《台語荒漠甘泉（全羅版）》

 | | | 轉寄

"Sìn-sim"

作者 陳清俊 翻譯 2011.03.06

listen


Saⁿ ge̍h chhoe la̍k (Saⁿ ge̍h la̍k ji̍t)

“Nā-sī goán pêng-sò͘ teh ǹg-bāng ê, chiū-sī hit-ê beh sio̍k-hôe Í-sek-lia̍t ê;” (Lō͘-ka 24:21)

Che sī tī khì Í-má-ngó͘ ê lō͘-tiong, nn̄g ê ha̍k-seng kap Iâ-so͘ tâng kiâⁿ ê sî, só͘ kóng ê ōe. Góa ūi-tio̍h in lâi iu-siong, in-ūi in bô kóng chhut “goán iáu teh ǹg-bāng”, in kan-taⁿ kóng “goán pêng-sò͘ teh ǹg-bāng” piáu-sī in í-chêng ū ǹg-bāng, hiān-chāi chiū bô-khì lah, Iâ-so͘ í-keng siū tèng-sí tī si̍p-jī-kè lah. Ǹg-bāng sit-khì lah. In ê sim í-keng chhùi-khì lah. In khiok m̄-chai kap in saⁿ tâng-kiâⁿ ê, chiū-sī Iâ-so͘ pún-sin, sī in só͘ ǹg-bāng ê, sī oa̍h-oa̍h teh kap in kóng-ōe. Góa chin ǹg-bāng in ōe kóng-chhut, sui-jiân sū-chêng hoat-seng, sī kap in só͘ ǹg-bāng ê, sio tùi-hoán, in bô beh hòng-khì, ū sìn-sim, it-tēng iáu ōe tú-tio̍h I (Iâ-so͘), chiàu I í-chêng só͘ tùi in kóng ê ōe. Bo̍k-koài Iâ-so͘ tùi in kóng “Bû-ti ê lâng ah, sian-ti só͘ kóng it-chhè ê ōe, lín ê sim cháiⁿ-iūⁿ hiah-oh sìn ah!” (Lō͘-ka 24:25)

Hoán-tò-tńg lâi siūⁿ lán pún-sin, lán sī-m̄-sī iā ōe chhin-chhiūⁿ in kóng m̄-tio̍h ê ōe. Lán ê sin-piⁿ it-chhè ê mi̍h-kiāⁿ thang sit-khì, bô khì, chóng-sī m̄-thang kóng-ōe sit-khì sìn-sim, soah sit-lo̍h Siōng-tè ê chin-lí kap thiàⁿ-thàng. Hi-bāng lán bô chhin-chhiūⁿ chit nn̄g ê ha̍k-seng só͘ kóng, “goán pún-lâi siong-sìn, ǹg-bāng” á-sī “goán bat siong-sìn, bat ǹg-bāng”, lán beh án-ni kóng, “goán hiān-chāi iā siong-sìn, iā ǹg-bāng”, kap “goán éng-éng-oán-oán teh siong-sìn, teh ǹg-bāng.”

Joa̍h-thiⁿ un-loán iū kong-hui,
Tōa-chhiū sòe-ki hoe-lúi khui,
Kìⁿ-tio̍h móa-móa-sī mûi-kùi,
Góa siong-sìn Chú tōa un-hūi.

Tang-thiⁿ mûi-kùi-hoe bô-khì,
Hân-léng hong-hûn phiàn móa thiⁿ,
Bô koh ióng-kám siong-sìn I,
Sìn-sim hô-téng sòe, hi-bî.
--- Tang hong tiong ê chiáu-á koa


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org