《台語荒漠甘泉（全羅版）》

 | | | 轉寄

"Kiû chiū tit-tio̍h"

作者 陳清俊 翻譯 2009.10.25

listen


Cha̍p ge̍h jī-gō͘ (Cha̍p ge̍h jī-cha̍p-gō͘ ji̍t)

"Lín kàu taⁿ bē bat tī góa ê miâ kiû sím-mi̍h; lín tio̍h kiû chiū ōe tit-tio̍h, hō͘ lín ê hoaⁿ-hí móa móa." (Iok-hān 16:24)

Bí-kok lāi-chiàn ê sî, ū chi̍t ê kiáⁿ khì chham-ka Liân-ha̍p-kun. I ê lāu-pē sī gûn-hâng-ka, sui-jiân i tông-ì kiáⁿ khì chham-kun, chóng-sī hō͘ kiáⁿ chhut-cheng sio-thâi khiok ōe chin siong-sim.

Kiáⁿ chhut-cheng liáu-āu, i tùi kun-jîn ê chhù-kéng chin koan-sim chin chù-ì. Khòaⁿ-tio̍h chhēng chè-ho̍k ê sū-peng, i ê sim chiū thiàu chhut-khì, ná chhin-chhiūⁿ khòaⁿ-tio̍h i ê kiáⁿ chi̍t-iūⁿ. Siông-siông pàng-hē seng-lí bô chòe, ēng chîⁿ ēng sî-kan chiàu-kò͘ siū siong ê peng. Pêng-iú khǹg i m̄-thang bô kò͘ ka-kī ê sū-gia̍p, i chiū thiaⁿ pêng-iú ê khó͘-khǹg, oân-choân thêng-chí koh hòng-khì kiù-chè siong-peng ê kang-chok.

Chóng-sī ū chi̍t-kang, chi̍t ê siàu-liân sū-peng chhēng kū-kū thè-sek ê kun-ho̍k kiâⁿ ji̍p gûn-hâng. Tùi i ê bīn kap chhiú só͘ siū ê siong, chai i tú-tú tùi lio̍k-kun iá-chiàn pīⁿ-īⁿ chhut-lâi ê. Gûn-hâng-ka khòaⁿ-kìⁿ hit ê khó-lîn ê siàu-liân peng tú chhun chhiú tī tē-á-lāi jîm sím-mi̍h mi̍h ê sî, gûn-hâng-ka ka-kī lia̍h chòe bêng-pe̍k i ê ì-sù, chiū-kóng, "Siàu-liân lâng, góa kin-á-ji̍t te̍k-pia̍t bô êng, bōe-thang pang-chān lí, lí ài khì lio̍k-kun chóng-pō͘, tī hia ū koaⁿ-oân ōe chiàu-kò͘ lí."

Hit ê khó-lîn ê siong-peng iû-goân khiā teh, ná chhin-chhiūⁿ thiaⁿ bô i ê ì-sù. I kè-sio̍k tī khò͘ ê la̍k-tē-á chhē, chhiau-chhut chi̍t-tiuⁿ lah-sap lah-sap ê chóa-tiâu-á, i chiong hit tiuⁿ o͘-o͘ ê chóa-tiâu hē-tī gûn-hâng-ka ê bīn-chêng, hō͘ i khòaⁿ, téng-bīn siá:

Chhin-ài ê hū-chhin:

I sī góa ê pêng-iú, tī téng-pái sio-chiàn ê sî siū siong, tùi pīⁿ-īⁿ chhut-lâi khòaⁿ lí. Chhiáⁿ lí chiap-thāi i chhin-chhiūⁿ chiap-thāi góa chi̍t-iūⁿ.

Lí ê kiaⁿ Chha-lī

Gûn-hâng-ka chit ē khòaⁿ tio̍h chit tiuⁿ chóa-tiâu ê lāi-iông, i chiām-sî pàng-hē kang-chok, tòa i kàu ka-kī ê tōa-chhù, chiong kiáⁿ-jî ê pâng-keng hō͘ i ēng, chia̍h-pn̄g ê sî, iā sī chē tī kiáⁿ só͘ chē ê í-á ūi. Chiàu-kò͘ i ê lim-chia̍h, chhin-chhiūⁿ chiàu-kò͘ ka-kī ê kiáⁿ chi̍t-iūⁿ. I tit-tio̍h chhiong-hun ê hioh-khùn kap thiàⁿ-hō͘, kín-kín hoe-hok kiān-khong, chiah koh sàng i hôe kàu i goân-lâi ho̍k-bū ê tan-ūi kè-sio̍k ūi kok hāu-lô.

Hiān-chāi lí beh khòaⁿ-kìⁿ Góa só͘ kiâⁿ ê sū. (Chhut-ai-ki̍p-kì 6:1)


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com