《台文通訊精選》

 | | | 轉寄

一生ê回想

作者 李劉鸞 2007.03.18

我tī 1904年出生tī台南市元月境街，我今年已經滿90歲，感謝上帝特別ê祝福kap照顧，hō͘我心神健康。

我ê阿爹是劉大粒，阿母葉巧，我九歲ê時老母去世，我是排行第三ê女兒。父母真早tō信主，是一個基督教ê家庭，我只有一個兄哥，細漢ê時kap小妹去太平境教會讀主日學，老師是高候清連，就是高俊明牧師ê母親。後來，我讀東門女學校，koh進入新樓女學校，就是現今ê長榮女中。我四年畢業後，就幫忙父親ê店務一直到媒人來提親。

Hit時我已經二十歲了，對方是一位讀台南師範第一屆ê畢業生，是屏東萬丹ê人李志傳。因為伊在學ê時成績優秀，所以留tī本校附屬公學校擔任教學。我ê父親疼愛女兒也有去探聽，媒人chia̍p-chia̍p來講，tùi年頭提到年尾，就成了。一方面志傳也去請問伊ê老師林茂生先生，伊ê老師kā伊贊成講：『這隻鹿á m̄-thang hō͘走去』，伊就安心了，按呢有緣就成婚，tī 1924年12月30日結婚。婚禮是萬丹教會ê高篤行牧師主持ê。

婚後，阮有真美滿ê家庭，志傳tī附屬任教六年滿，就去日本深造，讀東京帝國音樂學院。伊非常愛音樂koh有天份，畢業後，hō͘教授留tī本校做助教，然後昇做副教授，暑假ê時轉來台灣，chhōa阮母kiáⁿ去日本世田谷中原，tòa kúi-nā年。

在異地想起故鄉有年老ê母親需要有孝kap照顧，所以就回台，對hit時開始，tī屏東高等女學校教學，總共有十六年久，也昇做高等官，亦有做真chē曲。光復後，伊擔任屏東高女ê校長有三年久。然後去台北市政府擔任督學。Tī台北ê時，特別組織教師交響樂團，熱心教育。伊tī教育界五十外年ê貢獻，到65歲退休後，tī台北嶺頭台灣神學院擔任音樂主任。

阮攏總有四男六女。大kiáⁿ tī日本橫濱讀醫大，現在tī東京自由丘開業婦產科醫院，tī東京神教會事奉。二kiáⁿ tī台北一銀總行就職30外年，差不多beh退休了，現在tī台北仁愛教會。三kiáⁿ是日本福島讀醫大，現在tī福島開業外科、胃腸科醫院，也tī福島市基督教會做執事。五kiáⁿ tī多倫多SPAR公司就職20外年，現在tī多倫多基督徒之家事奉。大女兒以前tī台北和平國中教28年，現在已經退休tī 多倫多。二女以前tī屏東女中就職真chē年，現在tòa多倫多，tī聯合教會事奉。三女師大畢業後tī大同中學教音樂，現在tī美國印地安那州ê白人教會事奉。四女兒師大美術科畢業，tī台北市女中教美術，現在tī明尼蘇達雙城教會事奉。五女銘傳高商畢業，前在育達商業專科教銀行會計，現在tòa多倫多，tī聯合教聖歌隊。六女台灣大學醫學院畢業後，去美國羅鎮市，前在梅友醫院就職九年，現在夫婦tī查經班kap白人教會事奉。

Tī第二次世界戰爭ê時，物質欠缺，疏開去舊寮鄉下，我hō͘毒蛇咬tioh，生命危險，佳哉無死，感謝上主ê保護。我也勤種菜、果子、木瓜、kin-chio、han-chû等等攏有，當時是何等辛苦，但是總講一句，感謝上帝ê照顧阮攏平安。

阮注重kiáⁿ兒ê教育，tùi細漢來認bat主，大漢chhōa弟妹去hù主日學，有相疼，有規矩，因為主ê教示，勝過一切，阮心就平安，現今每家庭ê人攏khîn-tiâu tī主，che是上帝特別ê祝福kap恩典，阮感謝無盡。 Tī 18年前，我ê丈夫忽然心臟發作去世離開阮，我非常傷心，不知如何。但是一切攏是主ê旨意，我beh the̍h出勇氣，有主ê安慰。聖經教示咱，你若憂悶，著愛祈禱，你若歡喜，tio̍h-ài吟詩，萬事交託主，ài用誠實ê心，主會替咱開路。

這次聯合教會tùi 94年1月30日開始成人台文班kap羅馬字來學習台灣語言，特別請吳醫師tī百忙中，tùi漢米頓來指導大家。雖然我對羅馬字是本行，但是我beh率先做青年人ê榜樣，我也參加。咱應該熱心來學習，m̄-thang hō͘ bē記ti̍t咱ê母話，做一個台灣人bē-hiáu講台灣話，kiám-m̄是真làu-khùi，我簡單想起一點á來寫，多謝，大家平安。

註：本文原刊tī 1994年6月多倫多台灣同鄉會會刊「多城通訊」。李劉鸞女士是台灣民謠「咱台灣」作曲者李志傳先生ê夫人。伊對人親切溫柔，記持真好，是咱台灣人典型ê母親，tī多倫多真受大家ê敬疼，攏叫伊「阿母a」。