《台文通訊精選》

| | | 轉寄

春天ê花

我tú tùi台灣過來,台灣chit-má是春天。陽明山規山ê花開kah足súi,我ê媽媽選tī這個日子來離開,相信是上帝替伊選ê日子,媽媽真親像春天。媽媽ê笑聲是春天ê溪水,chiah-ni̍h開朗、樂觀,hō͘人聽了真歡喜。媽媽ê歌聲是春天ê鳥á,規日teh唱,唱無停,唱kah真快樂。媽媽ê感情chiah-ni̍h豐富,不管是對人抑是做代誌,攏是用伊全心全意ê感情,親像春天ê花蕊,用in全部ê性命teh開花。

人講一個藝術家一定ài有豐富ê感情。媽媽就是一個藝術家,伊tùi台北第三高女畢業了後,就去日本東京體育音樂大學讀冊。伊tī大學四年內,非常拍拚。伊tùi m̄-bat摸過琴,學到會曉彈世界名曲。媽媽真愛跳舞,大姨mā講,媽媽ê國際標準舞有職業ê水準。伊上大ê天份是編舞劇。有時為著編舞劇,規日聽音樂,靈感一來,半暝peh起來,比看māi趕緊寫落來。媽媽編ê舞劇,真現代,有創意,有藝術ê眼光。

伊大學畢業了後,去京都ê女子學院做講師,後來轉來台灣,tī長榮女中教冊。Hit時長榮女中英國籍ê女校長,真欣賞媽媽,推薦伊去英國進修,因為阿媽保守反對才去無成。Tī長榮女中教冊hit段日子,媽媽有真chē好朋友。伊kap後來長榮中學ê校長劉子安先生,台大ê張采湘教授,koh一kóa當時ê少年人常常做伙peh山,in去peh幾nā擺玉山。Hit時ê玉山猶無路,in tō家己開路、peh山、hip相。轉來了後、家己設暗房,洗相片。In ê生活充滿文化kap藝術。

對一個愛藝術ê人,灶腳ê代誌tō真食力。媽媽bat對我講,伊做一個家庭主婦實在真無彩。爸爸對媽媽ê疼,媽媽mā真清楚。伊做一個主婦比別人koh khah拍拚。媽媽生阮ê時,因為年歲khah大,阮三個gín-á體質攏無好,媽媽chhōa阮比別人加倍辛苦,但是伊教阮真chē道理。細漢ê時爸爸不時出差,無tī厝,伊kā阮講,恁第一ài感謝ê是上帝,第二ài感謝是爸爸ê辛苦。因為按呢,結婚了後,我會曉體貼尊重我ê翁婿。媽媽kap我ê阿嬸、阿姑,感情攏真好,親像親姊妹。細漢阮認為是當然,大漢才知影beh做到chia真無簡單。

媽媽是有福氣ê人,伊上大ê福氣就是認bat上帝,也因為按呢,伊bē欣羨這個世界ê奢花。伊食bái,穿衫過日子攏真簡單。Tī新竹ê時,爸爸有參加扶輪社。Hit時伊kap許金德先生、嚴家淦先生,koh一kóa有名人士ê夫人,大家攏有鬥陣。Hit時陣新竹女中ê女校長曹金英女士bat講,tī chiah chē夫人內底m̄-bat掛珠寶ê,只有伊kap蕭局長夫人。媽媽無欣羨這個世界ê奢花,tī基督ê路,伊行了真歡喜。

媽媽第二大ê福氣是認bat咱多倫多教會ê兄弟姊妹。這段日子,不管透風落雪,不管路遠,恁攏不時去探訪伊,飼伊食飯,kā伊安慰,m̄驚麻煩。恁做tī我媽媽身軀頂ê,上帝攏會記念恁。媽媽帶著大家ê疼去上帝ê厝,伊會真平安。

我tī chia介紹我ê媽媽,我感覺我是一個真幸福ê gín-á。。