《綠色短評》

 | | | 轉寄

台灣音樂家鮑恆毅ê風骨！

作者 李南衡, ChoânTâijī/全台字 by Chng Hūiphêng 2022.07.31

Choânbîn Tâioânjī pán/全民台灣字版簡稱ChoânTâiJī

《 Le̍ksek Toánphêng 》 Lí Lâmhêng


Tâioân imga̍k ka Pau Hênggē ê hongkut!

Chhitgoe̍h chhechhit àm sinbûn pòtō, kiⁿî Tekkok kah Tiongkok khèngchiok kiànkau 50 chiunî, kok só͘chāi lio̍ksio̍k ē kípān chi̍tkóa kìliām imga̍khōe, Tâioân lú AU chíhui ka Pau Hênggē chòekīn ū chiap tio̍h iauiok i chi̍t tiûⁿ "Tiong Tek kiànkau chiunî kìliām imga̍khōe" ê chíhui, iauchhiáⁿ tanūi kóng kiphiò tòasiok choân pau, koh thiaⁿkóng iánchhut siālé chiâⁿ tōa pau. Pau Hênggē kóng,"góa tongjiân chin kámsiā in ū siūⁿtio̍h góa. Chit kiāⁿ tāichì Tiongkok ê li̍ptiûⁿ tongjiân jīnûi Tâioân ' kāngkhoán’ sekha̍p khèngchiok, tānsī góa sī Tâioân lâng, góa siūⁿ góa bô sekha̍p." Pau Hênggē kóng,"suijiân chit piàn iánchhut ê kokka Tekkok sī góa siōng siūⁿ beh chengchhú ê só͘chāi, tānsī tiantò sī góa che itseng kīchoa̍t kòe siōng kín, kīchoa̍t liáu siōng assari ê chi̍t piàn iauiok. Siūⁿ kàu chia, góa kámsiā ha̍kgia̍p chòeāu chi̍t nî pòaⁿ, góa ê kokka Tâioân/ Tionghôa Bînkok Kàuio̍kpō͘ liûha̍k chióngha̍kkim kā góa ê chaipôe. "Só͘í Pau Hênggē sûisî chin khehkhì kā kīchoa̍t, jîchhiáⁿ chiâⁿ ū hongtō͘ kā iauiok kàisiāu hō͘ i ê lēnggōa chi̍t ūi Tiongkok pêngiú. I kóng,"Chitsìlâng nāsī ū kihōe kiànchèng tio̍h Tâi Tek kiànkau, chúnkóng bô jīmhô pòsiúⁿ, mā hoaⁿhí beh khì tàu poaⁿ íá, tàu giâ phó͘kè, ē tàng hōnghiàn kakī siósió ê khùila̍t."

　　 Kiⁿî saⁿcha̍p hòe ê Pau Hênggē sī phêⁿô͘ lâng,Mákeng kotiong pitgia̍p liáu khó ji̍p Kokli̍p Tāipak Kàuio̍k Tāiha̍k imga̍khē, 2014 nî pitgia̍p, 2016 nî khì Austria Ûṳāla̍p Kokli̍p Imga̍k kah Piáuián Gēsu̍t Tāiha̍k kongtha̍k koánhiânga̍k chíhui kah ha̍p chhiùⁿ chíhui siang se̍ksū. Ū tittio̍h kai tāiha̍k koánhiânga̍k chíhui chòeko iánchàu bûnpêng, bat tī Ûṳāla̍p Jînbîn Koakio̍kīⁿ téng Kio̍kīⁿ tamjīm chō͘lí chíhui. 2019 nî cha̍pjīgoe̍h cha̍pgō͘, tī Pholân chhamka tē 8 kài "Towards Polyphony" kokchè ha̍pchhiùⁿ chíhui tōasài, i chi̍t hēchhiú tittio̍h thâuchióng, Siōnghó Monteverdi Chhoansekchióng, Siōnghó Hiāntāi Imga̍k Chhoansekchióng íki̍p Siōnghó Pholân Chokphín Chhoansekchióng téng kúi hāng tōachióng. Suijiân i kokchek chùbêng "Tâioân/Austria", tānsī chúpān tanūi koaⁿhong bīnchheh tah tô͘ piausī "Tâioân lâi ê Pau Hênggē". Hit nî saⁿgoe̍h i tī Slovenia ê Aegis Carminis Kokchè Ha̍pchhiùⁿ Chíhui Tōasài tittio̍h tē 2 miâ, Siōnghó Slovenia Chokphín Chhoansek chióng, kâng nî chhitgoe̍h, i tī Romania tittio̍h tē 2 kài Bucharest Imga̍k Ha̍kīⁿ Kokchè Chíhui Tōasài Te̍kpia̍t chióng. 2019 nî ēsái kóng sī Pau Hênggē tōa hongsiu ê chi̍t nî. 2021 nî saⁿgoe̍h cha̍pit chì cha̍psì, siū iauchhiáⁿ khì Slovenia tamjīm Kokchè Chhengliân Imga̍kcheh kah sái sū chùcheh kángsu.

　　Pau Hênggē suijiân kheh ku háigōa, tānsī i bô kā kò͘hiong Tâioân pàng bē kìtit. Kūnî (2021) cha̍pitgoe̍h jīcha̍p, Pau Hênggē í Khehsek Chíhui sinhūn kah Tāipak Seklāi Ha̍pchhiùⁿthoân, tī Kokka Iánchàuthiaⁿ kiōngtông oânsêng 《 Si kah Koa ê Tongtāi Hôehiáng 》Imga̍khōe, che sī iû chhit pō͘ í tongtāi Tâioân sijîn sichoh phó͘khek ê tongtāi ha̍pchhiùⁿ chokphín. Kiⁿî pehgoe̍h jīpeh chì saⁿcha̍p it, Pau Hênggē ē tī Kohiông Ūibúiâⁿ Kokka Gēsu̍t Bûnhòa Tiongsim Imga̍kthiaⁿ, kah Tāipak Seklāi Ha̍pchhiùⁿthoân piáuián 《 Hoathiān ‧ American》 imga̍khōe.

Tâioân ē tàng ū Pau Hênggē chiahni̍h kia̍tchhut, chiahni̍h ū hongkut ê imga̍kka, lán Tâioân lâng si̍tchāi chin hoaⁿhí! 　　(220722)


Pe̍h-ōe-jī-pán/白話字版


《 Le̍k-sek Toán-phêng 》 Lí Lâm-hêng


Tâi-oân im-ga̍k -ka Pau Hêng-gē ê hong-kut!

Chhit-goe̍h chhe-chhit àm sin-bûn pò-tō, kin-nî Tek-kok kah Tiong-kok khèng-chiok kiàn-kau 50 chiu-nî, kok só͘-chāi lio̍k-sio̍k ē kí-pān chi̍t-kóa kì-liām im-ga̍k-hōe, Tâi-oân lú AU chí-hui -ka Pau Hêng-gē chòe-kīn ū chiap tio̍h iau-iok i chi̍t tiûⁿ "Tiong Tek kiàn-kau chiu-nî kì-liām im-ga̍k-hōe" ê chí-hui, iau-chhiáⁿ tan-ūi kóng ki-phiò tòa-siok choân pau, koh thiaⁿ-kóng ián-chhut siā-lé chiâⁿ tōa pau. Pau Hêng-gē kóng,"góa tong-jiân chin kám-siā in ū siūⁿ-tio̍h góa. Chit kiāⁿ tāi-chì Tiong-kok ê li̍p-tiûⁿ tong-jiân jīn-ûi Tâi-oân ' kāng-khoán’ sek-ha̍p khèng-chiok, tān-sī góa sī Tâi-oân lâng, góa siūⁿ góa bô sek-ha̍p." Pau Hêng-gē kóng,"sui-jiân chit piàn ián-chhut ê kok-ka Tek-kok sī góa siōng siūⁿ beh cheng-chhú ê só͘-chāi, tān-sī tian-tò sī góa che it-seng kī-choa̍t kòe siōng kín, kī-choa̍t liáu siōng assari ê chi̍t piàn iau-iok. Siūⁿ kàu chia, góa kám-siā ha̍k-gia̍p chòe-āu chi̍t nî pòaⁿ, góa ê kok-ka Tâi-oân/ Tiong-hôa Bîn-kok Kàu-io̍k-pō͘ liû-ha̍k chióng-ha̍k-kim kā góa ê chai-pôe. "Só͘-í Pau Hêng-gē sûi-sî chin kheh-khì kā kī-choa̍t, jî-chhiáⁿ chiâⁿ ū hong-tō͘ kā iau-iok kài-siāu hō͘ i ê lēng-gōa chi̍t ūi Tiong-kok pêng-iú. I kóng,"Chit-sì-lâng nā-sī ū ki-hōe kiàn-chèng tio̍h Tâi Tek kiàn-kau, chún-kóng bô jīm-hô pò-siúⁿ, mā hoaⁿ-hí beh khì tàu poaⁿ í-á, tàu giâ phó͘-kè, ē tàng hōng-hiàn ka-kī sió-sió ê khùi-la̍t."

　　 Kin-nî saⁿ-cha̍p hòe ê Pau Hêng-gē sī phêⁿ-ô͘ lâng,Má-keng ko-tiong pit-gia̍p liáu khó ji̍p Kok-li̍p Tāi-pak Kàu-io̍k Tāi-ha̍k im-ga̍k-hē, 2014 nî pit-gia̍p, 2016 nî khì Austria Ûi-iā-la̍p Kok-li̍p Im-ga̍k kah Piáu-ián Gē-su̍t Tāi-ha̍k kong-tha̍k koán-hiân-ga̍k chí-hui kah ha̍p chhiùⁿ chí-hui siang se̍k-sū. Ū tit-tio̍h kai tāi-ha̍k koán-hiân-ga̍k chí-hui chòe-ko ián-chàu bûn-pêng, bat tī Ûi-iā-la̍p Jîn-bîn Koa-kio̍k-īⁿ téng Kio̍k-īⁿ tam-jīm chō͘-lí chí-hui. 2019 nî cha̍p-jī-goe̍h cha̍p-gō͘, tī Pho-lân chham-ka tē 8 kài "Towards Polyphony" kok-chè ha̍p-chhiùⁿ chí-hui tōa-sài, i chi̍t hē-chhiú tit-tio̍h thâu-chióng, Siōng-hó Monteverdi Chhoan-sek-chióng, Siōng-hó Hiān-tāi Im-ga̍k Chhoan-sek-chióng í-ki̍p Siōng-hó Pho-lân Chok-phín Chhoan-sek-chióng téng kúi hāng tōa-chióng. Sui-jiân i kok-chek chù-bêng "Tâi-oân/Austria", tān-sī chú-pān tan-ūi koaⁿ-hong bīn-chheh tah tô͘ piau-sī "Tâi-oân lâi ê Pau Hêng-gē". Hit nî saⁿ-goe̍h i tī Slovenia ê Aegis Carminis Kok-chè Ha̍p-chhiùⁿ Chí-hui Tōa-sài tit-tio̍h tē 2 miâ, Siōng-hó Slovenia Chok-phín Chhoan-sek- chióng, kâng nî chhit-goe̍h, i tī Romania tit-tio̍h tē 2 kài Bucharest Im-ga̍k Ha̍k-īⁿ Kok-chè Chí-hui Tōa-sài Te̍k-pia̍t- chióng. 2019 nî ē-sái kóng sī Pau Hêng-gē tōa hong-siu ê chi̍t nî. 2021 nî saⁿ-goe̍h cha̍p-it chì cha̍p-sì, siū iau-chhiáⁿ khì Slovenia tam-jīm Kok-chè Chheng-liân Im-ga̍k-cheh kah sái- sū chù-cheh káng-su.

　　Pau Hêng-gē sui-jiân kheh ku hái-gōa, tān-sī i bô kā kò͘-hiong Tâi-oân pàng bē kì-tit. Kū-nî (2021) cha̍p-it-goe̍h jī-cha̍p, Pau Hêng-gē í Kheh-sek Chí-hui sin-hūn kah Tāi-pak Sek-lāi Ha̍p-chhiùⁿ-thoân, tī Kok-ka Ián-chàu-thiaⁿ kiōng-tông oân-sêng 《 Si kah Koa ê Tong-tāi Hôe-hiáng 》Im-ga̍k-hōe, che sī iû chhit pō͘ í tong-tāi Tâi-oân si-jîn si-choh phó͘-khek ê tong-tāi ha̍p-chhiùⁿ chok-phín. Kin-nî peh-goe̍h jī-peh chì saⁿ-cha̍p it, Pau Hêng-gē ē tī Ko-hiông Ūi-bú-iâⁿ Kok-ka Gē-su̍t Bûn-hòa Tiong-sim Im-ga̍k-thiaⁿ, kah Tāi-pak Sek-lāi Ha̍p-chhiùⁿ-thoân piáu-ián 《 Hoat-hiān ‧ American》 im-ga̍k-hōe.

Tâi-oân ē tàng ū Pau Hêng-gē chiah-ni̍h kia̍t-chhut, chiah-ni̍h ū hong-kut ê im-ga̍k-ka, lán Tâi-oân lâng si̍t-chāi chin hoaⁿ-hí! 　　(220722)



七月初七暗新聞報導，今年德國kah中國慶祝建交50週年，各所在陸續會舉辦一寡紀念音樂會，台灣旅歐指揮家鮑恆毅最近有接tio̍h邀約伊一場「中德建交週年紀念音樂會」ê指揮，邀請單位講機票住宿（tòa-siok）全包，koh聽講演出謝禮chiâⁿ大包。鮑恆毅講：「我當然真感謝in有想tio̍h我。Chit件tāi-chì中國ê立場當然認為台灣『仝款』適合慶祝，但是我是台灣人，我想我不適合。」鮑恆毅講，「雖然chit遍演出ê國家德國是我上想beh爭取ê所在，但是顚倒是我che一生拒絕過上緊、拒絕了上assari（阿沙力）ê一遍邀約。想到chia，我感謝學業最後一年半，我ê國家台灣／中華民國教育部留學獎學金kā我ê栽培。」所以鮑恆毅隨時真客氣kā拒絕，而且chiâⁿ有風度kā邀約介紹hō͘伊ê另外一位中國朋友。伊講，「Chit世人若是有機會見證tio̍h台德建交，準講無任何報償，mā 歡喜beh去鬥搬椅á、鬥夯譜架，會tàng奉獻家己小小ê氣力。」

　　今年三十歲ê鮑恆毅是澎湖人，馬公（Má-keng）高中畢業了考入國立台北教育大學音樂系，2014年畢業，2016年去奧地利維也納國立音樂kah表演藝術大學攻讀管絃樂指揮kah合唱指揮雙碩士。有得tio̍h該大學管絃樂指揮最高演奏文憑，bat tī維也納人民歌劇院等劇院擔任助理指揮。2019年十二月十五，tī波蘭參加第8屆「Towards Polyphony」國際合唱指揮大賽，伊一下手得tio̍h頭獎、最佳蒙台威爾第詮釋獎、最佳現代音樂詮釋獎以及最佳波蘭作品詮釋獎等幾項大獎。雖然伊國籍註明「台灣∕奧地利」，但是主辦單位官方面冊貼圖標示「台灣來ê鮑恆毅」。Hit年三月伊tīSlovenia ê Aegis carminis國際合唱指揮大賽得tio̍h第2名、最佳Slovenia作品詮釋獎，仝年七月，伊tīRomania得tio̍h第2屆布加勒斯特（Bucharest）音樂學院國際指揮大賽特別獎。2019年ē-sái講是鮑恆毅大豐收ê一年。2021年三月十一至十四，受邀請去Slovenia擔任國際青年音樂節kah賽事駐節講師。

　　鮑恆毅雖然客居海外，但是伊無kā故鄉台灣放bē記得。舊年（2021）十一月二十，鮑恆毅以客席指揮身分kah台北室內合唱團，tī國家演奏廳共同完成《詩kah歌ê當代迴響》音樂會，che是由七部以當代台灣詩人詩作譜曲ê當代合唱作品。今年八月二八至三十一，鮑恆毅會tī高雄衛武營國家藝術文化中心音樂廳，kah台北室內合唱團表演《發現‧亞美利堅》音樂會。

台灣會tàng有鮑恆毅chiah-nih傑出、chiah-nih有風骨ê音樂家，咱台灣人實在真歡喜！　　(220722)