《綠色短評》

 | | | 轉寄

俄羅做賊，koh teh喝掠賊！

作者 李南衡, ChoânTâijī/全台字 by Chng Hūiphêng 2022.06.05

Choânbîn Tâioânjī pán/全民台灣字版簡稱ChoânTâiJī

Le̍ksek toánphêng 》　　　 Lí Lâmhêng

　　　　　　　　 Gôlô chòchha̍t, koh teh hoah lia̍hchha̍t!

　　 Gō͘goe̍h cha̍psaⁿ, Gôlô gōakau pō͘tiúⁿ 拉夫羅夫（Lavrov） khì Tionga ê 塔吉克（Tajekistan） chhamka "To̍kli̍p Kokka Kokhia̍p "（CIS） hōegī, tī hōe āu ê kìchiá hōe i khuiphàu chí khòng "Aubêng" ū "chhimlio̍ksèng" koh "hóchiàn". Goânpún jīgoe̍h jīsì Gôlô ji̍pchhim 烏克蘭ê líiû sī 烏克蘭 siūⁿ beh kaji̍p "Pak Tāiseiûⁿ Kongiok Cho͘chit" kánchheng " Pakiok（NATO）", tānsī chiàncheng íāu, 烏克蘭 itti̍t kiôngtiāu in bôkhólêng chiâⁿchoh " Pakiok " ê sêngoân, tānsī iûgoân ē tōala̍t chhuitōng sinchhiáⁿ kaji̍p "Aubêng". Kám sī ánne Gôlô gōakau pō͘tiúⁿ chiah ē mē "Aubêng" tú siàu?

　　Ùi Gôlô gōakau pō͘tiúⁿ kóng chiahê ōe, lán tio̍h chaiiáⁿ i ô͘giân loāngí. "Auchiu Liânbêng", kánchheng "Aubêng", sī Auchiu to kok kiōngtông kiànli̍p ê chèngtī kah kengchè liânbêng, ū 27 ê sêngoân kok. Siongsìn i goânpún beh mē ê sī " Pakiok", inūi " Pakiok" sī Auchiu kah Pakbí chiu kokka ūi si̍tsi hôngōe ha̍pchok só͘ kiànli̍p ê kokchè cho͘chit, ū tōaliōng hu̍t búkhì kah siôngsiat pō͘tūi, sī sehong ê tiōngiàu kunsū le̍kliōng. " Pakiok" sêngoân kok ū 30 ê. Pakiok kunsū khaichi chiàm sèkài kokhông khaichi ê 70% ísiōng.

　　 Lán lâi khòaⁿ tàuté sī siáⁿ lâng ū "chhimlio̍ksèng" koh "hó chiàn" ? Jīgoe̍h jīsì, Gôlô chhutpeng ji̍p chhim 烏克蘭, pàngtiau káucha̍pla̍k tiámcheng, iā chiūsī sìkang lāi oânchoân chiàmniá 烏克蘭, phài peng phài chiànchhia phài chiànki phài chiànchûn chhimchiàm kehpiah kok 烏克蘭ê léngthó͘, ánne kám bô sǹg sī ū "chhimlio̍ksèng" koh "hó chiàn"?

　　 Chiàncheng tú khaisí ê sî," Pakiok" kokka ēsái kóng sī tiāmtiāmá khòaⁿ, bô chi̍tê kokka chhunchhiú chioân, itti̍t khòaⁿ 烏克蘭 ko͘ kun hùnchiàn, Gôlô tāikun ji̍p chhim, khijîn thài sīm, "Pakiok" chiah chi̍tê chi̍tê ūnsàng siōng sin siōng hó ê búkhì chioân 烏克蘭, hō͘ 烏克蘭 jú phah jú ióng. Kàu kináji̍t ûichí,"Pakiok" iáu bô phài chi̍t peng chi̍t chut khì chān 烏克蘭, só͘ū ê chiànkó lóngchóng sī 烏克蘭 choânthé kun bîn àikok ōekok ê engióng piáuhiān. Hóchhiò ê sī Gôlô soah koài "Aubêng" ū "chhimlio̍ksèng" koh "hó chiàn".

　　 Kàu gō͘goe̍h cha̍pkáu ûichí, Gôlô kun íkeng tīnbông iok 2 bān 8,500 gōalâng, 烏克蘭 kun chhuihúi Gôlô kun 1,254 tâi chiànchhia, 3,063 tâi chngkahchhia, 595 mn̂g hóephàu hēthóng, 199 tâi tokoán hóechìⁿchhia, 93 cho͘ hôngkhong hēthóng, 202 chiah kunki, 1,167 chiah ti̍tsengki , 2,157 tâi koksek chhialióng kah iûkoànchhia, 13 tâi lāmthéng, 455 chiah bôjînki, 43 ê te̍ksû siatpī kah 103 lia̍p sûnhâng huitôaⁿ. Gôlô lio̍khái khongkun chiahni̍h chhámtāng ê súnsit, kám sī Gôlô kun ūitio̍h póūi kakī ê kokka, puthēng tī Gôlô kénglāi hō͘ ū "chhimlio̍ksèng" koh "hó chiàn" ê "Pakiok" kuntūi só͘ phah ê? Tongjiân m̄ sī!

Che sī gō͘goe̍h cha̍pkáu ēpo͘ 烏克蘭 kokhôngpō͘ kongpò͘ siōng sin ê chiànkó thóngkè, 烏克蘭 kokhôngpō͘ kóng, chūchiông Gôlô jīgoe̍h jīsì ji̍pchhim chì gō͘goe̍h cha̍pkáu thàuchá ûichí, 烏克蘭 só͘ kongpò͘ siōng sin ê chiànkó. Lāité khaksi̍t ū chin chē "Pakiok" kokka só͘ chioân ê kok chióng siōng sin ê búkhì, tānsī chiànkó lóng sī 烏克蘭 engióng ê kunbîn chi̍t kiāⁿ chi̍t kiāⁿ kiànli̍p ê. Tongjiân sī chiok bô kántan.

Lán khòaⁿtio̍h Gôlô chòchha̍t, koh teh hoah lia̍hchha̍t! 　　　　(220522)

Chù, 塔吉克　　 烏克蘭　　 chhiáⁿ liām Hôagí


Pe̍h-ōe-jī-pán/白話字版

Le̍k-sek toán-phêng 》　　　 Lí Lâm-hêng

　　　　　　　　 Gô-lô chò-chha̍t, koh teh hoah lia̍h-chha̍t!

　　 Gō͘-goe̍h cha̍p-saⁿ, Gô-lô gōa-kau pō͘-tiúⁿ 拉夫羅夫（Lavrov） khì Tiong-a ê 塔吉克（Tajekistan） chham-ka "To̍k-li̍p Kok-ka Kok-hia̍p "（CIS） hōe-gī, tī hōe āu ê kì-chiá hōe i khui-phàu chí khòng "Au-bêng" ū "chhim-lio̍k-sèng" koh "hó-chiàn". Goân-pún jī-goe̍h jī-sì Gô-lô ji̍p-chhim 烏克蘭ê lí-iû sī 烏克蘭 siūⁿ beh ka-ji̍p "Pak Tāi-se-iûⁿ Kong-iok Cho͘-chit" kán-chheng " Pak-iok（NATO）", tān-sī chiàn-cheng í-āu, 烏克蘭 it-ti̍t kiông-tiāu in bô-khó-lêng chiâⁿ-choh " Pak-iok " ê sêng-oân, tān-sī iû-goân ē tōa-la̍t chhui-tōng sin-chhiáⁿ ka-ji̍p "Au-bêng". Kám sī án-ne Gô-lô gōa-kau pō͘-tiúⁿ chiah ē mē "Au-bêng" tú siàu?

　　Ùi Gô-lô gōa-kau pō͘-tiúⁿ kóng chiah-ê ōe, lán tio̍h chai-iáⁿ i ô͘-giân loān-gí. "Au-chiu Liân-bêng", kán-chheng "Au-bêng", sī Au-chiu to kok kiōng-tông kiàn-li̍p ê chèng-tī kah keng-chè liân-bêng, ū 27 ê sêng-oân kok. Siong-sìn i goân-pún beh mē ê sī " Pak-iok", in-ūi " Pak-iok" sī Au-chiu kah Pak-bí chiu kok-ka ūi si̍t-si hông-ōe ha̍p-chok só͘ kiàn-li̍p ê kok-chè cho͘-chit, ū tōa-liōng hu̍t bú-khì kah siông-siat pō͘-tūi, sī se-hong ê tiōng-iàu kun-sū le̍k-liōng. " Pak-iok" sêng-oân kok ū 30 ê. Pak-iok kun-sū khai-chi chiàm sè-kài kok-hông khai-chi ê 70% í-siōng.

　　 Lán lâi khòaⁿ tàu-té sī siáⁿ lâng ū "chhim-lio̍k-sèng" koh "hó- chiàn" ? Jī-goe̍h jī-sì, Gô-lô chhut-peng ji̍p chhim 烏克蘭, pàng-tiau káu-cha̍p-la̍k tiám-cheng, iā chiū-sī sì-kang lāi oân-choân chiàm-niá 烏克蘭, phài peng phài chiàn-chhia phài chiàn-ki phài chiàn-chûn chhim-chiàm keh-piah kok 烏克蘭ê léng-thó͘, án-ne kám bô sǹg sī ū "chhim-lio̍k-sèng" koh "hó chiàn"?

　　 Chiàn-cheng tú khai-sí ê sî," Pak-iok" kok-ka ē-sái kóng sī tiām-tiām-á khòaⁿ, bô chi̍t-ê kok-ka chhun-chhiú chi-oân, it-ti̍t khòaⁿ 烏克蘭 ko͘ kun hùn-chiàn, Gô-lô tāi-kun ji̍p chhim, khi-jîn thài sīm, "Pak-iok" chiah chi̍t-ê chi̍t-ê ūn-sàng siōng sin siōng hó ê bú-khì chi-oân 烏克蘭, hō͘ 烏克蘭 jú phah jú ióng. Kàu kin-á-ji̍t ûi-chí,"Pak-iok" iáu bô phài chi̍t peng chi̍t chut khì chān 烏克蘭, só͘-ū ê chiàn-kó lóng-chóng sī 烏克蘭 choân-thé kun bîn ài-kok ōe-kok ê eng-ióng piáu-hiān. Hó-chhiò ê sī Gô-lô soah koài "Au-bêng" ū "chhim-lio̍k-sèng" koh "hó chiàn".

　　 Kàu gō͘-goe̍h cha̍p-káu ûi-chí, Gô-lô kun í-keng tīn-bông iok 2 bān 8,500 gōa-lâng, 烏克蘭 kun chhui-húi Gô-lô kun 1,254 tâi chiàn-chhia, 3,063 tâi chng-kah-chhia, 595 mn̂g hóe-phàu hē-thóng, 199 tâi to-koán hóe-chìⁿ-chhia, 93 cho͘ hông-khong hē-thóng, 202 chiah kun-ki, 1,167 chiah ti̍t-seng-ki , 2,157 tâi kok-sek chhia-lióng kah iû-koàn-chhia, 13 tâi lām-théng, 455 chiah bô-jîn-ki, 43 ê te̍k-sû siat-pī kah 103 lia̍p sûn-hâng hui-tôaⁿ. Gô-lô lio̍k-hái khong-kun chiah-ni̍h chhám-tāng ê sún-sit, kám sī Gô-lô kun ūi-tio̍h pó-ūi ka-kī ê kok-ka, put-hēng tī Gô-lô kéng-lāi hō͘ ū "chhim-lio̍k-sèng" koh "hó chiàn" ê "Pak-iok" kun-tūi só͘ phah ê? Tong-jiân m̄ sī!

Che sī gō͘-goe̍h cha̍p-káu ē-po͘ 烏克蘭 kok-hông-pō͘ kong-pò͘ siōng sin ê chiàn-kó thóng-kè, 烏克蘭 kok-hông-pō͘ kóng, chū-chiông Gô-lô jī-goe̍h jī-sì ji̍p-chhim chì gō͘-goe̍h cha̍p-káu thàu-chá ûi-chí, 烏克蘭 só͘ kong-pò͘ siōng sin ê chiàn-kó. Lāi-té khak-si̍t ū chin chē "Pak-iok" kok-ka só͘ chi-oân ê kok chióng siōng sin ê bú-khì, tān-sī chiàn-kó lóng sī 烏克蘭 eng-ióng ê kun-bîn chi̍t kiāⁿ chi̍t kiāⁿ kiàn-li̍p ê. Tong-jiân sī chiok bô kán-tan.

Lán khòaⁿ-tio̍h Gô-lô chò-chha̍t, koh teh hoah lia̍h-chha̍t! 　　　　(220522)

Chù, 塔吉克　　 烏克蘭　　 chhiáⁿ liām Hôa-gí



　　五月十三，俄羅外交部長拉夫羅夫（Lavrov）去中亞ê塔吉克（Tajikistan）參加「獨立國家國協」（CIS）會議，tī會後ê記者會伊開砲指控「歐盟」有「侵略性」koh「好戰」。原本二月二四俄羅入侵烏克蘭ê理由是烏克蘭想beh加入「北大西洋公約組織」簡稱「北約（NATO）」，但是戰爭以後，烏克蘭一直強調in無可能成作「北約」ê成員，但是猶原會大力推動申請加入「歐盟」。Kám是án-ne俄羅外交部長才會罵「歐盟」tú數？

　　Ui俄羅外交部長講chiah-ê話，咱tio̍h知影伊胡言亂語。「歐洲聯盟」，簡稱「歐盟」，是歐洲多國共同建立ê政治kah經chē聯盟，有27个成員國。相信伊原本beh罵ê是「北約」，因為「北約」是歐洲kah北美洲國家為實施防衛合作所建立ê國際組織，有大量核武器kah常設部隊，是西方ê重要軍事力量。「北約」成員國有30个。北約軍事開支佔世界國防開支ê70%以上。

　　咱來看到底是啥人有「侵略性」koh「好戰」？二月二四，俄羅出兵入侵烏克蘭，放調九十六點鐘、也就是四工內完全佔領烏克蘭，派兵派戰車派戰機派戰船侵佔隔壁國烏克蘭ê領土，án-ne kám無算是有「侵略性」koh「好戰」？

　　戰爭tú開始ê時，「北約」國家會使講是tiāmtiāmá看，無一个國家伸手支援，一直看烏克蘭孤軍奮戰、俄羅大軍入侵、欺人太甚，「北約」才一个一个運送上新上好ê武器支援烏克蘭，hō͘烏克蘭愈拍愈勇。到今á日為止，「北約」猶無派一兵一卒去贊烏克蘭，所有ê戰果lóng總是烏克蘭全體軍民愛國衛國ê英勇表現。好笑ê是俄羅煞怪「歐盟」有「侵略性」koh「好戰」。

　　到五月十九為止，俄羅軍已經陣亡約2萬8,500外人，烏克蘭軍摧毀俄羅軍1,254台戰車、3,063台裝甲車、595門火砲系統、199台多管火箭車、93組防空系統、202隻軍機、1,167隻直升機、2,157台各式車輛kah油罐車、13台艦艇、455隻無人機、43个特殊設備kah 103粒巡弋飛彈。俄羅陸海空軍chiahnih慘重ê損失，kám是俄羅軍為tio̍h保衛家己ê國家，不幸tī俄羅境內hō͘有「侵略性」koh「好戰」ê「北約」軍隊所拍ê？當然m̄是！

Che是五月十九下晡烏克蘭國防部公布上新ê戰果統計，烏克蘭國防部講，自從俄羅二月二四入侵至五月十九透早為止，烏克蘭所公布上新ê戰果。內底確實有真chē「北約」國家所支援ê各種上新ê武器，但是戰果lóng是烏克蘭英勇ê軍民一件一件建立ê。當然是足無簡單。

咱看tio̍h俄羅做賊，koh teh喝掠賊！　　　　(220522)

註：塔吉克　　烏克蘭　　請唸華語