《生活e5台語，台語e5生活》

 | | | 轉寄

通用較通英文嗎？

作者 Li KhinhoaN 2005.11.06

拜讀黃元興先生對通用音標kap教羅之評論，看似各有優缺，主張二套並存，其實偏向通用，其中繆誤百出。歸根究底，主要是因為無受過語言學專業訓練，而且無有kā英文學好。這也是主張通用拼音者最大ê問題所在。本人修過英語教學碩士，從事英語教學十二年，願意以自己ê專業訓練，來糾正chit-ê存在已久，似是而非，以訛傳訛，差不多強beh眾口鑠金ê錯誤。

就以黃先生所舉ê例「豬頭皮肉真厚」來說明吧，看到底是siáng teh「處處kap英文做對」。

「豬頭皮」三字，台羅（教會羅馬字kapTLPA已經整合做台灣羅馬拼音，tī chia簡稱台羅）kap通用之不同是通用不分送氣 (aspiration)，所以 ti, thau, phue, 通用寫做 di, tau, pue。in講英文字母ê t 發音明明就是ㄊ，為何lín ài kap英文做對？英文無啥好ê人一聽kah-ná有理。其實，英語ê t 並m̄是就唸做ㄊ，而是有時唸做ㄊ，有時唸做ㄉ。比如講英語ê top ê t 是唸做ㄊ，但是在 stop ê時候就唸做ㄉ。這二個音ê差別就是送氣， ㄉ 無送氣，ㄊài送氣。Stop ê t 唸做ㄉ，kap台語「豬」之ㄉ 是同一個 t，無送氣，世界通用ê國際音標 (IPA) 就是寫做 t；top ê t kap台語「頭」之 ㄊ是同一個音，送氣，IPA 就寫做 th。英語一律寫做 t，因為在英語「送氣」m̄是chit-ê語言ê特色 (feature)，意思就是送氣無送氣並無有分別意義，但是台語chit-ê語言，送氣是伊ê特色，伊用chit-ê來分別意義。比如講，té 是短，thé 是體，意思完全無仝。如果咱教gín-á送氣chit-ê觀念（其實不難，英文老師就是拿一張小紙khǹg tī嘴唇前，一看小紙吹動就知有送氣，無動就是無送氣），p. t, k 三個音，加上送氣chit-ê符號 h，只教四個音標，通用卻要一個音教一個符號（所謂一個蘿蔔一個坑），tio̍h教六個音標，án-ne是siáng比較容易？再講，如果m̄教送氣chit-ê觀念，gín-á學英語一定會kā無送氣ê stop 唸做通用音標ê t, 唸做有送氣，到時學tio̍h ê是錯誤ê英語，如何對家長交待？

「厚」讀做 gau？英語是án-ne讀ê嗎？英語ê go 難道讀做ㄍㄛ嗎？V 英語裡可能唸做 b嗎？ Q 可能唸做g嗎？Bh 或者 gh 英語怎樣唸ah？B kap g tī英語ê國際音標lóng是表示濁音 (有聲，voiced)，lín竟然the̍h來標是清音 (無聲，voiceless)，如此反世界潮流，反英語習慣，lín想kā台灣人ê英語教成什麼英語ah？Lín就行行善事吧，外行mài來領導內行好m̄好？Lín牙醫ê專業、心理學ê專業、歷史學ê專業、統計學ê專業（lóng是通用音標大將ê專業）阮lóng尊重lín，但也請留hō͘阮語言學專業人士發揮ê空間吧。這m̄是tó一套音標好不好ê問題，而是對(tio̍h)m̄對ê問題ah！對kap錯如何可以並存？

通用音標一再宣稱易教易學，問題是如果教錯，jú容易教容易學jú慘。何況，其容易教容易學也不過是一個pián-sian-á(幌子)。
（作者是夏威夷大學語言學博士，前哈佛大學台語教授，現任教台師大台文所）