《台語荒漠甘泉（全羅版）》

 | | | 轉寄

"Iân-tî kap khó͘-lān"

作者 陳清俊 翻譯 2009.10.18

listen



Cha̍p ge̍h cha̍p-poeh (Cha̍p ge̍h cha̍p-poeh ji̍t)

"Lí tek-khak tio̍h chai, lí ê hō͘-è beh chhut-gōa tī pa̍t-lâng ê tōe, ... hit-ūi ê lâng beh khó͘-chhó͘ in sì-pah nî. ... āu-lâi in beh tòa chōe-chōe châi-bu̍t tùi-hia chhut-lâi." (Chhòng-sè-kì 15:13-14)

Góa thang khéng-tēng Siōng-tè èng-ún hō͘ góa ê hok-khì tiong, ū chi̍t-pō͘-hūn sī "iân-tî" kap "siū-khó͘." A-pek-la̍h-hán it-seng keng-le̍k iân-tî, khòaⁿ loh ná chhin-chhiūⁿ Siōng-tè ê èng-ún éng bô si̍t-hiān ê ji̍t, i ê hō͘-è keng-kè tn̂g-kî ê iân-chhiân. Tān-sī he khak-si̍t sī iân-tî, tng èng-ún si̍t-hiān lah, in tek-khak "tòa chin-chōe châi-bu̍t tùi hia chhut-lâi."

Siōng-tè ēng iân-tî lâi khó-giām lán, koh kap iân-tî chòe-hé lâi ê, iáu-ū khó͘-lān. Chóng-sī keng-kè che it-chhè, Siōng-tè ê èng-ún iáu-kú iú-hāu. Góa ū I tī Ki-tok ê sin-iok, kap I tap-èng hō͘ góa, góa só͘ su-iàu sòe ê èng-ún, hiah ê iân-chhiân kap khó͘-lān si̍t-chè-siōng sī èng-ún hok-khì ê chi̍t pō͘-hūn. Goān góa kin-á-ji̍t in-ūi iân-tî kap khó͘-lān lâi o-ló I. Goān góa ōe "ióng-chòng, ... kian-kò͘; ... thèng-hāu Iâ-hô-hoa." (Si-phian 27:14) --- Charles Gallaudet Trumbull

Khó͘-sim siong-sim kú-kú tn̂g-tn̂g,
Chōe-chōe nî ê kî-tó bô tn̄g?
Sìn-sim khai-sí sit-khì? Hi-bāng khai-sí sit kng?
Siūⁿ kóng só͘ lâu ê ba̍k-sái lóng bô sǹg?
M̄-thang kóng Thiⁿ-pē bô thiaⁿ lí ê kî-tó,
Bó͘-sî, bó͘-tē, lí beh tit-tio̍h lí só͘ ǹg.

Iáu-bōe hôe? M̄-thang kóng sī bô khó-lêng.
Sī lí ê kang-chok iáu bōe oân-sêng.
Tng lí khai-sí kî-tó ê sî, kang-chok chiū chìn-hêng,
Siōng-tè beh oân-sêng I bōe-soah ê kang-thêng,
Ká-sú lí kè-sio̍k sio-hiuⁿ, kî-tó,
Bó͘-sî, bó͘-tē, lí beh khòaⁿ-kìⁿ I ê kong-êng.

Iáu-bōe hôe? Ū sìn, bōe bô hôe-èng.
Sìn ê siang-kha khiā tiâu tī chio̍h-pôaⁿ téng,
Tī kông-hong po̍k-ú tiong khiā chēng-chēng,
Siōng tōa siaⁿ ê lûi kòng, iā bōe iô-tāng piàn-keng,
Chai choân-lêng ê Siōng-tè í-keng thiaⁿ kî-tó,
Bó͘-sî, bó͘-tē, hoah-kóng, "Tek-khak oân-sêng." --- Ophelia G. Browning

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com