《生活e5台語，台語e5生活》

 | | | 轉寄

白話字tī教會內v.s.教會外

作者 Chuniok 2005.11.13

台灣長老教會對保存台語有不可否認ê功勞，但he是咱前一代ê努力成果，咱chit代卻成做台語白話字ê殺手。

2001年九月李勤岸博士受聘來哈佛大學教台語，伊mā受邀請來波士頓台灣基督教會ê成人主日學教阮台語。我tam-tio̍h母語ê滋味hiah-ni̍h甘甜，從án-ne投入台語文運動，感覺拯救台語是咱chit代ê責任。 2002年暑假，我跟tòe李勤岸教授轉來台灣參加各種ê台語營，tú-tio̍h人to̍h展講我是長老教會ê會友；但我得tio̍h ê回應是：「Lín長老教會上無路用，干單一個鄭兒玉牧師有teh推廣白話字！」當時koh發見台灣羅馬字協會ê會員絕大部分lóng是非長老教會基督徒，我從án-ne lóng m̄敢koh講我是長老教會ê會友。

我每pái轉來台灣，lóng chhōe機會來推廣白話字台語文，教會內ê會友反應真冷淡，甚至反面講華語to̍h真好勢用，台語會曉講to̍h好，thài-tio̍h koh學台灣羅馬字？我講bē曉讀寫台語ê人mā是台語ê文盲，hiah-ê人無感覺台語文盲ê悲哀，chit種放棄家己母語ê人，干單thang 用「無藥醫」來形容。有一位台灣神學院博士班ê會友kā我講，白話字是必修科，但大家lóng想辦法應付應付，我聽了強boeh吐血，講咱chit代是白話字ê殺手，實在無過分lah!

2002年去馬偕ê故鄉遊學，自認為是馬偕研究ê專家ê陳長老來做導遊，伊確實對馬偕有徹底ê研究，但伊提供資料ê馬偕紀念碑頂面ê馬偕夫人ê名寫做 “Tiuⁿ Chhang-miâⁿ”，hit-ê “miâ”加一個鼻音記號to̍h m̄-tio̍h,伊koh辯解講án-ne外國人才看有，我無話thang講。台灣長老教會歷史大部分是白話字ê文獻，伊講伊無精通白話字，ē-tàng成做馬偕研究ê專家，實在有伊ê撇步。

最近出版《聖詩歌─台灣第一本教會聖詩的歷史溯源》ê著者，伊將德文寫ê博士論文用華語改寫來出版ê用心令人佩服。遺憾ê是白話字ê漢譯部分，其實漢字翻寫kap華譯混雜，實在難得了解真正意義，甚至有漏譯，失錯ê所在濟kah非常離譜。伊無先學會曉白話字，有法度以白話字歷史文獻來完成伊ê博士論文，mā是真天才。伊若學習曹永和為tio̍h深入研究台灣歷史認真讀荷蘭語ê精神，kā白話字讀hō͘伊徹底，án-ne來做教會聖詩歷史ê研究可能會koh khah深入。

Taⁿ請來看教會外ê人。台語文ê大作家陳雷為tio̍h boeh用台語寫作，認真kā白話字學kah真傳神，人人合意讀伊ê作品。李慶雲教授為tio̍h boeh將伊早期ê台語歌作品kap當時ê台語歌謠用台語記錄落來，伊七十歲才學白話字，結果伊有達tio̍h伊ê心願，將寶貴ê台語資產留hō͘囝孫後代。

彰化縣田中國校ê簫平治老師為tio̍h boeh用台語寫作，四界chhōe台語ê書寫法，當伊chhōe-tio̍h白話字了後就認真學習探討，伊ê 「鹹酸甜台文工作室 網站」，ē-sái講是台語教學相當齊全koh是人人o-ló ê網站。伊mā是教育部國語推廣委員會台語組ê委員，伊是唯一無博士學位ê委員，伊ê成就實在令人感歎！

最近真歡喜tùi總會電子報知影總會boeh開始「白話字種子教師基礎班」ê招生，希望長老教會趕緊kā早期白話字ê榮譽the̍h tò-tńg來，chiah bē對不起咱信仰先輩對台語白話字ê大貢獻，大家phah拚來拯救失落ê白話字。