《台語荒漠甘泉（全羅版）》

 | | | 轉寄

"Kiàn-li̍p lêng-sèng ê phín-keh"

作者 陳清俊 翻譯 2008.10.05

listen


Cha̍p ge̍h chhoe-gō͘ (Cha̍p ge̍h gō͘ ji̍t)

"Āu-lâi khoe-chúi ta." (I Lia̍t-ông-kì 17:7)

Ká-sú lán bô tùi Siōng-tè hō͘ lán ê sún-sit, sit-pāi, khang-hi o̍h-tio̍h che sī Siōng-tè bo̍k-ióng lán ê kang-chok, lán só͘ siū sìn-sim ê kàu-io̍k chiū sī bô oân-choân. Sū-si̍t, tī bu̍t-chit ê bô an-choân, ōe hō͘ lán ê lêng-sèng koh-khah khiā-chāi, kian-kiông khí-lâi.

Í-lī-a chē tī chiām-chiām ta khì ê Ki-li̍p khoe teh be̍k-sióng, chiū-sī lán jîn-seng ê siá-chiò. "Āu-lâi khoe-chúi ta" lah, sī chá-ji̍t ê le̍k-sú, iā-sī lán bêng-ji̍t ê ū-kò.

Bô-lūn jû-hô, lán lóng ha̍k-si̍p tio̍h, siong-sìn “un-sù” kap sìn-jīm “Si-un-chiá” ê chha-pia̍t. Un-sù sī chi̍t sî-chūn, Si-un-chiá sī éng-oán ê, ū thiàⁿ-sim ê Siōng-tè.

Sian-ti Í-lī-a kàu Sat-le̍k-hoat í-chêng, Ki-li̍p khoe tùi i sī chi̍t ê oh kái-sek ê bê. Tng i kàu Sat-le̍k-hoat í-āu chiū bêng-pe̍k múi hāng sū. Siōng-tè hō͘ lâng khùn-lân ê chí-sī pēng m̄-sī chòe-āu ê kiat-kó, in-ūi jîn-seng ê chai-hō, sún-sit kap ba̍k-sái chí sī jîn-seng ê chi̍t pō͘-hūn, pēng m̄-sī chòe-āu ê tiāⁿ-tio̍h.

Ká-sú Chú tòa-niá Í-lī-a ti̍t-chiap khì Sat-le̍k-hoat, i chiū sit-khì tī Ki-li̍p khoe ê sìn-sim seng-oa̍h, iā sit-khì pang-chān i chiâⁿ-chòe koh-khah ū tì-hūi ê sian-ti, kiàn-li̍p khah hó phín-keh ê ki-hōe. Tng lán tē-bīn ê khoe-chúi á-sī gōa-chāi chu-goân ta khì ê sî, lóng-sī Siōng-tè só͘ hí-khó ê, ài lán chai, goân-lâi lán ê hi-bōng kap pang-chān lóng chāi-tī chhòng-chō thiⁿ-tē ê Siōng-tè ê chhiú tiong. --- F.B. Meyer
Lí bat tòa tī chheng-chēng khoe chúi piⁿ,
Ià-siān chhùi-ta ū chúi lim chin kah-ì,
Sî-kan kú, khoe-chúi bô koh chhin-chhiūⁿ tong-chho͘-sî,

Pún ū hoan-lo̍k oa̍h-la̍t ê siaⁿ-im,
Bô pó-liû hō͘ lâng ê thiàⁿ-sim,
Sî-kan tn̂g, hí-lo̍k thiàⁿ-sim chiām-chiām tîm.

Lêng-hûn ah, hit-sî sim-ài ê khoe hō͘ lí phòa-táⁿ,
Nā-sī kè-khì thang lim ê khoe-chúi ko͘-ta,
Lí ê sim tio̍h kín-kín óa-kūn I lah.

I bōe pàng-sat lí, hō͘ lí sit-bāng,
I ê an-ùi kap chiàu-kò͘ bōe kái-piàn pòaⁿ hāng,
Beh ēng hí-lo̍k ê iû boah lí, chhit-khì lí ê ba̍k-sái, chài oa̍h-tāng. --- J.Danson Smith


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com