《賴永祥講書》

| | | 轉寄

《教會史話》(2_121) 莊清風殉教

tī初代耶路撒冷教會,頭一位殉教ê是司提反。眾人「kā伊sak-kàu城外,用石頭kā phah..死」(參見使徒行傳第6、7章)。tī台灣,頭一位因為信教來死去ê信徒是莊清風 (關於莊清風,參見《教會史話》 115 三塊厝.莊清風)。

莊清風hō͘人thâi,發生tī 1868年4月24(同治7年4月初2)。5月16馬雅各醫生hō͘母會宣道會函(The Messenger, August1868, p.169-170)tio̍h簡單來報告經過。中文第一手資料,有《教務教案檔》;chit-ê檔案記錄tāi-chì經過真清楚,koh有莊清風丈母許陳氏、妻許云涼、thâi清風ê主謀周忠、左營庄里總黃化治、武舉林瑞藻等ê供詞。下面kan-ta簡單寫..一koah。

莊清風,頂淡水人,ūi-tio̍h走找禮拜ê教堂,自北部行來旗後。1867年3月初10 tī旗後由汲灃灡牧師(Rev.L. W. Kip)領洗。得tio̍h馬雅各醫生ê信任,先協助醫館,後來hō͘人請來做傳道人。巡三塊厝、埤頭(鳳山)kap附近ê村庄。1868年年初(同治6年12月16)kap許云涼結婚。根據伊ê老母陳許氏講,是媒人林目標牽成..ē,收番銀2-khō͘做定,koh收聘禮20-khō͘,許氏本來表示khah-su有入教tio̍h無beh嫁..伊,媒人講無入教只是拜上帝ê話。結婚liáu後兩ê住佇旗後,因為某m̄肯入教來失和(云涼講tiāⁿ-tiāⁿ hō͘人打)。4月23(陰曆4月初1),禮拜日,清風前往禮拜堂,某tio̍h趁機會逃去左營庄謝姓厝內bì。清風發覺某離開厝,tio̍h四界找,tī 24日中晝,tī謝家找tio̍h 伊。謝家只有一ê老á婆tī內面,喊「入教ê人beh抓人」。各鄉里lóng leh傳外國教士逼人入教下毒thâi人,鄉民真驚惶,庄內ê人一直óa..來,有數百人hiah chē,leh講天主教抓人,附和hoah beh thâi,合力打人。

清風登時hō͘人逼kàu武舉林瑞藻ê厝,眾人kā伊giú去庄外,giú leh土kha phah,phah kàu重傷。有庄民周忠(26歲)後來承認:伊當leh phòa柴做工,一時憤怒,趕往tio̍h kā清風thâi..死phòa肚,烏白phut,tio̍h隨無命,一時人chē,tio̍h kā屍體kap血刀丟入去庄外ê海邊。清風死ê時陣29歲,某許云涼15歲。

koh有批:清風tī離英領事館kan-tā 5哩遠ê庄內,受tio̍h攻擊,透早竟然tī街á路頂hō͘人thâi,屍體hō͘人切做kúi真chē片,心臟hō͘ khah大膽ê人,tī舊城北門附近食(怡和洋行存檔)。心臟hō͘人用尖刀挖去食,做hê-ku ê藥á。真慘!後來埤頭信徒聽tio̍h,tio̍h來收拾kā屍體埋..起來,「為伊捶胸大哭」(使徒行傳8章2節語)。


《台灣教會公報》 2014期 主後1990年10月初7