《賴永祥講書》

 | | | 轉寄

《教會史話》修訂1_030, 巴克禮增補杜辭典

作者 賴永祥 2019.09.15

巴克禮牧師是1873年春天畢業格拉斯哥大學神學院ê。晚年伊回憶講： Tī我大學ê生涯內底，我無想tio̍h海外宣教，直到siōng尾一年……有一工，院長杜喬治博士（Dr. George Douglas）ê小弟，to̍h是廈門tńg來ê杜嘉德牧師，來到學校招募前往中國ê宣教師。……暗時，院長邀請一kóa學生kah杜嘉德牧師見面，當時杜牧師當teh從事廈門腔漢英辭典ê出版工作。伊hō͘ 阮看辭典ê校對稿樣，我kā伊講看起來印kah iáu bē bái。伊講：「無m̄-tio̍h！當你來到中國，相信你一定ē發見chit-ê字典有非常ê用途」。以後伊寫phoe勸我，隨時kah伊動身，m̄免koh再讀完神學課程，tī中國宣教師ê需要是迫切ê……m̄-koh，我當時無答應伊ê建議（Band, Barclay of Formosa, pp. 17-18）。巴克禮ê來台是1875年。

杜嘉德牧師編著ê《廈英大辭典》一向是宣教師學習廈門腔siōng好ê參考書。M̄-koh，出版以後經過將近半世紀之間，中國大變，新科學用語（親像電器方面）、社會用語以及真chē新字lóng無tī chit本辭典內面。為tio̍h適應時代ê需要，1913年tī台灣kah廈門ê眾同工，請巴克禮牧師做補遺ê工作。In知影巴牧師幾十年來一直teh學習當地ê語言，而且kā所聽tio̍h ê用語，m̄管好bái lóng做記錄。巴牧師受託，就tī續落來ê十年中間，利用làng-phāng時間，整理伊收集杜牧師大辭典所無ê字彙片語。眾同工mā提供真chē資料，其中梅監務牧師（Rev. Campbell N. Moody）提供四百gōa張字彙kah備忘錄siōng-kài可貴。

資料收集齊全以後，巴博士tī廈門用三、四個月ê時間編纂整理，tī 1922年自英國休假tńg來以後，隨時前往上海，交商務印書館印刷。當時受選協助巴博士牧師作siōng尾ê校訂kah監印者是楊士養牧師（1898–1975）。楊牧師tī 1919年tùi台南神學院畢業，受選ê時tú tùi日本東京明治學院深造tńg來，任傳道師；tòe巴牧師赴上海監印ê時，只好「暫別含情脈脈ê新娘（黃千金）kah tú出世五個月ê kiáⁿ（長男鳳生）」。

隔tńg年1923年，《增補廈英大辭典》（ “Supplement to Dictionary of the Vernacular of Spoken Language of Amoy”），終其尾出版。序kah說明5頁，辭典276頁，篇幅約有杜原著ê二分之一。原著無漢字對照，m̄-koh增補就有漢字；伊ê拚音方法盡可能kah原著一致。因為伊ê資料收集完備、說明清楚詳盡，出版後隨時受tio̍h普遍ê歡迎。1970年台北古亭書屋kā杜原著kah巴增補合訂重版，加題中文書名《廈英大辭典》。

──《台灣教會公報》1904期 主後1988年8月28日



增補杜辭典