《綠色短評》

 | | | 轉寄

中國khiā koân山看馬相that。有巧！

作者 李南衡, ChoânTâijī/全台字 by Chng Hūiphêng 2022.04.17

Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　　　 Lí Lâmhêng

　　　　 Tiongkok khiā koân soaⁿ khòaⁿ bé sio that. Ū khiáu!

　　 Jīgoe̍h jīsì Gôlô ji̍p chhim 烏克蘭, kengkòe chi̍t kò goe̍h liáuāu, choân sèkài ū nn̄g chióng siaⁿim lóng tùi Tiongkok lâi. Chi̍t chióng sī hibāng thêng chiàn ê siaⁿim, lóng kóng beh khǹg Gôlô Phû Teng chóngthóng thêng chiàn, kantaⁿ Tiongkok kokka chúse̍k 習近平 ū hoat nāniā, inūi Tiongkok sī Gôlô siōng hó ê pêngiú. Mā sī inūi ánne, só͘í lēnggōa chi̍t chióng siaⁿim iûgoân hiòng Tiongkok lâi, hoânló Tiongkok ē chhutchhiú kunsū oânchō͘ Gôlô.

　　 Bôkoán tó chi̍t chióng siūⁿhoat ê lâng, lóng sī bô liáukái Tiongkok kah 習近平 chúse̍k. Nn̄g chiah bé teh sio that, ná ū hiah gōng ê lâng cháukhì choh kongchhin ê ? Bêngbêng khòaⁿ Gôlô tī 烏克蘭ê chiànsū íkeng hāmji̍p chìn bô pō͘, thè bô lō͘ ê làmchhân, nā chhutbīn choh kongchhin khǹg Gôlô Phû Teng chóngthóng hó siu peng, suijiân sī chhut tī hóì beh hō͘ Phû Teng hó lo̍h lâuthui. Tānsī só͘ū ê to̍kchhâi chiá lóng chūsìn móamóa, ná ū khólêng thiaⁿ pa̍t lâng ê ōe?

　　 Hoânló Tiongkok ē khì kunoān Gôlô ê tongjiân mā sī gōng lâng. Saⁿgoe̍h jīkáu, 烏克蘭 kokhông kongpò͘ Gôlô kun siōng kài sin ê chiàn sún thóngkè, Ùi jīgoe̍h jīsì Gôlô kun ji̍p chhim kàu saⁿgoe̍h jīkáu chásî la̍k tiám ûichí, Gôlô kun tāiiok tīnbông 1 bān 7,200 lâng, 烏克蘭 kun chhuihúi Gôlô kun 597 tâi chiànchhia, 1,710 tâi chng kah chhia, 303 mn̂g hóephàu hēthóng, 96 tâi to koán hóechìⁿchhia, 54 cho͘ hôngkhang hēthóng, 127 tâi kunki, 129 chiah ti̍tsengki, 1,178 tâi koksek chhialióng , 7 tâi kàmthéng, 73 tâi iûkoànchhia, 71 chiah bôlângki, 21 ê te̍ksû siatpī kah 4 ê chiànsut poetôaⁿ chàikū. Kàu saⁿgoe̍h jīpeh ûichí, Gôlô ji̍p chhim 烏克蘭 chiàncheng chìchió sitkhì chhit miâ kokip chiòngléng kah 16 miâ kokip chíhuikoaⁿ. Kèsio̍k ánne koh chiàn nn̄g kò goe̍h, saⁿ kògoe̍h, sèkài tējī tōa kunsū kok, koh ū sèkài siōng chē hu̍tchú búkhì ê Gôlô ē piànchoh siáⁿ khoán? Tiongkok tongjiân chiok ài khòaⁿ.

　　 Ūitio̍h pangchān 烏克蘭, Bíkok chhōathâu ê "pak iok" kokka tōala̍t kunoān 烏克蘭, Bíkok chóngthóng Pài Teng siosòa soanpò͘ thêkiong 烏克蘭 kèta̍t 10 ek bíkim ê kunoān, koh soanpò͘ tùi 烏克蘭 chēngka 100 chiah" tôaⁿ hông to"（Kamekaze sîn hong ） sióhêng bôlângki . Auchiu Lísūhōe thêkiong gia̍h gōa ê 3 ek Auphiò ūsoàn, koh beh thêkiong 烏克蘭 só͘ suiàu ê hôngōe kunpī. Tekkok chengsàng 1,500 lia̍p "chìⁿ sek" hôngkhong poetôaⁿ kah 100 ki MG3 kchhèng. Czech chengsàng kèta̍t 760 bān Auphiò ê búkhì, Sulo̍kba̍k chengsàng kèta̍t 260 bān Auphiò ê búkhì kah 640 bān Auphiò ê kîtha bu̍tchu, Hoatkok koanchēng 3.5 ek Auphiò ê hônggūsèng búkhì, Hôlân chengsàng 200 lia̍p tòa leh kiâⁿ ê "chhì chiam" hôngkhong poetôaⁿ, lûita̍t hēthóng, sàulûi kikhìlâng; 愛沙尼亞 chengsàng piochhiuⁿ sek hoánchiànchhia poetôaⁿ kah iliâu siat pī. Pakiok kokka itti̍t chioân, Gôlô kah 烏克蘭 Pakiok kokka jú chiàn jú jia̍t, nn̄g pêng só͘ siotiāu ê chîⁿ tongjiân jú lâi jú chē, siōng hó sī nn̄g pêng lóng phah kah chhichhám lo̍kphek. Chiàntiûⁿ lī Tiongkok hn̄ghn̄g, oânchoân bē siū sionghāi súnsit. Chhùitûn phôe jînchêng Tiongkok ē chhut tit, kunsū oânchō͘ Gôlô? Biánkóng. Bíkok Pài Teng chóngthóng kah Tiongkok 習近平 chúse̍k sīsìn hōegī, Pài Teng te̍kpia̍t hoanhù Tiongkok choa̍ttùi bē sái kunoān Gôlô, nā ûihoán ē siūtio̍h giâmle̍k ê chèchhâi. Ná siōngthian sù chiah hó ê chiàkháu, hāi 習近平 hoaⁿhí kah bē khùn tit, liân bînbāng mā ē bîbîá chhiò.

Tiongkok khiā koânsoaⁿ khòaⁿ bé sio that, ū khiáu! (220401)


Chù, 烏克蘭　愛沙尼亞　 習近平 　chhiáⁿ liām Hôagí


Pe̍h-ōe-jī-pán/白話字版

《 Le̍k-sek toán-phêng 》　　　 Lí Lâm-hêng

　　　　 Tiong-kok khiā koân soaⁿ khòaⁿ bé sio that. Ū khiáu!

　　 Jī-goe̍h jī-sì Gô-lô ji̍p chhim 烏克蘭, keng-kòe chi̍t kò goe̍h liáu-āu, choân sè-kài ū nn̄g chióng siaⁿ-im lóng tùi Tiong-kok lâi. Chi̍t chióng sī hi-bāng thêng chiàn ê siaⁿ-im, lóng kóng beh khǹg Gô-lô Phû Teng chóng-thóng thêng chiàn, kan-taⁿ Tiong-kok kok-ka chú-se̍k 習近平 ū hoat nā-niā, in-ūi Tiong-kok sī Gô-lô siōng hó ê pêng-iú. Mā sī in-ūi án-ne, só͘-í lēng-gōa chi̍t chióng siaⁿ-im iû-goân hiòng Tiong-kok lâi, hoân-ló Tiong-kok ē chhut-chhiú kun-sū oân-chō͘ Gô-lô.

　　 Bô-koán tó chi̍t chióng siūⁿ-hoat ê lâng, lóng sī bô liáu-kái Tiong-kok kah 習近平 chú-se̍k. Nn̄g chiah bé teh sio that, ná ū hiah gōng ê lâng cháu-khì choh kong-chhin ê ? Bêng-bêng khòaⁿ Gô-lô tī 烏克蘭ê chiàn-sū í-keng hām-ji̍p chìn bô pō͘, thè bô lō͘ ê làm-chhân, nā chhut-bīn choh kong-chhin khǹg Gô-lô Phû Teng chóng-thóng hó siu peng, sui-jiân sī chhut tī hó-ì beh hō͘ Phû Teng hó lo̍h lâu-thui. Tān-sī só͘-ū ê to̍k-chhâi chiá lóng chū-sìn móa-móa, ná ū khó-lêng thiaⁿ pa̍t lâng ê ōe?

　　 Hoân-ló Tiong-kok ē khì kun-oān Gô-lô ê tong-jiân mā sī gōng lâng. Saⁿ-goe̍h jī-káu, 烏克蘭 kok-hông kong-pò͘ Gô-lô kun siōng kài sin ê chiàn sún thóng-kè, Ùi jī-goe̍h jī-sì Gô-lô kun ji̍p chhim kàu saⁿ-goe̍h jī-káu chá-sî la̍k tiám ûi-chí, Gô-lô kun tāi-iok tīn-bông 1 bān 7,200 lâng, 烏克蘭 kun chhui-húi Gô-lô kun 597 tâi chiàn-chhia, 1,710 tâi chng kah chhia, 303 mn̂g hóe-phàu hē-thóng, 96 tâi to koán hóe-chìⁿ-chhia, 54 cho͘ hông-khang hē-thóng, 127 tâi kun-ki, 129 chiah ti̍t-seng-ki, 1,178 tâi kok-sek chhia-lióng , 7 tâi kàm-théng, 73 tâi iû-koàn-chhia, 71 chiah bô-lâng-ki, 21 ê te̍k-sû siat-pī kah 4 ê chiàn-sut poe-tôaⁿ chài-kū. Kàu saⁿ-goe̍h jī-peh ûi-chí, Gô-lô ji̍p chhim 烏克蘭 chiàn-cheng chì-chió sit-khì chhit miâ ko-kip chiòng-léng kah 16 miâ ko-kip chí-hui-koaⁿ. Kè-sio̍k án-ne koh chiàn nn̄g kò goe̍h, saⁿ kò-goe̍h, sè-kài tē-jī tōa kun-sū kok, koh ū sè-kài siōng chē hu̍t-chú bú-khì ê Gô-lô ē piàn-choh siáⁿ khoán? Tiong-kok tong-jiân chiok ài khòaⁿ.

　　 Ūi-tio̍h pang-chān 烏克蘭, Bí-kok chhōa-thâu ê "pak iok" kok-ka tōa-la̍t kun-oān 烏克蘭, Bí-kok chóng-thóng Pài Teng sio-sòa soan-pò͘ thê-kiong 烏克蘭 kè-ta̍t 10 ek bí-kim ê kun-oān, koh soan-pò͘ tùi 烏克蘭 chēng-ka 100 chiah" tôaⁿ hông to"（Kamekaze sîn hong ） sió-hêng bô-lâng-ki . Au-chiu Lí-sū-hōe thê-kiong gia̍h gōa ê 3 ek Au-phiò ū-soàn, koh beh thê-kiong 烏克蘭 só͘ su-iàu ê hông-ōe kun-pī. Tek-kok cheng-sàng 1,500 lia̍p "chìⁿ sek" hông-khong poe-tôaⁿ kah 100 ki MG3 k-chhèng. Czech cheng-sàng kè-ta̍t 760 bān Au-phiò ê bú-khì, Su-lo̍k-ba̍k cheng-sàng kè-ta̍t 260 bān Au-phiò ê bú-khì kah 640 bān Au-phiò ê kî-tha bu̍t-chu, Hoat-kok koan-chēng 3.5 ek Au-phiò ê hông-gū-sèng bú-khì, Hô-lân cheng-sàng 200 lia̍p tòa leh kiâⁿ ê "chhì chiam" hông-khong poe-tôaⁿ, lûi-ta̍t hē-thóng, sàu-lûi ki-khì-lâng; 愛沙尼亞 cheng-sàng pio-chhiuⁿ sek hoán-chiàn-chhia poe-tôaⁿ kah i-liâu siat pī. Pak-iok kok-ka it-ti̍t chi-oân, Gô-lô kah 烏克蘭 Pak-iok kok-ka jú chiàn jú jia̍t, nn̄g pêng só͘ sio-tiāu ê chîⁿ tong-jiân jú lâi jú chē, siōng hó sī nn̄g pêng lóng phah kah chhi-chhám lo̍k-phek. Chiàn-tiûⁿ lī Tiong-kok hn̄g-hn̄g, oân-choân bē siū siong-hāi sún-sit. Chhùi-tûn phôe jîn-chêng Tiong-kok ē chhut tit, kun-sū oân-chō͘ Gô-lô? Bián-kóng. Bí-kok Pài Teng chóng-thóng kah Tiong-kok 習近平 chú-se̍k sī-sìn hōe-gī, Pài Teng te̍k-pia̍t hoan-hù Tiong-kok choa̍t-tùi bē sái kun-oān Gô-lô, nā ûi-hoán ē siū-tio̍h giâm-le̍k ê chè-chhâi. Ná siōng-thian sù chiah hó ê chià-kháu, hāi 習近平 hoaⁿ-hí kah bē khùn tit, liân bîn-bāng mā ē bî-bî-á chhiò.

Tiong-kok khiā koân-soaⁿ khòaⁿ bé sio that, ū khiáu! (220401)


Chù, 烏克蘭　愛沙尼亞　 習近平 　chhiáⁿ liām Hôa-gí



　　二月二四俄羅入侵烏克蘭，經過一個月了後，全世界有兩種聲音lóng對中國來。一種是希望停戰ê聲音，lóng講beh勸俄羅浮丁總統停戰，kan-taⁿ中國國家主席習近平有法nā-niā，因為中國是俄羅上好ê朋友。Mā是因為án-ne，所以另外一種聲音猶原向中國來，煩惱中國ē出手軍事援助俄羅。

　　無管tó一種想法ê人，lóng是無瞭解中國kah習近平主席。兩隻馬teh相that，ná有hiah戇ê人走去作公親ê？明明看俄羅tī烏克蘭ê戰事已經陷入進無步、退無路ê湳田，若出面作公親勸俄羅浮丁總統好收兵，雖然是出tī好意beh hō͘浮丁好落樓梯。但是所有ê獨裁者lóng自信滿滿，ná有可能聽別人ê話？

　　煩惱中國ē去軍援俄羅ê當然mā是戇人。三月二九，烏克蘭國防公布俄羅軍上kài新ê戰損統計：Ùi二月二四俄羅軍入侵到三月二九早時六點為止，俄羅軍大約陣亡1萬7,200人，烏克蘭軍摧毀俄羅軍597台戰車、1,710台裝甲車、303門火砲系統、96台多管火箭車、54組防空系統、127台軍機、129隻直升機、1,178台各式車輛、7台艦艇、73台油罐車、71隻無人機、21個特殊設備kah 4個戰術飛彈載具。到三月二八為止，俄羅入侵烏克蘭戰爭至少失去七名高級將領kah 16名高級指揮官。繼續án-ne koh戰兩個月、三個月，世界第二大軍事國、koh有世界上chē核子武器ê俄羅ē變作啥款？中國當然足愛看。

　　為tio̍h幫贊烏克蘭，美國chhōa頭ê「北約」國家大力軍援烏克蘭：美國總統拜登相續宣布提供烏克蘭價值10億美金ê軍援，koh宣布對烏克蘭增加100隻「彈簧刀」（Kamikaze神風）小型無人機。歐洲理事會提供額外ê3億歐元預算，koh beh提供烏克蘭所需要ê防衛軍備。德國贈送1,500粒「箭式」防空飛彈kah 100枝MG3機銃。捷克贈送價值760萬歐元ê武器，斯洛瓦克贈送價值260萬歐元ê武器kah 640萬歐元ê其他物資，法國捐贈3.5億歐元ê防禦性武器，荷蘭贈送200粒帶leh行ê「刺針」防空飛彈、雷達系統、掃雷機器人；愛沙尼亞贈送標鎗式反坦克飛彈kah醫療設備。北約國家一直支援，俄羅kah烏克蘭北約國家愈戰愈熱，兩旁所燒掉ê錢當然愈來愈chē，上好是兩旁lóng拍kah淒慘落魄。戰場離中國遠遠，完全bē受傷害損失。嘴唇皮人情中國ē出得，軍事援助俄羅？免講。美國拜登總統kah中國習近平主席視訊會議，拜登特別吩咐中國絕對bē使軍援俄羅，若違反ē受tio̍h嚴勵ê制裁。ná像天賜chiah好ê藉口，害習近平歡喜kah bē睏得，連眠夢māē微微á笑。

中國khiākoân山看馬相that，有巧！ (220401)


註：烏克蘭　愛沙尼亞　習近平　　請唸華語