《台語荒漠甘泉（全羅版）》

 | | | 轉寄

"M̄-thang hoe-sim"

作者 陳清俊 翻譯 2009.05.10

listen


Gō͘ ge̍h chhoe-cha̍p (Gō͘ ge̍h cha̍p ji̍t)

"Góa nā m̄-sìn tī oa̍h-lâng ê tōe tit-tio̍h khòaⁿ-kìⁿ Iâ-hô-hoa ê un-hūi, chiū tek-khak choa̍t-bāng. Tio̍h thèng-hāu Iâ-hô-hoa, tio̍h ióng-chòng, lí ê sim tio̍h kian-kò͘." (Si-phian 27:13,14)

M̄-thang hoe-sim!
Ah! Ū sî hoe-sim choa̍t-bāng ê iú-he̍k sī jōa-chiâⁿ tōa! Tng lán ê seng-oa̍h siū-tio̍h giâm-giâm ê chhì-liān, khó-giām, te̍k-pia̍t sī ū sí-bông ai-siong, kap siū thòng-khó͘ ê sî, lán ê cheng-sîn sit-khì oa̍h-la̍t, sim tîm-tāng, sìn-sim iô-tāng. Lán khó-lêng kiâⁿ kàu chit ê tē-pō͘, beh kóng, "Góa jím-siū bōe tiâu lah. Tī Siōng-tè só͘ ún-chún hā, góa í-keng chiap-kūn choa̍t-bāng. I kiò góa m̄-thang hoe-sim, choa̍t-bāng, chóng-sī kàu chit ê tē-pō͘, góa m̄-chai beh án-chóaⁿ chòe ah?"

Í-chêng lí ê sin-thé loán-jio̍k ê sî, lí ū chòe sím-mi̍h? Lí bōe thang chòe sím-mi̍h, chí-sī thêng-chí chòe jīm-hô ê sū. Tī loán-jio̍k tiong, lí phēng tī lí só͘ thiàⁿ koh ióng-chòng hit ê keng-kah téng, oân-choân khò tī lēng-gōa chi̍t ê lâng ê sin-chiūⁿ lâi hioh-khùn, lâi chēng-ióng, oân-choân sìn-khò lēng-gōa chi̍t ê lâng ê le̍k-liōng.

Tī cheng-sîn siū khó͘, loán-jio̍k ê sî, iā sī án-ni. Tng lí it-tàn chiap-kūn choa̍t-bāng ê sî, Siōng-tè ê sìn-sit m̄-sī kóng "Lí tio̍h ióng-kám chòng-táⁿ" (Iok-su-a 1:6). In-ūi I chāi lí ê le̍k-liōng kap ióng-khì í-keng kàu chīn-pōng lah, hoán-tńg sī, I un-jiû kóng, "Lín tio̍h tiāⁿ-tiāⁿ, tio̍h chai Góa sī Siōng-tè." (Si-phian 46:10)

Kàu Tiong-kok ê chhut-miâ thoân-kàu-su Tè-tek-seng (Hudson Taylor) tī i lîm-chiong ê chòe-āu kúi kò-ge̍h, i tùi pêng-iú kóng, "Góa loán-jio̍k kàu bōe siá-jī, bōe tha̍k keng, sīm-chì bōe ōe kî-tó. Góa chhin-chhiūⁿ chi̍t ê gín-ná hioh tī Siōng-tè ê heng chêng, siong-sìn I." Chit ê lêng-sèng úi-tāi Siōng-tè ê lô͘-po̍k kàu sin-thé soe-lám, jio̍k-thé siū khó͘ ê sî, só͘ thang chòe ê chí-sī hioh-khùn kap sìn-jīm.

Siōng-tè tùi I ê kiáⁿ-jî ê iau-kiû iā sī án-ni. Lí siū lia̍t-hé ê khó͘-thàng, lâng loán-jio̍k ê sî, I bô kiû "ióng-kám chòng-táⁿ", chí-sī "hioh-khùn, tiāⁿ-tiāⁿ, ài-chai, I ê Siōng-tè." Iā chai I ōe chi-chhî lí tō͘-kè hé ê chhì-liān.

Siōng-tè pó-liû siōng hó ê i-io̍h hō͘ lán tī siōng choa̍t-bāng ê sî iōng.
Tio̍h chòng-táⁿ, kian-kò͘ lí ê sim. --- Si-phian 27:14

Kian-kiông,
Kè-khì I bô hō͘ lí sit-bōng,
Hiān-chāi kiám ōe lī-khui lí,
Khòaⁿ lí tîm-lo̍h-khì.
Bōe,
I kóng, beh chiong lí hē tī I ê si̍t ē,
Kàu tī an-choân ê tē,
Lí beh gîm-si chhiùⁿ-koa kun-tè.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com