《《台灣青年》精選台譯》

 | | | 轉寄

"Tâi-oân Chheng-liân" Tē-it koàn tē-sì hō Hoat-khan-sû/《台灣青年》第一卷第四號 發刊詞

作者 編輯部, 台譯：Lîm Chùn-io̍k 2020.05.17

Kiông-chiá pēng bô it-tēng éng-oán sī kiông-chiá, jio̍k-chiá mā éng-oán bô it-tēng eng-kai éng-oán sī jio̍k-chiá. Chóng-.sī, kiông-chiá oá-khò ka-kī ê kiông-sè lâi théng-kiông, chiū án-ne chiâⁿ-chò piàn jio̍k ê in-sò͘, á jio̍k-chiá tī put-hēng ê chōng-hóng hā hùn-hoat tô͘-kiông, it-ti̍t ló͘-le̍k phah-piàⁿ, chiū án-ne chiâⁿ-chò piàn kiông-chiá ê kàⁿ-bó. Le̍k-sú siōng chit khóan ê lē kóng bē-liáu, chiáng-ak la̍k kok pà-kôan ê kiông Chîn ê bia̍t-bông, phō thóng-it sè-kài bāng-sióng ê Lô-má ê chiong-kiat, bat khòng-chè tang-hong bō͘-e̍k ê Hô-lân ê soe-lo̍h, chi̍t sî chiàm-niá tōa-phìⁿ léng-thó͘ ê Spanish ê sit-pāi téng-téng. Koh khah bián-kóng tong-kim Au-chiu tōa kiông kok ê kun-kok chú-gī pún-chun ê Tek-kok pāi-chiàn, kám m̄-sī kiông-chiá m̄-sī éng-oán kiông-chiá ê lē? Koh ū pī Ngô͘, Phó͘, Ò saⁿ kok hun-koah ê Pho-lân, hō͘ Austria cheng-ho̍k ê Czech kah Slovakia, chit-má lóng í-keng kiàn-li̍p to̍k-li̍p ê kok-ka, Lō͘-se-a tè-kok pī thui-hoan soah kiàn-li̍p lô-kang lông-bîn chèng-hú, Boán-chheng tè-kok bia̍t-bông soah piàn-sêng Hàn cho̍k sè-le̍k ê ho̍k-heng, lóng sī chhian-sin bān-khó͘ ê jio̍k-chiá piàn-sêng kiông-chiá ê hó koh sek-tòng ê lē. Τī kok-chè kan, bîn-cho̍k kan í-ki̍p siā-hōe kah kò-jîn chi kan, mā lóng sī án-ne.

Tī chia kiau-ngō͘ kóng sī só͘-ūi ê sè-kài kiông-chiá, tio̍h hó-hó-á kàu-io̍k kah chí-tō jio̍k-chiá, lâi siu-sêng jîn-tō chèng-gī ê hó kóe-chí, kian-kiông jio̍k-chiá sái khioh-ka̍k ê sim-lêng, hō͘ in ē-tàng kám-kek hùn-hoat, tui-kiû kái-chō kéng-gū ê hēng-hok, án-ne chiah ē-tàng chin-chiàⁿ chhiau-oa̍t iu-loa̍t kiông-jio̍k, si̍t-hiān lí-sióng ê chèng-gī, jîn-tō chú-gī kah chū-iû hô-pêng, m̄-koh put-hēng ê sī tī jîn-lūi siā-hōe ê le̍k-sú siōng, lī-kí pâi-tha chú-gī chin chiong-hián, tī kiông-chiá siū-tio̍h jio̍k-chiá ê hóan-kek chiah bián-kióng lâi hóe-kái, á tī jio̍k-chiá piàn-sêng kiông-chiá ê sî, tōa-pō͘-hūn chiū án-ne bē kì-tit kòe-khì ê khó͘-kéng. Só͘-í ūn-miā ê miā-ūn sī chi̍t sî sēng chi̍t sî soe, bûn-hòa mā chi̍t sî khí chi̍t sî lo̍h; le̍k-sú ê sûn-khoân, tang-sai lóng kāng-khóan, kó͘-kim bô siáⁿ-mi̍h bô kāng. Só͘-í tī kok-chè kan tiāⁿ-tiāⁿ hoat-seng kiông-jio̍k chiàn-cheng, chióng-cho̍k chi kan chóng-.sī ē hoat-seng iu-sèng loa̍t-pāi, jî-chhiáⁿ tī siā-hōe lāi-pō͘ tiāⁿ-tiāⁿ ū kai-kip cheng-tàu, kò-jîn hō͘-siong chi kan ê seng-chûn kēng-cheng bô chí-kéng. Ngh, lán só͘-ūi ê sè-kài kiông-chiá kám thang bô sàm-su?! Jio̍k-chiá kám thang bô hó-hó-á hóan-séng?!

強者並無一定永遠是強者，弱者mā永遠無一定應該永遠是弱者。總是，強者óa靠ka-kī ê強勢來逞強，就án-ne成做變弱ê因素，á弱者tī不幸ê狀況下奮發圖強，一直努力phah拚，就án-ne成做變強者ê酵母。歷史上chit款ê例講bē-liáu：掌握六國霸權ê強秦ê滅亡，抱統一世界夢想ê羅馬ê終結，bat控制東方貿易ê荷蘭ê衰落，一時佔領大片領土ê西班牙ê失敗等等。Koh khah免講當今歐洲大強國ê軍國主義本尊ê德國敗戰，kám m̄是強者m̄是永遠強者ê例？Koh有被俄、普、奧三國分割ê波蘭，hō͘ 奧地利征服ê捷克kah斯洛伐克，chit-má lóng已經建立獨立ê國家，露西亞帝國被推翻soah建立勞工農民政府，滿清帝國滅亡soah變成漢族勢力ê復興，lóng是千辛萬苦ê弱者變成強者ê好koh適當ê例。Τī國際間、民族間以及社會kah個人之間，mā lóng是án-ne。 Tī chia驕傲講是所謂ê世界強者，tio̍h好好á教育kah指導弱者，來收成人道正義ê好果chí，堅強弱者使khioh-ka̍k ê心靈，hō͘ in ē-tàng感激奮發，追求改造境遇ê幸福，án-ne chiah ē-tàng真正超越優劣強弱，實現理想ê正義、人道主義kah自由和平，m̄-koh 不幸ê是tī人類社會ê歷史上，利己排他主義真彰顯，tī強者受tio̍h弱者ê反擊chiah勉強來悔改，á tī弱者變成強者ê時，大部分就án-ne bē記得過去ê苦境。所以運命ê命運是一時盛一時衰，文化mā一時起一時落；歷史ê循環，東西lóng仝款，古今無啥物無仝。所以tī國際間tiāⁿ-tiāⁿ發生強弱戰爭，種族之間總是ē發生優勝劣敗，而且tī社會內部tiāⁿ-tiāⁿ有階級爭鬥，個人互相之間ê生存競爭無止境。Ngh，咱所謂ê世界強者kám thang無三思？！弱者kám thang無好好á反省？！