《台文通訊精選》

 | | | 轉寄

人無照天理，天無照甲子（chí)

作者 許文政 2008.04.27

近幾年來常常有teh聽講全球氣溫升koân ê問題。因為人類使用能源以後所累積ê廢氣引起溫室效應，致使地球上氣溫不斷有升koân ê趨勢。氣溫不斷升koân會產生反常氣候現象。這款現象比如幾年前加拿大Ontario省kap Quebec省落冰雨成災，電力系統受著真大ê破壞，tī寒冷ê冬天停電規月日，受著chē chē ê不方便kap損失，這款災害tī加拿大是過去所m̄ bat tú著ê。最近台灣做桃芝風颱落大雨，水流kah崩山，半暝á大水kā民家流kah無看影，造成人間大悲劇。學者研究ê結果，認為氣溫升koân，khah會做風颱，雨量mā會khah大。

這擺風颱tī台灣造成嚴重災害ê主要原因，是大自然生態水土環境，受著破壞所致。經濟高度發展，大家固然會thàn錢，財富增加，人人好額。總是有一個好tō無二個好，若為著beh thàn khah chē錢，beh koh khah好額，tio̍h需要用koh khah chē資源、能源。無規劃節制，kan-taⁿ亂ku̍t、亂phut，深山林內也beh造公路開發，水土生態kap自然環境受破壞。人若無照天理，天tō無照甲子。天若無照甲子，氣象反常，人著會受天災地變ê嚴重災害。

無外久以前，tī台灣有一個86歲ê老人批評新政府講chit-má生理真pháiⁿ做，因為chit-má ê政府不如40年前ê政府。40年前ê政府是中國國民黨一黨專政，戒嚴專制，獨裁恐怖統治台灣ê時期。當時勞工受嚴重壓制，環保無受重視，黑金勾結，生理人若送紅包，啥物非法ê代誌mā會tàng做，汞污泥廢料會tàng隨便倒，隨時污染自然環境。國民黨mā利用各種黨營事業，利用特權kap民爭利，tī台灣累積數千億以上ê黨產。全世界無任何一個政黨親像國民黨hiah-nih有錢、好額。86歲á ê這個老人目睭pe̍h金所看ê是「錢」，頭殼所想ê是「錢」，心內只有是「貪」。為著自己ê利益講出無是非無天理ê話，時時刻刻tō是想beh koh khah好額，koh khah有錢。山崩水流，家破人亡是別人ê代誌。人按呢無照天理，天tō無beh照甲子。錢淹腳目是真好，水若淹厝頂tio̍h淒慘chē kòa叫苦連天。

人ê生活中需要各種物質來滿足chē chē ê慾望，但無必要過著奢華thó-chè ê生活。人mā tio̍h心靈豐盛，來憐憫疼惜自然萬物，飛禽走獸，樹木花草，會曉欣賞感觸四季ê變化，大自然ê秩序kap規律。時時tī感謝o-ló中感受知足ê喜樂kap心靈ê平安。