《台文通訊精選》

 | | | 轉寄

生日快樂

作者 阿秀 2008.03.30

時間過真緊，我ê gín-á Austin今年7月tō beh滿十歲ah！10冬前，伊比預定ê日子提早6禮拜出世，有6磅重。對早產ê gín-á來講無算輕，但是照規定伊mā tī保溫箱khǹg一暝一日才抱出來，m̄-kú隨koh發現有黃疸，抱去另外一間房間照紫外線，tī病院足足tòa一禮拜才抱轉來厝。也因為伊ê提早報到，真chē物件攏無準備好，car seat mā猶未買，真是腳亂手亂。我kā洗身軀，看伊小小瘦瘦，心內想ài等外久，伊才會大漢？

Austin細漢真乖，伊真愛mo͘h teh睏，親像一隻phòng鼠腳chhng翹翹，一日會tàng睏16點鐘。真罕得háu。伊ê爸爸講咱ná會生一個gín-á，連háu tō貧惰。後來伊漸漸大漢，一歲外我開始chhōa伊去圖書館借冊轉來看，gín-á冊有真chē真súi ê插圖，真古錐，雖然是英文冊，我攏用咱ê母語--台灣話講hō͘伊聽，tùi聽故事開始，伊學ê台灣話愈學愈chē，bat ê世界mā愈來愈闊。有時大人無閒，伊會tàng家己留tī房間chhit-thô､看冊幾nā點鐘，bē來吵人。朋友攏講伊真乖，但是阮漸漸發覺伊走bē緊，跳bē koân，運動神經m̄是真發達。有同鄉ê老大人kā阮講：「恁這個gín-á nái chiah黃酸，ài chhōa去ho͘醫生看」。

我想伊只是kap伊ê媽媽仝款，無愛運動。五歲ê時，有一日我kā問：「Austin，媽媽送你去學siû水，敢好？」

「O͘h！m̄-好，水會走入去我ê目睭。」

「Ah無，媽媽送你去學溜冰？」

「O͘h！m̄-好，我會tī冰ê頂面poa̍h一倒。」

「Ah無，媽媽送你去拍球？」

「O͘h！bē使，球會kòng著我ê頭。」

一目nih，Austin已經beh十歲ah！每禮拜阮仝款去圖書館，伊tī電腦頭前坐落，家己chhōe伊beh看ê冊kap資料，伊看冊ê速度kap範圍，我已經tòe伊bē著。有時小妹借轉來ê gín-á冊，我mā聽伊用台灣話講hō͘小妹聽。

細漢講伊黃酸ê o͘-bah-sán，chit-má講：「恁Austin nái chiah大kho͘，ài開始減肥囉！」

伊會曉siû水，會曉溜冰，mā tī社區ê野球隊拍球，10冬hō͘一個gín-á成長大漢。

台文通訊今年七月mā beh滿十歲ah！雖然我無看過伊ê創刊號，但是我相信伊mā是tī大家ê期待，帶一點á生疏，帶一點á辛苦來出世。這十冬來伊tùi一個需要人照顧ê baby，到學行，到成長大漢，一路行來實在無簡單。Tùi洛杉磯到紐約，tùi夏威夷到多倫多，是真chē人ê參與、出錢、出力，用疼心來照顧，才有今á日ê「台文通訊」。

我第一擺讀著「台文通訊」是tī 94年，讀ê第一篇文章是蕭平治先生寫ê。阿爸ê鹿角Hun-chhoe」。Hit時陣，吳醫師每禮拜tùi Hamilton來教阮台文。伊講阮是台語文ê幼稚生，後來多倫多成立「台文通訊讀者聯誼會」，每個月聚會，除了學羅馬拼音、文章欣賞，老師mā鼓勵阮寫文章，伊講文章若寫了好，會tàng送hō͘「台文通訊」。我心內想che是無可能ê代誌，落第生已經讀bē會，ná有可能寫文章。無想到，今á日我不但用台文來寫文章，mā參與「台文通訊」ê編輯khang-khòe。

「台文通訊」是台文刊物ê先鋒（pioneer），tī台文ê園地扮演iā種ê角色。這幾年來，咱看著台灣有chē chē ê台文刊物，親像雨水ak過ê春筍，一直puh芽，tī台文ê網路頂面mā讀著真chē少年一代ê台文詩，台灣人ê語言文化漸漸teh成形。「台文通訊」tī這波本土文化運動中，已經留落伊美麗ê腳跡。

Austin細漢，每一冬我攏照白人ê習慣，kā辦Birthday party，邀請伊ê小朋友來厝裡chhit-thô，有雞卵糕，有蠟燭，有禮物。舊年我kā講：「Austin，你已經大漢，ài學會曉安安靜靜過生日。」伊mā講好，但是前二日，伊走來講今年是伊十歲ê生日，十歲真特別，伊敢會tàng koh有一個Birthday party？

是ah！十冬行來無容易，十歲是一個階段，tī chia寫這篇文章，送hō͘ Austin，也送hō͘台文通訊，生日快樂！