《台語荒漠甘泉（全羅版）》

 | | | 轉寄

"Kî-tó siū chó͘-tòng"

作者 陳清俊 翻譯 2010.05.16

listen


Gō͘ ge̍h cha̍p-la̍k (Gō͘ ge̍h cha̍p-la̍k ji̍t)


"Tān-í-lí ah, m̄-bián kiaⁿ; in-ūi tùi lí thâu-chi̍t-ji̍t choan-sim ài bêng-pe̍k, koh ka-kī khiam-pi tī lí Siōng-tè ê bīn-chêng ê sî, lí ê ōe í-keng tit-tio̍h thiaⁿ-kìⁿ; koh góa in-ūi lí ê ōe chiah lâi. Nā-sī Pho-su kok ê jîn-kun chó͘-tòng góa jī-cha̍p-it ji̍t." (Tān-í-lí 10:12-13)

Chit tōaⁿ ê keng-bûn sī chin kî-biāu ê kî-tó kà-sī. Kóng chhut Sat-tàn ōe ti̍t-chiap chó͘-tòng lán ê seng-oa̍h. Tān-í-lí kìm-chia̍h kî-tó jī-cha̍p-it ji̍t. Chiàu sèng-keng ê kì-chài, hoat-seng khùn-lân ê goân-in m̄-sī in-ūi Tān-í-lí ê bô hó, iā m̄-sī i ê kî-tó bô sek-tòng, sī chhut-tī Sat-tàn te̍k-pia̍t ê kong-kek.

Chú í-keng phài thiⁿ-sài kā Tān-í-lí kóng, lí chi̍t khai-sí kî-tó, Siōng-tè chiū tap-èng lí ê kî-tó, chóng-sī tī lō͘-tiong, hó-ê thiⁿ-sài siū pháiⁿ-ê thiⁿ-sài chó͘-tòng, saⁿ-ián iân-chhiân sî-kan. Che sī thiⁿ-téng ê chhiong-thu̍t. Tān-í-lí thòng-khó͘ kî-tó ê sî, i tī tē-chiūⁿ iā keng-giām tio̍h siâng-khoán sèng-chit ê chó͘-tòng kap chhiong-thu̍t.

"In-ūi lán ê kau-chiàn m̄ sī tí-te̍k hiat-khì ê, chiū-sī tí-te̍k chiah ê pān chèng-sū ê, chiah ê chiáng-koân ê, kap chit ê àm sè chiah ê kun-ông, í-ki̍p thiⁿ-tiong pháiⁿ- ê sîn-lūi." (Í-hut-só͘ 6:12) Sat-tàn ê kong-kek kap cheng-chiàn, hō͘ kî-tó iân-tiông saⁿ lé-pài ê sî-kan chiah tit-tio̍h hôe-tap. Tān-í-lí chha-put-to beh sit-pāi lah, Sat-tàn ài beh kā i thâi sí, tong-jiân, Siōng-tè bô iông-ún sū ê hoat-seng sī Tān-í-lí só͘ bōe thang jím-siū ê. (chham-khó I Ko-lîm-to 10:13)

Sìn-tô͘ chin-chōe kî-tó siū Sat-tàn ê chó͘-tòng. Tān-sī lí bián kiaⁿ bô hôe-tap ê kî-tó tún kàu chi̍t tōa tui, bô-kú, tap-hok beh chhin-chhiūⁿ tōa-chúi kín-kín kàu. Chit sî, Siōng-tè ê hôe-tap m̄-nā kín-kín kàu, I sin ê chiok-hok iā tàu-tīn kàu. --- tùi chi̍t phiⁿ káng-tō chi̍p

Tē-ge̍k tùi Siōng-tè ê sèng-tô͘ siōng ló͘-le̍k teh chòe kang, ài khiú in ji̍p-khì. Lú ū kè-ta̍t ê lêng-hûn, lú siū khah tōa ê ap-le̍k, khah tōa ê jia̍t, chóng-sī thiⁿ-téng ê Chú bōe pàng-sat in. --- William L. Watkinson


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com