《賴永祥講書》

 | | | 轉寄

林錦生kap《廈門音新字典》

作者 賴永祥 2005.08.07

賴永祥講書 (002) 林錦生kap《廈門音新字典》
林錦生, 1894年12月16日tī台南出世，父親林江河，母親詹敏。伊tī 1904年入新樓長老教中學(今長榮中學前身)；1907年春三月中學畢業,時14歲，就受聘協助甘為霖牧師編修字典，工作將近二年, 了後辭任，努力學習日語。1911年三月考tiâu台灣總督府醫學校，1916年畢業就行醫；先tī 楠梓橋á頭，後來去廈門、汕頭、上海(後明醫院)等所在開業，mā研習漢醫。二次大戰後轉來台灣，koh tī橋頭自營「和光醫院」,以腎臟科專長出名; 也擔任過鄉民代表會主席,信用購買合作社理事主席等職。 林錦生早年屬台南太平境教會，1905~1911年約五年外久擔任禮拜司琴；戰後tī橋頭教會擔任長老kap附設懷恩幼稚園董事長幾若年，bat獻仕隆路土地一筆hō͘教會。晚年專研易經，著有《圖解新世紀形相學》(1978年台南鵬逞印刷廠印)，1980年正月20日過身。

林錦生Kap夫人施錦(1917~1969)育有子女五人：長子宗邦(針灸師)、長女淑芬(適張俊傑)、次女宜男(適洪進來)、次子宗翰(醫學博士, tī 日本行醫) kap三女冠男(適洪山水) 我tùi林冠男女士得tio̍h林錦生撰《七十年前之回憶》一小冊 ，這本冊ê副題是「廈門音新字典kap我」，是一本教界難得ê回憶錄。是漢文著作, 共有30面，分三段：(一)學而時習之，(二)練琴司琴，(三)字典編修。 第三段再分七小節：(1)(fa45)雞焉用牛刀，(2)新字典構想，(3)參考書，(4)即席提案，(5)英國流紳士，(6)冊房經理鋒芒不露，(7)無戶籍之私生子。冊並無記明出版年, 我推定是1975年冬天。

根據林錦生ê回憶，《廈門音新字典》ê編修分兩部進行：第一部讀音基礎篇，專責彙(lūi)集仝音無仝形ê字；第二部解義篇，專責抄錄語義、修整詞句。錦生負責第一部基礎篇，以打馬字ê《廈門音ê字典》做藍本，根據甘牧師所製ê羅馬字單語手冊，單語每字一chōa,按照英文字母，tùi第一字A排起。錦生收集仝音無仝形ê字，不管偌chē lóngk收入去hit音內底；同時審定各字ê讀音，追求正確；俗語字kóng參考「十五音」，取捨lóng真斟酌，默默埋首修撰(choān)，經過將近兩年才完成。

M̄-koh tī錦生ê回憶內底mā提起兩項惋惜ê代誌：第一應該順應潮流，將日文中慣用ê漢字文句成語彙(lūi)集編入字典，但心有餘力不足；辭任後彙集170多語(譬如挨拶、沙汰、玄関、丈夫等)，親手交hō͘ 甘牧師，但無看tio̍h被採用。第二kap冊房經理孫耀雲先生合作所完成ê 53句俗語字，mā仝款無路用。

1910年11月，陳大鑼tùi台南長老教中學畢業，甘為霖牧師隨kā約聘，來負責第二部解義篇，大鑼和甘牧師同工三年，完成解義、整編kap校正。《廈門音新字典》 終於tī 1913年順利出版。字典ê完成是甘牧師ê心願kap設計，也是林錦生kap陳大鑼ê辛勞傑作。