《台語荒漠甘泉（全羅版）》

 | | | 轉寄

"An-ùi lâng ê lâng"

作者 陳清俊 翻譯 2006.12.10

listen




Cha̍p-jī ge̍h cha̍p ji̍t

"Goán he̍k-sī siū hoān-lān, sī beh chòe lín siū an-ùi kap tit kiù ê lō͘-ēng; he̍k-sī siū an-ùi, sī beh chòe siū an-ùi ê lō͘-ēng; chit ê an-ùi hō͘ lín ōe thun-lún kan-khó͘, chiàu goán só͘ tú-tio̍h ê chi̍t-iūⁿ. Koh goán só͘ thòe lín ǹg-bāng ê sī kian-kò͘, in-ūi chai lín kì-jiân ū hūn tī chiah ê kan-khó͘, chiū ū hūn tī an-ùi, iā sī án-ni." (Ṳ Ko-lîm-to 1:6-7)

Lí ê pêng-iú tiong sī-m̄-sī ū chit khoán ê lâng, tng lí tú-tio̍h khùn-lân, siong-sim ê sî, ōe chhē in kóng-ōe, thiaⁿ in ê kiàn-gī. In só͘ kóng, só͘ thê lóng chin sek-tòng, ná chhin-chhiūⁿ lí só͘ su-iàu ê chi̍t-iūⁿ. Nā-sī ū, lí khó-lêng bô thé-hōe tio̍h, in chit chióng ōe i-tī siong-sim, chhit-khì ba̍k-sái ê châi-lêng sī bô iông-ī tit-lâi, ài hù chin tōa ê tāi-kè. Lí nā tiâu-cha chi̍t ē in ê kè-khì, lí beh hoat-kiàn in só͘ siū ê khó͘-lān pí jīm-hô lâng khah chōe.

In khòaⁿ-kìⁿ sìⁿ-miā ê teng bān-bān hoa khì, in khòaⁿ kè hí-lo̍k ê kim-óaⁿ tī in ê kha ē kòng-phòa, óaⁿ nih ê mi̍h phùn kàu chi̍t sì-kòe. In keng-le̍k kè tōa hong-lōng, pháiⁿ siu-sêng, chiàⁿ tiong-tàu tōa o͘-àm, tān-sī chiah ê lóng sī pit-iàu ê, pang-chān in thang chòe kái-thoat lâng thòng-khó͘ ê hō͘-sū, i-seng kap bo̍k-su.

Chng-móa tang-hong phang-liāu ê siuⁿ-á, ūn-poaⁿ lâi sī chin hùi-khì, koh chin bān. Chóng-sī in chi̍t ē kàu, khong-khì tiong chiū ū bí-biāu ê phang-bī. Siâng-khoán khó͘-thàng chin oh jím-siū, chóng-sī tī lāi-bīn sī ún-chông hùn-liān, tì-sek, kap bû-kiông ê ǹg-bāng. Kî-tiong múi chi̍t hāng mi̍h, m̄-nā hō͘ lán le̍k-liōng, iā hō͘ lán sêng-se̍k, koh hō͘ lán ū châi-lêng pang-chān pa̍t-lâng. Bo̍h-tit hoân-ló, bo̍h-tit kā-gê chhiat-khí, chí-iàu khut-kiông kian-koat thèng-hāu khó͘-lān kè-khì. Ōaⁿ-ōe kóng, ài koat-sim chiàu Siōng-tè ê chí-ì, ūi tio̍h lí kap lí chiu-ûi ê lâng, chīn-liōng tùi khó͘-lān tiong tit lī-ek.

Thiaⁿ-tio̍h tiⁿ-bi̍t ê koa-si,
Chhiong-móa tī chá-khí-sî,
Koa-siaⁿ hô-téng ê súi koh iù,
Ná un-jiû kî-tó ê khún-kiû.
Góa chhiau-chhē chhiùⁿ-koa ê goân-liāu,
Bí-biāu siaⁿ ê goân-tiāu,
Chhē-tio̍h chi̍t chiah siū-siong ê chiáu,
Hō͘ bû-chêng ê chhì-á chha̍k tiâu-tiâu.

Góa khòaⁿ-kìⁿ chi̍t ê iu-siong ê lêng,
I thòng-khó͘ ê si̍t kńg kiu chēng-chēng,
Hoat-chhut hi-bāng, hoaⁿ-hí kap khoài-lo̍k
Chiok-hok chit ê lâu ba̍k-sái ê soaⁿ-kok;
Góa chai sìⁿ-miā ê kam-tiⁿ,
Sī tùi thòng-khó͘ kap siong-pi lâi siⁿ,
Siū táⁿ-kek ê lêng gîm-si,
I ê sim chha̍k tī chhì-á nih.

Ū thiàⁿ lí ê chi̍t ê jîn-sū,
Sī hit-ê siū-tèng tī si̍p-jī-kè ê Kiù-chú,
Thih-teng tèng thàu kha-chhiú pe̍h,
Chhiuⁿ iā chha̍k kè i hia̍p-ē,
Bô chêng châm-jím piⁿ sut kè,
Kiù-chú koh jím-siū lóe-mē,
I ūi lí ê kiù-sio̍k tèng si̍p-jī-kè,
I ê thâu-hia̍h chha̍k tī chhì-á té.

Lí siū-khó͘ bōe pôaⁿ kè Chú só͘ lim,
Lí kiám ōe hoat chhut tiⁿ-bi̍t ê siaⁿ-im?
I ê un-tián kàu-gia̍h lí ēng,
Tng lí ê sim siū thòng-khó͘ só͘ tèng,
Lí goān-ì chiok-hok I só͘ thiàⁿ ê sim-lêng,
Tùi lí siū siong kap thiah-chhùi ê jîn-seng.
Chhin-chhiūⁿ hit chiah chhiùⁿ koa ê chiáu,
I ê sim hō͘ chhì-á chha̍k tiâu-tiâu?

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com.tw