《台語荒漠甘泉（全羅版）》

 | | | 轉寄

“Siōng-tè teh chiàu-kò͘ lí”

作者 陳清俊 翻譯 2010.01.03

listen



Chiaⁿ ge̍h chhoe saⁿ. (It ge̍h saⁿ ji̍t)


“Góa beh chiàu tī góa bīn-chêng kui-kûn cheng-siⁿ ê le̍k-liōng, ia̍h chiàu gín-á ê le̍k-liōng, bān-bān chìn-chêng.” (Chhòng-sè-kì 33:14)


Che sī chi̍t-ê chin chhù-bī ê tô͘-ōe! Biô-siá Ngá-kok tùi cheng-siⁿ kap gín-á ê chû-sim! I bô ài kóaⁿ kín-kín lâi kóaⁿ-lō͘, i bô ài chiàu tōa-lâng ê le̍k-liōng lâi chhui-kóaⁿ in, sī chiàu in gín-á ê khùi-la̍t bān-bān chhōa in kiâⁿ. I chai i ê kiáⁿ-jî sòe-hàn, iù-chíⁿ, gû iûⁿ iā ū sòe-chiah ê teh chhī-ni. I chai in chi̍t-kang ōe kiâⁿ gōa-chōe lō͘; i khó-lū liáu, chiah an-pâi in ê hêng-têng. Jî-chhiáⁿ chi̍t-tiâu khòng-iá ê lō͘, í-chêng i iā bat kiâⁿ-kè; ū khi-khu, ū gûi-hiám, ū iâm-jia̍t, ū hân-léng, i ū keng-giām kè. Só͘-í i tùi in kóng, “Góa beh bān-bān chhōa in kiâⁿ.”

“In-ūi chit-tiâu lō͘ lín m̄-bat kiâⁿ-kè.” (Iok-su-a 3:4)

Chêng-bīn ê lō͘ lán lóng m̄-bat kiâⁿ-kè, chóng-sī Chú Iâ-so͘ bat kiâⁿ-kè. Lán ê chiân-tô͘ tùi lán chin-chiàⁿ sī bông-bông biáu-biáu. Chóng-sī Chú lóng keng-kè lah. Chit-chām hō͘ lán sim loān-chhau-chhau, hit-chām hō͘ lán sin-thé nńg-sô-sô, lēng-gōa chi̍t-chām hō͘ lán chhùi-ta o͘-àm-hîn, koh chi̍t-chām hō͘ lán khùi lóng chhoán bōe-kè-lâi; kî-si̍t chiah-ê Chú lóng bat keng-le̍k kè, kiâⁿ kè. Sèng-keng kóng, “Iâ-so͘ kiâⁿ-lō͘ siān.” (Iok-hān 4:6) Kiâⁿ-lō͘, hong-hō͘, chai-lān, koân-soaⁿ ōe hō͘ I ià-siān, khiok bōe thang bia̍t I ê jia̍t-chêng. I só͘ tú-tio̍h ê khó͘-lān, hō͘ I chiâⁿ-chòe siōng-hó ê bo̍k-chiá. “I chai lán ê thé-chit, siàu-liām lán sī thô͘ chòe ê.” (Si-pian 103:14) I ta̍k-sî ta̍k-khek tài-liām lán, bô hō͘ lán kiâⁿ tī lán só͘ tam-tng bōe-khí ê lō͘. (Frances Ridley Havergal)


“Chi̍t ki chháu, chi̍t tiám lō͘, Thiⁿ bô choa̍t lâng ê lō͘.”

Bô-it-tēng siông-siông tī chhiⁿ-chhùi ê chháu-tiûⁿ,
I chai I ê lóng-chóng ê iûⁿ,
Ēng chû-ài chhōa in kè gûi-hiám ê lō͘-chiūⁿ,
O͘-àm tiong khan tī I ê chhiú-chiúⁿ.

Bô-lūn sī tī hó-thiⁿ ê soaⁿ-téng,
Á-sī tī bô ji̍t-thâu ê soaⁿ-kok, lō͘-kèng,
O͘-hûn, im-iáⁿ têng-têng,
Ū I ê tông-chāi, hòng-sim an-lêng. (Barry)


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com