《台文通訊精選》

 | | | 轉寄

我ê故鄉--艋胛

作者 廖鴻業 2006.08.20

我ê故鄉--艋胛，是古早台灣第三大都市，第一大是台南府，第二是鹿港，第三就是艋胛。有一句話teh講：「一府、二鹿、三艋胛」就是這個意思。

二百五十外年前ê台灣北部，tùi福建來ê漢人移民，tī chit-má輔仁大學所在ê新莊市開墾定居，造成一個新ê村落，hia是當時北部台灣移民上chē ê所在，所以hō͘人稱做「新莊」。新莊ê漢人定定坐渡船過河來到現在成都路、貴陽街kap環河南路交叉附近ê河邊，hia是大嵙崁溪、新店溪kap淡水河交接ê所在，河闊水深，是一個理想ê河港。新莊ê漢人就稱呼hit個所在叫做「大港口」。

當時，台北縣三峽附近ê原住民，用獨木舟載一kóa山產(主要是蕃薯) ，划(kò) 船順溪落來岸邊，tī hia in就用蕃薯kap漢人交換布匹、鹽、番á火種種日常生活用品。

原住民ê獨木舟叫做「Bangka」，所以hia足chē獨木舟停靠ê所在，漢人就kā伊叫做[艋胛, bangka] ，因為原住民ê交易產品，主要是蕃薯，所以後來也有人稱呼hit個所在叫做「蕃薯市」。

我bat將這件代誌，講hō͘菲律賓ê朋友聽，in也證實in ê TAKALO話(菲律賓ê一種官方語言)稱呼獨木舟叫做「Bangka」。Tùi這點咱會使證明，三峽附近原住民ê祖先kap菲律賓ê住民有密切ê關係。

「艋胛」這兩字，是當時漢人移民所創造ê字。倒旁用舟表意，正旁用「孟」kap「甲」表音。這兩字音kap意兼顧，實在創造了真súi，hō͘咱定定記得古早先民開墾拓荒ê精神kap所面對ê困境，也不時提醒咱後代kiáⁿ孫，tio̍h-ài寶惜這tè土地。

但是日本á佔台以後，認為「艋胛」這兩字不雅，也pháiⁿ發音，所以就改名叫做「萬華」，若照日文發音是讀做「banka」。「ban」是日文ban-zai(萬歲)ê｢ban, 萬」，「ka」是「chu-ka-soba」(中華麵) ê「華, ka」。Che就是現在「萬華」地名ê由來。

阮「艋胛」人現在若看著「萬華」這兩字ê時陣，自然ê反應就讀做「bangka」，bē去讀「banhoa」。這款心理若親像樹根深深種tī阮ê心內。阮相信，有一日「艋胛」這兩字，會koh倒轉來正式使用，親像chit-má深深受污染ê淡水河，也有一日會河清水明仝款。