《綠色短評》

 | | | 轉寄

出兵保護台灣，拜登總統是表明決心！

作者 李南衡, ChoânTâijī/全台字 by Chng Hūiphêng 2022.06.12

Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　　 Lí Lâmhêng

　 Chhutpeng póhō͘ Tâioân,拜登chóngthóng sī piáubêng koatsim!

　　 Bíkok chóngthóng拜登 chiūjīm ílâi, thâuchi̍tpiàn lâi Achiu hóngbūn. Gō͘goe̍h jīsaⁿ,拜登chóngthóng kah Ji̍tpún 岸田文雄（Kishida Fumio）siúsiòng tī liânha̍p kìchiáhōe téngbīn, sianghong lóng têngsin Tâioân anchoân ê tiōngiàusèng. Ū chi̍t ūi kìchiá mn̄g拜登chóngthóng,"siatsú Tiongkok ji̍pchhim Tâioân, lí goānì ūi póhō͘ Tâioân kàiji̍p kunsū hêngtōng bò͘?" 拜登 chóngthóng ti̍tpeh ìn kóng,"sī." Chit ūi kìchiá koh tui mn̄g,"lí goānì?" 拜登 chóngthóng ìn kóng,"Che sī goán chòkòe ê sênglo̍k."

　　拜登chóngthóng pēng bô tùi chiahê ōe ū chò siáⁿmi̍h soatbêng a̍h sī têngchheng. I chitê sengbêng hō͘ chi̍tkóa tī kìchiáhōe hiāntiûⁿ ê Bíkok koaⁿoân tio̍hkiaⁿ, in bô siūⁿtio̍h chóngthóng ē piáuta̍t chhut chiahni̍h ti̍tchiap chiahni̍h pe̍h ê koatsim. Bíkok ithiòng kéngkò Tiongkok m̄thang tùi Tâioân tāngbú, tānsī siatsú nā hoatseng chit chióng chōnghóng ê sî, thêngtō͘ siōng ē ū gōa tōa oânchō͘ Tâioân, Bíkok khólêng sī ūitio̍h chiànlio̍k ê bo̍ktek, ithiòng lóng sī hâmhâm hô͘hô͘, bôngbū bô chheng ê thāitō͘.

Pe̍hkiong kianchhî kóng拜登 chóngthóng pēng bô phah phòa tn̂gkî ílâi ê chèngchhek. Che pēng m̄sī拜登 chóngthóng thâuchi̍t piàn àmsī Bíkok beh ūi Tâioân lâi chiàn, tānsī i téng piàn hoatpiáu lūisū giânlūn ê sî, mûithé lóng kā khòaⁿchoh sī tiánhêng ê拜登 sek "kháu gō͘". Chit piàn mûithé engkai chin chhengchhó i sī kóng chinê. I tī Tangkiaⁿ kiôngtiāu kóng, tùi Tâioân ê ji̍pchhim, ná chhiūⁿ 烏克蘭 chiàncheng ê chailān —— i goānì chháichhú koh khah chē ê chhòsi lâi chó͘chí chit tiûⁿ chailān ê hoatseng. I hit tongsî hō͘ Gôlô chóngthóng 浮丁siuⁿchē líiû khì hoâigî Bíkok tùi 烏克蘭ê chichhî la̍tthâu. Só͘í i chit piàn ài tùi Tiongkok Xíjìnpíng chúse̍k kóng chhengchhó.

　　 Bíkok kah Tiongkok tī "chi̍tê Tiongkok" téngbīn ū jīnti siōng ê chengchha. Bíkok Kokbūīⁿ hoatgiânjîn 普萊斯（Ned Price）tī Twitter téngbīnsiōng hoánpo̍k Tiongkok kóng,"Tionghôa Jînbîn Kiōnghôkok kèsio̍k kongkhai chhògō͘ biâusu̍t Bíkok ê chèngchhek. Bíkok pēng bô tôngì Tionghôa Jînbîn Kiōnghôkok ê chi̍tê Tiongkok goânchek. Goán kútn̂g ílâi bô hun tóngphài itti̍t piàⁿsì tī Tâioân Koanhēhoat, saⁿê liânha̍p kongpò kah la̍k hāng póchèng chíín ēbīn ê chi̍tê Tiongkok chèngchhek."Sêngjīn" chi̍tê Tiongkok" sī kah Tiongkok kiànli̍p gōakau koanhē ê kichhó͘. Tī chitê chèngchhek ēbīn, Bíkok sêngjīn Tiongkok, kah Tiongkok kiànkau jîchhiáⁿ tn̄gchoán liáu kah Tâioân ê chèngsek gōakau koanhē. Tiongkok chènghú kakī só͘ kóng ê "chi̍tê Tiongkok" goânchek sī, Tâioân sī Tiongkok putkhó hunkoah ê chi̍tpō͘hūn, kuibóe tio̍h kah Tiongkok tāilio̍k thóngit. Tānsī Bíkok piáusī chi̍tê Tiongkok chèngchhek pēng m̄ sī tùi pakkiaⁿ li̍ptiûⁿ ê jīnkhó, sūsi̍t siōng, chokûi chèngchhek ê chi̍tpō͘hūn, Washengton kah Tâioân itti̍t ū póchhî "liônghó ê hui koaⁿhong" koanhē, paukoat kèsio̍k hiòng Tâioân chhutsiū búkhì, pangchō͘ Tâioân thêseng chūōe lêngle̍k.

"Tâioân Koanhēhoat" pēng bô iaukiû Bíkok tī Tâioân siū kongkek ê sî tio̍h kàiji̍p Tâioân ê hôngōe, kantāⁿ kuitēng Bíkok ìn hiòng Tâioân thêkiong chūōe ê búkhì. Paukoat 特朗普 chāilāi ê le̍kjīm Bíkok chóngthóng lóng bat àmsī Bíkok ē ūi Tâioân lâi chiàn, tānsī lóng thiau kang hâmhô͘ bô ài kóng chhengchhó.

Chit piàn Bíkok拜登 chóngthóng ti̍t kóng bêng kóng ē chhut peng póhō͘ Tâioân, sī piáubêng koatsim. (220527)


Chù,拜登　烏克蘭　普萊斯　特朗普　 chhiáⁿ liām Hôagí


Pe̍h-ōe-jī-pán/白話字版

《 Le̍k-sek toán-phêng 》　　 Lí Lâm-hêng

　 Chhut-peng pó-hō͘ Tâi-oân,拜登chóng-thóng sī piáu-bêng koat-sim!

　　 Bí-kok chóng-thóng拜登 chiū-jīm í-lâi, thâu-chi̍t-piàn lâi A-chiu hóng-būn. Gō͘-goe̍h jī-saⁿ,拜登chóng-thóng kah Ji̍t-pún 岸田文雄（Kishida Fumio）siú-siòng tī liân-ha̍p kì-chiá-hōe téng-bīn, siang-hong lóng têng-sin Tâi-oân an-choân ê tiōng-iàu-sèng. Ū chi̍t ūi kì-chiá mn̄g拜登chóng-thóng,"siat-sú Tiong-kok ji̍p-chhim Tâi-oân, lí goān-ì ūi pó-hō͘ Tâi-oân kài-ji̍p kun-sū hêng-tōng bò͘?" 拜登 chóng-thóng ti̍t-peh ìn kóng,"sī." Chit ūi kì-chiá koh tui mn̄g,"lí goān-ì?" 拜登 chóng-thóng ìn kóng,"Che sī goán chò-kòe ê sêng-lo̍k."

　　拜登chóng-thóng pēng bô tùi chiah-ê ōe ū chò siáⁿ-mi̍h soat-bêng a̍h sī têng-chheng. I chit-ê seng-bêng hō͘ chi̍t-kóa tī kì-chiá-hōe hiān-tiûⁿ ê Bí-kok koaⁿ-oân tio̍h-kiaⁿ, in bô siūⁿ-tio̍h chóng-thóng ē piáu-ta̍t chhut chiah-ni̍h ti̍t-chiap chiah-ni̍h pe̍h ê koat-sim. Bí-kok it-hiòng kéng-kò Tiong-kok m̄-thang tùi Tâi-oân tāng-bú, tān-sī siat-sú nā hoat-seng chit chióng chōng-hóng ê sî, thêng-tō͘ siōng ē ū gōa tōa oân-chō͘ Tâi-oân, Bí-kok khó-lêng sī ūi-tio̍h chiàn-lio̍k ê bo̍k-tek, it-hiòng lóng sī hâm-hâm hô͘-hô͘, bông-bū bô chheng ê thāi-tō͘.

Pe̍h-kiong kian-chhî kóng拜登 chóng-thóng pēng bô phah phòa tn̂g-kî í-lâi ê chèng-chhek. Che pēng m̄-sī拜登 chóng-thóng thâu-chi̍t piàn àm-sī Bí-kok beh ūi Tâi-oân lâi chiàn, tān-sī i téng piàn hoat-piáu lūi-sū giân-lūn ê sî, mûi-thé lóng kā khòaⁿ-choh sī tián-hêng ê拜登 sek "kháu gō͘". Chit piàn mûi-thé eng-kai chin chheng-chhó i sī kóng chin-ê. I tī Tang-kiaⁿ kiông-tiāu kóng, tùi Tâi-oân ê ji̍p-chhim, ná chhiūⁿ 烏克蘭 chiàn-cheng ê chai-lān —— i goān-ì chhái-chhú koh khah chē ê chhò-si lâi chó͘-chí chit tiûⁿ chai-lān ê hoat-seng. I hit tong-sî hō͘ Gô-lô chóng-thóng 浮丁siuⁿ-chē lí-iû khì hoâi-gî Bí-kok tùi 烏克蘭ê chi-chhî la̍t-thâu. Só͘-í i chit piàn ài tùi Tiong-kok Xíjìnpíng chú-se̍k kóng chheng-chhó.

　　 Bí-kok kah Tiong-kok tī "chi̍t-ê Tiong-kok" téng-bīn ū jīn-ti siōng ê cheng-chha. Bí-kok Kok-bū-īⁿ hoat-giân-jîn 普萊斯（Ned Price）tī Twitter téng-bīn-siōng hoán-po̍k Tiong-kok kóng,"Tiong-hôa Jîn-bîn Kiōng-hô-kok kè-sio̍k kong-khai chhò-gō͘ biâu-su̍t Bí-kok ê chèng-chhek. Bí-kok pēng bô tông-ì Tiong-hôa Jîn-bîn Kiōng-hô-kok ê chi̍t-ê Tiong-kok goân-chek. Goán kú-tn̂g í-lâi bô hun tóng-phài it-ti̍t piàⁿ-sì tī Tâi-oân Koan-hē-hoat, saⁿ-ê liân-ha̍p kong-pò kah la̍k hāng pó-chèng chí-ín ē-bīn ê chi̍t-ê Tiong-kok chèng-chhek."Sêng-jīn" chi̍t-ê Tiong-kok" sī kah Tiong-kok kiàn-li̍p gōa-kau koan-hē ê ki-chhó͘. Tī chit-ê chèng-chhek ē-bīn, Bí-kok sêng-jīn Tiong-kok, kah Tiong-kok kiàn-kau jî-chhiáⁿ tn̄g-choán liáu kah Tâi-oân ê chèng-sek gōa-kau koan-hē. Tiong-kok chèng-hú ka-kī só͘ kóng ê "chi̍t-ê Tiong-kok" goân-chek sī, Tâi-oân sī Tiong-kok put-khó hun-koah ê chi̍t-pō͘-hūn, kui-bóe tio̍h kah Tiong-kok tāi-lio̍k thóng-it. Tān-sī Bí-kok piáu-sī chi̍t-ê Tiong-kok chèng-chhek pēng m̄ sī tùi pak-kiaⁿ li̍p-tiûⁿ ê jīn-khó, sū-si̍t siōng, chok-ûi chèng-chhek ê chi̍t-pō͘-hūn, Washengton kah Tâi-oân it-ti̍t ū pó-chhî "liông-hó ê hui koaⁿ-hong" koan-hē, pau-koat kè-sio̍k hiòng Tâi-oân chhut-siū bú-khì, pang-chō͘ Tâi-oân thê-seng chū-ōe lêng-le̍k.

"Tâi-oân Koan-hē-hoat" pēng bô iau-kiû Bí-kok tī Tâi-oân siū kong-kek ê sî tio̍h kài-ji̍p Tâi-oân ê hông-ōe, kan-tāⁿ kui-tēng Bí-kok ìn hiòng Tâi-oân thê-kiong chū-ōe ê bú-khì. Pau-koat 特朗普 chāi-lāi ê le̍k-jīm Bí-kok chóng-thóng lóng bat àm-sī Bí-kok ē ūi Tâi-oân lâi chiàn, tān-sī lóng thiau kang hâm-hô͘ bô ài kóng chheng-chhó.

Chit piàn Bí-kok拜登 chóng-thóng ti̍t kóng bêng kóng ē chhut peng pó-hō͘ Tâi-oân, sī piáu-bêng koat-sim. (220527)


Chù,拜登　烏克蘭　普萊斯　特朗普　 chhiáⁿ liām Hôa-gí


　　美國總統拜登就任以來，頭一遍來亞洲訪問。五月二三，拜登總統kah日本岸田文雄（Kishida Fumio）首相tī聯合記者會頂面，雙方lóng重申台灣安全ê重要性。有一位記者問拜登總統，「設使中國入侵台灣，你願意為保護台灣介入軍事行動嗎？」拜登總統直剖應講：「是。」Chit位記者koh追問：「你願意？」拜登總統應講：「Che是阮做過ê承諾。」

　　拜登總統並無對chiah-ê話有做啥物說明a̍h是澄清。伊chit-ê聲明hō͘一寡tī記者會現場ê美國官員tio̍h驚，in無想tio̍h總統會表達出chiahni̍h直接chiahni̍h白ê決心。美國一向警告中國m̄-thang對台灣動武，但是設使若發生chit種狀況ê時，程度上會有gōa大援助台灣，美國可能是為tio̍h戰略ê目的，一向lóng是含含糊糊、濛霧無清ê態度。

白宫堅持講拜登總統並無打破長期以來ê政策。Che並m̄是拜登總統頭一遍暗示美國beh為台灣來戰，但是伊頂遍發表類似言論ê時，媒體lóng kā看作是典型ê拜登式「口誤」。Chit遍媒體應該真清楚伊是講真ê。他tī東京强调講，對台灣ê入侵，那像烏克蘭戰爭ê災難——伊願意採取koh khah chē ê措施來阻止chit場災難ê發生。伊hit當時hō͘俄羅總統浮丁siuⁿchē理由去懷疑美國對烏克蘭ê支持力頭。所以伊chit遍愛對中國習近平主席講清楚。

　　美國kah中國tī「一個中國」頂面有認知上ê增差。美國國務院發言人普萊斯（Ned Price）tīTwitter頂面上反駁中國講：「中華人民共和國繼續公開錯誤描述美國ê政策。美國並無同意中華人民共和國ê一個中國原則。阮久長以來無分黨派一直拼勢tī台灣關係法、三個聯合公報kah六項保證指引下面ê一個中國政策。」承認「一個中國」是kah中國建立外交關係ê基礎。Tīchit-ê政策下面，美國承認中國、kah中國建交而且斷絶了kah台灣ê正式外交關係。中國政府家己所講ê「一個中國」原則是，台灣是中國不可分割ê一部分，歸尾tio̍h kah中國大陸統一。但是美國表示一個中國政策並m̄是對北京立場ê認可，事實上，作為政策ê一部分，華盛頓kah台灣一直有保持「良好ê非官方」關係，包括繼續向台灣出售武器，幫助台灣提升自衛能力。

「台灣關係法」並無要求美國tī台灣受攻擊ê時tio̍h介入台灣ê防衛，干單規定美國應向台灣提供自衛ê武器。包括特朗普在内ê歷任美國總統lóng bat 暗示美國會為台灣來戰，但是lóng thiau工含糊無愛講清楚。

Chit遍美國拜登總統直講明講會出兵保護台灣，是表明決心。 (220527)


註：拜登　　烏克蘭　　普萊斯　　特朗普　　　請唸華語