《賴永祥講書》

 | | | 轉寄

楊士養牧師ê《南台教會史》

作者 賴永祥 2006.03.26

賴永祥講書(016)

「南楊北徐」，tī戰後初期ê台灣教會史界，楊士養牧師kap徐謙信牧師 khiā tī領導ê地位；in兩人各參與台灣基督長老教會南、北部大會歷史部、歷史委員會外，也前後互相繼任總會歷史委員會ê主任委員。

楊士養牧師，1898年tī嘉義關仔嶺出生，1914年tī台南長老教中學校畢業，1919年tī台南神學校畢業，1921年赴日本東京明治學院深造。伊tī東港（1925年tī東港按牧）、西螺、新營、鳳山、高雄鹽埕、台南東門各教會牧會過，也tī台南神學院先後任教達十九年久，1963年退休。Hit中間伊bat到美國普林斯頓神學院kap英國劍橋神學院進修；任嘉義中會、台南中會、南部大會、台灣大會ê議長；協助巴克禮牧師(Rev.Thomas Barclay,1849-1936)增補廈英大辭典；擔任聖詩委員會主席等。退休後擔任聖經公會ê顧問。1975年11月7日過身。享年七十八。著作有《南台教會史》、《台灣信仰名人略傳 第一集 第二集》等。

《南台教會史：Lâm Tâi Kàu-hōe sú》是楊士養牧師受南部大會歷史部(1952年成立)之託所編寫ê。伊用白話字寫出咱南部台灣長老教會歷史ê大要。伊tī第一章簡述「荷蘭kap西班牙人ê宣教」；第二章記述「英國長老教會ê宣教」：分五段，（一）宣教開始，迫害多端(1865-1894)；（二）宣教卅年，日本領台(1895-1914) ；（三）設教五十年，提倡自治(1915-1934) ；（四）設教七十年，盼望自立(1935-1944) ；（五）台灣光復，教會光復(1945-1953); 第三章述「教會ê事工」：分三段，（一）醫療，（二）教育，（三）文字。有「結尾」語kap附表(宣教師一覽表 kap 1903.2.18新校舍落成hit年神學生一覽)。

《南台教會史》卷末，附有高金聲牧師(1874-1961)所寫ê「數(siàu)念聖徒」；共有五篇傳略。（1）高長伯，（2）朱姑娘kap文姑娘(Joan Stuart & Annie E. Butler) （3）祿仔兄（吳祿長老），（4）永嬸（永嬸名洪仙河，顏永成之妻，顏振聲長老之母），（5）赤馬兄（林學恭牧師）。

《南台教會史》是由台灣教會公報社印刷發行，初版tī 1953年刊行(第二版1963年)，佳里吳新榮醫師(1907-1967)，為方便一般讀者，就摘要譯做中文，以<南部台灣基督教史略>為題，刊tī《南瀛文獻》」第2卷第3/4期（台南縣文獻委員會刊，1955年6月），但流傳無闊。後來楊牧師有koh tī《台灣基督長老教會百年史》，用中文寫了<日據時代之南部教會史>、<南部教會的事工>kap<臺灣大會>諸節。

楊士養牧師ê文章，簡潔koh清秀(優美)，所以真chē老輩ê信徒愛讀chit本書。台北和平教會ê陳郭錦鳳長老(1902-1981)，一讀再讀，經過十幾年，先將白話字譯作漢文，再改編為詩詞。1981年2月伊ê phoe寫講：「已編好詩詞一四四八題」。不過同年5月23日郭長老就過身，是m̄是tī伊生前已經完成《南台教會史詩》?故人以台語詩唱出福音tī台灣傳開ê路徑，也是伊信仰ê表達，ǹg望遺族ē-tàng代伊整理刊行！

Chit篇文，原題《南台教會史》，是《教會史話》003，tī《台灣教會公報》第1873期(1988.1.24)刊載，後來收入tī《教會史話》第1輯，今用「漢羅」體重寫。今日(2006.3.23)也收到陳黃義敏牧師ê phoe講: 母親有完成史詩ê作，共有1482首。