《台語荒漠甘泉（全羅版）》

 | | | 轉寄

"Koaiⁿ-mn̂g, khui-mn̂g "

作者 陳清俊 翻譯 2010.01.10

listen


Chiaⁿ ge̍h chhoe-cha̍p (It ge̍h cha̍p ji̍t)


"in-ūi Sèng Sîn bat kìm in thoân tō-lí tī A-se-a," (Sù-tô͘ hēng-toān 16:6)


Che sī chin chhù-bī ê sū, chá-kî, Siōng-tè án-chóaⁿ tài-niá chá-sî thoân si̍p-jī-kè hok-im ê sù-chiá. Hong-hoat sī kìm-chí in khì, in siūⁿ beh khì tān-sī put-eng-kai khì ê só͘-chāi. Pó-lô siūⁿ beh khì A-se-a thoân hok-im, Sèng-lêng kìm-chí in khì; in koh siūⁿ beh khì Sió A-se-a ê Pì-chhui-nî, I iā kìm-chí in. Sui-jiân chòe-āu Pó-lô tī boán-nî, tī A-se-a, só͘ kìm ê siâⁿ-chhī, ū chòe siōng úi-tāi ê pò͘-tō sū-kang, tān-sī hiān-chú-sî, Sèng-lêng khiok bô ín-chún in khì, chiong mn̂g koaiⁿ khí-lâi, in-ūi sî iáu bōe kàu. Tùi Sat-tàn só͘ hông-siú kian-kiông ê só͘-chāi chìn-kong, pit-su seng hō͘ A-pho-lô chòe ki-chân ê kang-chok. Chit-sî Pa̍t ê só͘-chāi su-iàu Pó-lô kap Pa-na-pa. In iā su-iàu khah chōe ê chhau-liān, chiah hū ōe khí khah tōa ê chek-jīm.

Chhin-ài ê pêng-iú, lí nā m̄-chai beh kiâⁿ ê hong-hiòng, chiū eng-kai kau hō͘ Sèng-lêng koat-tēng. I beh koaiⁿ só͘ ū ê mn̂g, chhun só͘ eng-kai kiâⁿ hit ê mn̂g khui. Lí thang tùi I kóng, “Sèng-lêng ah, góa sìn-jīm Lí chiong bô ha̍h tī Siōng-tè chí-ì ê mn̂g koaiⁿ khí-lâi, hō͘ góa sūn-thàn Lí ê chí-hui, ōe thiaⁿ tio̍h Lí ê siaⁿ kóng, ‘hiòng chó, hiòng iū’.” (Sin-bēng-kì 5:32)

Chit-sî, lí eng-kai kè-sio̍k lí ê lō͘-thêng, kian-siú Siōng-tè ê ho͘-tiàu, nā bô Siōng-tè chheng-chhó ê chí-sī, m̄ thang kái-piàn. Thiⁿ-lō͘ ê lú-kheh ah, Iâ-so͘ ê lêng án-chóaⁿ tùi-thāi Pó-lô, iā beh án-ni chí-sī lí. Lán ài sió-sim thiaⁿ sòe-sòe ê chí-sī á-sī kéng-kò. Sìn-sim ê kî-tó, nā bô chó͘-tòng, chiū hòng-sim khì kiâⁿ. Bô tit kî-koài, ū-sî lí tú-tú beh ta̍h chhut, mn̂g soah koaiⁿ khí-lâi, hiòng chó, hiòng iū ê mn̂g lóng koaiⁿ khí-lâi, khiok sī beh ín-chhōa lí khì Te̍k-lô-a tōa-lō͘ ê mn̂g tōa-khui. Tī hia ū tâng-kang Lō͘-ka teh tán lí. Īⁿ-siōng ōe chí-sī tó chi̍t só͘-chāi ū ki-hōe, ū tiong-sim ê pêng-iú teh tán lí. --- F.B. Meyer



Jîn-seng tú-tio̍h būn-tê ê sî,
Chiân-tô͘ bû-ti ia̍h sîn-pì,
Siōng-tè hián-bêng hō͘ lí khòaⁿ-kìⁿ,
I ū só-sî.

Lâng khòaⁿ hó sî-kî,
Siōng-tè khiok koaiⁿ i,
Sìn-jīm thèng-hāu I,
I ū só-sî.

Khiân-sêng kî-tó bô kah-ì,
Á-sī bô hôe teh iân-tî,
Siōng-tè chiām-chiām hián-bêng I chí-ì,
I ū só-sî.

Nāi-sim ê Siōng-tè sī choân-lêng, choân-tì,
Nāi-sim thèng-hāu, I bōe iân-tî,
Lí beh kiâⁿ-ji̍p ê mn̂g-sìⁿ,
I ū só-sî.

Thò-tòng an-ùi, kam-tiⁿ iū hok-khì,
I ū múi ê mn̂g ê só-sî,
Tī siōng sek-tòng ê sî,
Beh kau hō͘ lí.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com