《台語荒漠甘泉（全羅版）》

 | | | 轉寄

"Tī Chú lāi-bīn ū pêng-an"

作者 陳清俊 翻譯 2008.09.28

listen



Káu ge̍h jī-poeh (Káu ge̍h jī-cha̍p-poeh ji̍t)

"Hō͘ lín tiàm-tī góa ū pêng-an." (Iok-hān 16:33)
Hoan-lo̍k kap siū chiok-hok sī ū tōa-tōa ê hun-pia̍t. Pó-lô keng-le̍k kè koaiⁿ-kìm, thòng-khó͘, hi-seng, koh khó͘-lān kàu ke̍k-tiám, Tān-sī tùi chiah ê, i tit-tio̍h Siōng-tè ê chiok-hok. Só͘-ū ê hok-khì lóng tī i ê sim tiong, sìⁿ-miā tiong, tī i khùn-lân ê khoân-kéng tiong chiâⁿ-chòe sū-si̍t.

Ì-tāi-lī tōa chhut-miâ oai-o-lín (sió-thê-khîm) choan-ka, Paganini, ū chi̍t pái ián-chàu, tī koan-chiòng phah phok-á siaⁿ kiat-sok ê sî, hoat-hiān oai-o-lín m̄-sī i siōng-hó siōng pó-kùi hit ki. Sū-si̍t siōng hit-ki oai-o-lín kun-pún m̄-sī i ê. I gōng-ngia̍h chi̍t ē, chiū bīn-tùi koan-chiòng kóng chhut sū-si̍t, i só͘ ēng ê m̄ sī i ê oai-o-lín. I lia̍h chòe sī hē tī āu-tâi, tng i tī āu-tâi ê sî, chiah chai ū lâng thau i ê oai-o-lín khì, ōaⁿ chi̍t ki pháiⁿ phín-chit ê ga̍k-khì hō͘ i.

Paganini tùi āu-tâi koh chhut lâi kàu tâi-chêng, khai-sí hiòng thiaⁿ-chiòng kóng ōe. "Chu-ūi lú-sū, chu-ūi sian-siⁿ, hiān-chāi góa beh hiòng lín chèng-bêng, im-ga̍k m̄-sī chāi-tī ga̍k-khì ê lāi-bīn, sī chāi-tī sim-lêng lāi-bīn." I tôaⁿ chhut hiah hó thiaⁿ ê im-ga̍k, sī tùi hit ki phín-chit chha ê ga̍k-khì chhut-lâi, thiaⁿ-chiòng thiaⁿ kah hīⁿ-khang phak-phak-phak. In ê phok-á-siaⁿ chha-put-to ōe hō͘ chhù-kòa hian khí-lâi hiah tōa. Sī i khak-si̍t chèng-bêng im-ga̍k put-chāi ga̍k-khì, sī tùi i ka-kī ê sim-lêng lāi hoat-chhut-lâi!

Le̍k-kè chhì-liān kap khó-giām ê sìn-tô͘ ah, lín ê sù-bēng sī kiâⁿ tī sè-kài ê bú-tâi-chêng, hiòng thiⁿ-tē só͘ ū it-chhè lâi piáu-bêng, sìⁿ-miā ê im-ga̍k put-chāi chiu-ûi ê khoân-kéng kap gōa-chāi ê sū-bu̍t, sī chāi-tī lín ka-kī sim-lêng lāi.

Nā-sī sim-tiong ū pêng-an,
Tang-thiⁿ ê po̍k-hong-seh iā sī chhàn-lān,
Pòaⁿ-mî ê sih-nà iā ōe chiò kng sè-kan,
Múi chi̍t ê oa̍h-mi̍h chhut sin koh hoaⁿ-hí lâi chheng-chàn,
Múi chi̍t châng chhiū, chi̍t tè chio̍h, gêng-chiap thiⁿ-kng chho͘ tàn,
Nā-sī sim-tiong ū pêng-an. --- Charles Francis Richardson


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com