《台文通訊精選》

 | | | 轉寄

你去做兵

作者 李秀毓 2006.08.13

舊年ê九月初一 你去做兵
你去做兵 帶走了阮ê心
煩惱你猶原鐵齒ê脾氣
驚惶你無愛妥協ê堅持
夜夜來夢起 擔憂hit陣ê你

你去做兵 雖然是m̄甘mā是ài分開
長長ê頭鬃ài lu金金
破破ê牛á褲mā bē使穿
外表ê改變m̄是你願意 內心ê意志
Koh khah討厭輔á去干涉你

Kap咱理想無仝ê人 笑你gōng
連身軀邊鬥陣ê朋友 mā笑你khong
阮知影koh khah艱苦ê操練 你mā thú會落去
Koh khah無理ê要求 mā請你忍耐吞過去
你講你有家己ê堅持kap意志 卻
將你ê溫柔參目屎留阮孤單 掛念你

你tī深山ê軍營內底 khiā衛兵
阮tiàm繁華ê寂寞中 siàu念你
你去做兵阮陪你 所以
你tio̍h-ài細膩保護你家己

阮ê日曆 是為你活ê日子
阮ê日記 ta̍k工詳細為你記
日頭若落山 tō koh劃去了一日
一日一暝 一暝一日 只要koh劃去一個年
阮tio̍h會歡喜見著一個 真新ê你