《台文通訊精選》

 | | | 轉寄

一間阿拉伯ê店

作者 清風 2007.08.12

Tī我khiā家ê巷á口，有一間雜貨店，是一kóa中東ê人teh經營。起頭，in接手ê時，是向白人買ê，所賣ê物件，kap一般超級市場所賣ê，並無啥物差別，牛奶、pháng、汽水、日用急須品，生理真冷淡。後來，看in開始24小時分三班營業，而且開始排列一kóa中東ê雜貨，米糧、菜蔬。我心內真正佩服in ê勇氣kap魄力，m̄-koh，心肝底常常為著in ê生理著急。這附近，真罕得看著中東ê顧客，in是beh賣hō͘啥人leh？我真罕得去買，kan-na有tang時欠糖、欠pháng、抑是牛奶才會去。M̄-koh，每遍去攏有看in teh改變，雖然無啥生理，顧店ê人攏是笑嘻嘻，細膩替人客包裝，態度也真誠懇，hō͘你感覺伊m̄是kan-taⁿ賣你物件nā-tiāⁿ，也關心伊ê物件品質。

上hō͘人oh理解ê，不管in生理按怎冷淡，架á頂ê貨色永遠齊全充足，店內店外ê環境也無馬虎，甚至常常有新意。Tī hit個一kóa少年人愛亂亂噴汽水、囤糞埽ê所在，in kā圍起來，起一個小小ê花園，優雅美麗，hit堆hō͘人頭痛ê糞埽，就按呢漸漸消失。Koh幾個月了後，店裡ê貨色也漸漸進入中東化，tī chia我thang看著直徑15吋ê圓圓薄餅kap ham我ê手骨平長ê長餅；各款各樣ê米；無仝色ê冰糖；五花十色ê豆類，奇形怪狀ê乾果；櫥á內底也排tīⁿ tīⁿ典型ê中東甜點；生理也愈來愈ka-ia̍h，每一擺koh欠啥物物件去買ê時，攏著ài排隊lah 。店員雖然有chhiàⁿ khah chē，總是服務ê態度攏真好。三月日前，連對面ê店也hō͘ in買落來，beh擴充khah大ah。

Tī替in歡喜ê當時，這個小小生理ê發展故事，hō͘我一個啟示，m̄知是啥物力量hō͘ in tī 起初hiah-nih冷淡ê生理中，猶原會tàng看著美麗ê遠景？是啥物信念hō͘ in，tī這個過去完全無屬tī in ê文化ê社區，會tàng預見著現在ê發展，無計較一切ê拍拚，最後創出一個屬in ê天地。

我真pháiⁿ用短短ê話句來形容這種ê精神。不過，我相信tī in ê心肝底，確實有一個ǹg望，就是因為這個ǹg望，in tùi完全m̄-bat有過ê生活歷煉中，照這個ǹg望，勤勤勞勞去做，m̄驚失敗，也m̄驚無伴。In ê心內有一pha燈，teh照頭前ê路，就按呢，向hit個目標一直前進。

前日，當我看著in歡歡喜喜將in囤kah規店ê貨，搬去對面ê新店，koh beh設立第二間店ê時，我心內非常感動。因為我知，這間店所經營ê m̄是kan-taⁿ中東稀罕ê雜貨nā-tiāⁿ，in所經營ê是人類最寶貴ê資產，就是tùi無生有ê信念。