《台語荒漠甘泉（全羅版）》

 | | | 轉寄

Khó͘-lān tiong ū pêng-an

作者 陳清俊 翻譯 2006.12.03

listen


Cha̍p-jī ge̍h saⁿ ji̍t

"Lí pêng-an mah? lí ê tiōng-hu pêng-an mah? gín-ná pêng-an mah? I kóng, Pêng-an." (Ṳ Lia̍t-ông-kì 4:26)

Góa ê lêng! Tio̍h kian-kiông khí-lâi!
Só͘ thiàⁿ ê lâng kiâⁿ-ji̍p tiùⁿ-ûi lāi,
Lí ê Siōng-tè án-ni an-pâi.
Tio̍h kian-kiông khí-lâi!

Góa ê lêng! Tio̍h kian-kiông khiā-teh!
Sí-bông chāi bōng. Thiaⁿ lí ê Siōng-tè,
Khòaⁿ ah, I beh chhōa lí an-jiân keng-kè.
Tio̍h kian-kiông khiā-teh!

Góa ê thài-thài kap góa seng-oa̍h la̍k-cha̍p-jī nî koh gō͘ ge̍h-ji̍t kú, hiān-chāi góa káu-cha̍p-jī hè, i seng lī-khui góa khì. Tng góa tī pâng-keng kiâⁿ-lâi kiâⁿ-khì ê sî, góa ǹg éng-oa̍h ê Iâ-so͘ kóng, "Chú Iâ-so͘, chí chhun góa chi̍t lâng, tān-sī góa bô ko͘-toaⁿ, in-ūi Lí kap góa tòa, koh sī góa ê pêng-iú. Chú ah, chhiáⁿ an-ùi góa, hō͘ góa le̍k-liōng, chiong Lí jīm-ûi góa su-iàu ê mi̍h sù hō͘ Lí khó-lîn ê lô͘-po̍k."

Lán ê sim bô boán-chiok, tû-hui lán ta̍t-kàu chit ê tē-pō͘, chai Chú Iâ-so͘ sī lán éng-oán, éng-oa̍h ê pêng-iú, I put-toān tī ta̍k ê chêng-hêng ē, sûi-sî chún-pī chèng-bêng I pún-sin sī lán ê pêng-iú. --- George Mueller

Khó͘-lān bōe siong-tio̍h lán, tng lán ēng un-jiû lâi tùi-hù.

Chhiū-téng ê peng-seh kā chhiū-ki teh kàu beh tn̄g-khì chi̍t-iūⁿ. Siâng-khoán, góa khòaⁿ-kìⁿ chin chōe lâng teh tī khó͘-lān ê tiong-kan. Chóng-sī góa iā siông-siông khòaⁿ-tio̍h lâng tī khó͘-lān tiong chhiùⁿ-koa, hit-sî góa ūi in ūi góa lâi kám-siā Siōng-tè. Bô ū sím-mi̍h koa-siaⁿ ōe pí tī àm-mî chhiùⁿ khah hó thiaⁿ. Ū chi̍t ê hū-jîn ê kò͘-sū, i ê to̍k-siⁿ ê kiáⁿ sí, i giâ-ba̍k ǹg-thiⁿ, ū thiⁿ-sài ê bīn hiòng i kóng, "Góa ê kiaⁿ ah, góa chiong hí-lo̍k hō͘ lí." Chit kù kán-tan ê ōe, siông-siông tī góa ê sim kó͘-lē góa, an-ùi góa. --- Henry Ward Beecher

Sí bô hō͘ góa ê lêng iu-siong, siong-hāi,
Sí bōe éng-oán pun-lī só͘-chāi,
Kiám m̄-chai, mûi-kùi hoe pôaⁿ-kè chhiûⁿ tī hit pêng khai,
Sí khak-si̍t sī ún-chông, m̄-sī éng-oán keh-kài.
Lí tī Ki-tok ê lēng-gōa sè-kài,
Lí kap Ki-tok tông-chāi, Ki-tok kap góa tông-chāi;
Lán liân-ha̍p chòe chi̍t-thé tī Ki-tok lāi.

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com.tw