap 、毒素攏總透放出來，所以，bē疼，一點á to bē疼。顛倒，是tī接受治療，tī puh 膿頭ê hit段時間，真鬱悶，真chhiah-ia̍h，到chit-má為止，我若想著，就感慨無限，整個過程m̄免開刀、手術，而且以後無koh再發，kan-na tī 腹肚邊有一個細細ê疤。

最近，看著新政府就任，所遇著重重疊疊ê代誌，我突然覺悟，咱台灣，經過半世紀國民黨ê統治，是已經親像生了潛伏未發ê癭á，新政府tī治療貼膏藥，引出病源ê階段，常常受誤會，別人ê粒á兩三貼膏藥就好溜溜，你治chiah-ni̍h久，一定是醫術無高明，soah m̄知影，斬草ài斷根，治癭á ài引出膿頭，按呢，才會藥到病除，惡膿盡出， 規個身軀得著根本ê，永遠ê治療。