《綠色短評》

 | | | 轉寄

一個有良心ê中國人tī烏克蘭發聲！

作者 李南衡, ChoânTâijī/全台字 by Chng Hūiphêng 2022.04.10

Choânbîn Tâioânjī pán/全民台灣字版簡稱ChoânTâiJī

《Le̍ksek toánphêng 》　　　 Lí Lâmhêng

　　　　　　　 Chi̍tê ū liôngsim ê Tiongkok lâng tī 烏克蘭 hoatsiaⁿ!

Ùi Tiongkok Pakkiaⁿ khì ê tiānnáu thêngsek siatkèsu Ông Kiathiân, i soánte̍k tī phiàu tiong lâu tī 烏克蘭奧德薩, piànchoh kongbîn kìchiá, thàukòe Tiongkok 微信 （We Chat）kah Yo͘tube lio̍ksio̍k siōng thôaⁿ 烏克蘭 chiàntē chênghóng, tìsú hō͘ loān thīn Gôlô ji̍pchhim 烏克蘭ê Tiongkok sióhúnâng kā i tah "ûipōe kokka li̍ptiûⁿ" , "bîncho̍k poāntô͘" ê pioá. Kiⁿî saⁿcha̍pla̍k hòe ê Ông Kiathiân inūi ài gēsu̍t, sì tang chêng poaⁿlâi 奧德薩tio̍h tùi chitê siâⁿchhī ê gēsu̍t khìhun chin kahì; puthēng, jīgoe̍h jīsì Gôlô ji̍pchhim 烏克蘭 liáuāu, Ông Kiathiân tio̍h ta̍k kang thàukòe 微信 kah Youtube thôaⁿ chi̍t ki iáⁿphìⁿ hiòng pēbú pò pêngan kah hunhióng chiàntē.

Saⁿgoe̍h cha̍pchhit （ pài sì ）基輔ê àmsî cha̍p tiám, i mn̄g kóng góa ê siaⁿim kám ū hiahni̍h khióngpò͘? Nā bô, sī ánchóaⁿ tī基輔 sîkan ēpo͘ saⁿ tiám, chiahni̍h hôchê kā góa miâē só͘ū ê tiùⁿhō choânpō͘ santû tiāu, paukoat góa kah goán pēbú îit ētàng liânlo̍k pò pêngan ê hongsek long hō͘ lín santiāu khì ah! Goán t īchia to ētàng goânliōng chhèng pàng lo̍hlâi ê Gôlô peng, sī ánchóaⁿ lín bētàng chiapsiū chi̍tê lín kakī ê kongbîn leh? Góa chíputkò sī chi̍tê tiānnáu thêngsek siatkèsu jîí. Lín ū pēbú bô? Lín ū kiáⁿjî bô? Siatsú lí ê kiáⁿjî tī chiàntiûⁿ, lí kám ē kā i kah in pēbú îit liânlo̍k ê hongsek chhiattn̄g? Góa chitmá kantaⁿētàng thàukòe pa̍t lâng hiòng góa ê pēbú choán ta̍t góa iáu oa̍hteh. Lín chiahê lám khasiàu, hiahni̍h chichhî Gôlô tī chia thâi 烏克蘭 lâng, ánne kám tio̍h? Sòa lo̍hkhì lín beh chhòngsiáⁿ? Lín iáu ētàng chhòngsiáⁿ? Kóng pe̍hchha̍t sī lín itkoàn ê chokhong, mā sī lín îit ê gígiân. Siatsú góa pōeāu ê chó͘kok pek góa ittēng tio̍h choh chi̍t hāng soánte̍k, tàuté beh kūi lè oa̍h lo̍hkhì ah sī beh khiā lè síkhì? Sitlé, góa íkeng khiā chin kú ah, bē hiáu kūi. Lín kantaⁿētàng ēng lí ho̍k lâng, bētàng ēng pōle̍k ho̍k lâng.

　　 kîsi̍t Ông Kiathiân putkoánsî long ētàng līkhui 奧德薩, i khiok soánte̍k lâu lo̍h來. I tùi 《華爾街 ji̍tpò 》 kóng,"Tī chiàncheng kiatsok jîchhiáⁿ sī 烏克蘭 sènglī chìnchêng, góa bē līkhui chia, inūi góa putho̍k. Sathāi pêngbîn pehsèⁿ, oaikhiok sūsi̍t, góa tio̍h sī putho̍k. Góa beh lâu tiàm chia, khòaⁿ 烏克蘭 chòeāu ê sènglī. Engkai bián jōa kú." Ông Kiathiân kóng i chi̍tê lâng tio̍h bīntùi nn̄gê chiàntiûⁿ, chi̍tê sī Gôlô ê ji̍pchhim, chi̍tê sī ùi koklāi tôngpau ê kongkek.

Tùi Gôlô lâng, i ho͘io̍k hôpêng, i tōasiaⁿ hoánkek kò͘hiong ê Tiongkok lâng tùi Gôlô ji̍pchhim hêngûi ê chichhî siaⁿim. Chūchiông tēit phoe Gôlô poetôaⁿ khaisí phah烏克蘭 ílâi, kúi pahbān ê Tiongkok lâng lâi khòaⁿ i tī 微信 （We Chat） téngbīn hoatpiáu ê kóngōe iáⁿphìⁿ. Chin kín i ê pîntō tio̍h chiâⁿchoh Tiongkok chènghú kah jînbîn koanchù ê chiautiám, ētàng hō͘ Tiongkok chhiûⁿá lāi ê lâng khòaⁿtio̍h hō͘ chiànhóe thúnta̍h ê 烏克蘭, kah Tiongkok thīn Gôlô ê li̍ptiûⁿ tòhoán, koh khah sī kā Tiongkok thè Gôlô soanthoân" 烏克蘭 kun tng teh súiōng ' Nazi chiànsut ‘ ê ké sìnsit siàn chhùiphóe. I ū tī chi̍ttōaⁿ iáⁿphìⁿ tiong kiôngtiāu,"Chiahê 烏克蘭 kéngōe m̄ sī Nazi, in sī IT thêngsek siatkèsu, itpoaⁿ lâng, thìthâu saihū, in chíputkò sī pêngbîn."

　　 Chi̍tê ū liôngsim ê Tiongkok lâng tī 烏克蘭 hoatsiaⁿ, ta̍ttit lán chunkèng! 　　(220325)


Chù, 烏克蘭　奧德薩　 微信 　基輔　華爾街 　chhiáⁿ ēng Hôagí liām


Pe̍h-ōe-jī-pán/白話字版

《Le̍k-sek toán-phêng 》　　　 Lí Lâm-hêng

　　　　　　　 Chi̍t-ê ū liông-sim ê Tiong-kok lâng tī 烏克蘭 hoat-siaⁿ!

Ùi Tiong-kok Pak-kiaⁿ khì ê tiān-náu thêng-sek siat-kè-su Ông Kiat-hiân, i soán-te̍k tī phiàu- tiong lâu tī 烏克蘭奧德薩, piàn-choh kong-bîn kì-chiá, thàu-kòe Tiong-kok 微信 （We Chat）kah Yo͘tube lio̍k-sio̍k siōng thôaⁿ 烏克蘭 chiàn-tē chêng-hóng, tì-sú hō͘ loān thīn Gô-lô ji̍p-chhim 烏克蘭ê Tiong-kok sió-hún-âng kā i tah "ûi-pōe kok-ka li̍p-tiûⁿ" , "bîn-cho̍k poān-tô͘" ê pio-á. Kin-nî saⁿ-cha̍p-la̍k hòe ê Ông Kiat-hiân in-ūi ài gē-su̍t, sì tang chêng poaⁿ-lâi 奧德薩tio̍h tùi chit-ê siâⁿ-chhī ê gē-su̍t khì-hun chin kah-ì; put-hēng, jī-goe̍h jī-sì Gô-lô ji̍p-chhim 烏克蘭 liáu-āu, Ông Kiat-hiân tio̍h ta̍k kang thàu-kòe 微信 kah Youtube thôaⁿ chi̍t ki iáⁿ-phìⁿ hiòng pē-bú pò pêng-an kah hun-hióng chiàn-tē.

Saⁿ-goe̍h cha̍p-chhit （ pài sì ）基輔ê àm-sî cha̍p tiám, i mn̄g kóng góa ê siaⁿ-im kám ū hiah-ni̍h khióng-pò͘? Nā bô, sī án-chóaⁿ tī基輔 sî-kan ē-po͘ saⁿ tiám, chiah-ni̍h hô-chê kā góa miâ-ē só͘-ū ê tiùⁿ-hō choân-pō͘ san-tû- tiāu, pau-koat góa kah goán pē-bú î-it ē-tàng liân-lo̍k pò pêng-an ê hong-sek long hō͘ lín san-tiāu khì ah! Goán t īchia to ētàng goân-liōng chhèng pàng lo̍h-lâi ê Gô-lô peng, sī án-chóaⁿ lín bē-tàng chiap-siū chi̍t-ê lín ka-kī ê kong-bîn leh? Góa chí-put-kò sī chi̍t-ê tiān-náu thêng-sek siat-kè-su jî-í. Lín ū pē-bú bô? Lín ū kiáⁿ-jî bô? Siat-sú lí ê kiáⁿ-jî tī chiàn-tiûⁿ, lí kám ē kā i kah in pē-bú î-it liân-lo̍k ê hong-sek chhiat-tn̄g? Góa chit-má kan-taⁿē-tàng thàu-kòe pa̍t lâng hiòng góa ê pē-bú choán ta̍t góa iáu oa̍h-teh. Lín chiah-ê lám kha-siàu, hiah-ni̍h chi-chhî Gô-lô tī chia thâi 烏克蘭 lâng, án-ne kám tio̍h? Sòa-- lo̍h-khì lín beh chhòng-siáⁿ? Lín iáu ē-tàng chhòng-siáⁿ? Kóng pe̍h-chha̍t sī lín it-koàn ê chok-hong, mā sī lín î-it ê gí-giân. Siat-sú góa pōe-āu ê chó͘-kok pek góa it-tēng tio̍h choh chi̍t hāng soán-te̍k, tàu-té beh kūi lè oa̍h lo̍h-khì ah sī beh khiā lè sí-khì? Sit-lé, góa í-keng khiā chin kú ah, bē hiáu kūi. Lín kan-taⁿē-tàng ēng lí ho̍k lâng, bē-tàng ēng pō-le̍k ho̍k lâng.

　　 kî-si̍t Ông Kiat-hiân put-koán-sî long ē-tàng lī-khui 奧德薩, i khiok soán-te̍k lâu lo̍h-來. I tùi 《華爾街 ji̍t-pò 》 kóng,"Tī chiàn-cheng kiat-sok jî-chhiáⁿ sī 烏克蘭 sèng-lī chìn-chêng, góa bē lī-khui chia, in-ūi góa put-ho̍k. Sat-hāi pêng-bîn peh-sèⁿ, oai-khiok sū-si̍t, góa tio̍h sī put-ho̍k. Góa beh lâu tiàm chia, khòaⁿ 烏克蘭 chòe-āu ê sèng-lī. Eng-kai bián jōa kú." Ông Kiat-hiân kóng i chi̍t-ê lâng tio̍h bīn-tùi nn̄g-ê chiàn-tiûⁿ, chi̍t-ê sī Gô-lô ê ji̍p-chhim, chi̍t-ê sī ùi kok-lāi tông-pau ê kong-kek.

Tùi Gô-lô lâng, i ho͘-io̍k hô-pêng, i tōa-siaⁿ hoán-kek kò͘-hiong ê Tiong-kok lâng tùi Gô-lô ji̍p-chhim hêng-ûi ê chi-chhî siaⁿ-im. Chū-chiông tē-it phoe Gô-lô poe-tôaⁿ khai-sí phah烏克蘭 í-lâi, kúi pah-bān ê Tiong-kok lâng lâi khòaⁿ i tī 微信 （We Chat） téng-bīn hoat-piáu ê kóng-ōe iáⁿ-phìⁿ. Chin kín i ê pîn-tō tio̍h chiâⁿ-choh Tiong-kok chèng-hú kah jîn-bîn koan-chù ê chiau-tiám, ē-tàng hō͘ Tiong-kok chhiûⁿ-á lāi ê lâng khòaⁿ-tio̍h hō͘ chiàn-hóe thún-ta̍h ê 烏克蘭, kah Tiong-kok thīn Gô-lô ê li̍p-tiûⁿ tò-hoán, koh khah sī kā Tiong-kok thè Gô-lô soan-thoân" 烏克蘭 kun tng teh sú-iōng ' Nazi chiàn-sut ‘ ê ké sìn-sit siàn chhùi-phóe. I ū tī chi̍t-tōaⁿ iáⁿ-phìⁿ tiong kiông-tiāu,"Chiah-ê 烏克蘭 kéng-ōe m̄ sī Nazi, in sī IT thêng-sek siat-kè-su, it-poaⁿ lâng, thì-thâu sai-hū, in chí-put-kò sī pêng-bîn."

　　 Chi̍t-ê ū liông-sim ê Tiong-kok lâng tī 烏克蘭 hoat-siaⁿ, ta̍t-tit lán chun-kèng! 　　(220325)


Chù, 烏克蘭　奧德薩　 微信 　基輔　華爾街 　chhiáⁿ ēng Hôa-gí liām



Ùi中國北京去ê電腦程式設計師王吉賢，伊選擇tī砲聲中留tī烏克蘭奧德薩，變作公民記者，透過中國微信（We Chat）kah Youtube陸續上傳烏克蘭戰地情況，致使hō͘亂thīn俄羅入侵烏克蘭ê中國小粉紅kā伊貼「違背國家立場」、「民族叛徒」ê標á。今年三十六歲ê王吉賢因為愛藝術，四冬前搬來奧德薩tio̍h對chit-ê城市ê藝術氣氛真合意；不幸，二月二四俄羅入侵烏克蘭了後，王吉賢tio̍hta̍k工透過微信kah Youtube傳一支影片向父母報平安kah分享戰地。

三月十七（拜四）基輔ê暗時十點，伊問講我ê聲音kám有hiahni̍h恐怖？若無，是按怎tī基輔時間下晡三點，chiahni̍h和齊kā我名下所有ê帳號全部刪除掉，包括我kah阮父母唯一ētàng連絡報平安ê方式lónghō͘恁刪掉去ah！阮tīchia都ētàng原諒銃放落來ê俄羅兵，是按怎恁bē-tàng接受一個恁家己ê公民咧？我只不過是一個電腦程式設計師而已。恁有父母無？恁有子女無？設使你ê子女tī戰場，你kámēkā伊kah in父母唯一連絡ê方式切斷？我chit-má kan-taⁿē-tàng透過別人向我ê父母轉達我猶活teh。恁chiah-ê lám腳數（kha-siàu），hiahni̍h支持俄羅tīchia刣烏克蘭人，án-ne kám tio̍h？續落去恁beh創啥？恁猶ē-tàng創啥？講白賊是恁一貫ê作風，mā是恁唯一ê語言。設使我背後ê祖國逼我一定tio̍h作一項選擇：到底beh跪lè活落去ah是behkhiā lè死去？失禮，我已經khiā真久ah，bē曉跪。恁kan-taⁿē-tàng用理服人，bē-tàng用暴力服人。

　　其實王吉賢不管時lóngē-tàng離開奧德薩，伊卻選擇留落来。伊對《華爾街日報》講：「Tī戰爭結束而且是烏克蘭勝利進前，我bē離開chia，因為我不服。殺害平民百姓，歪曲事實，我tio̍h是不服。我beh留tiàm chia，看烏克蘭最後ê勝利。應該免jōa久。」王吉賢講伊一個人tio̍h面對兩個戰場：一個是俄羅ê入侵，一個是ùi國內同胞ê攻擊。

對俄羅人，伊呼籲和平，伊大聲反擊故鄉ê中國人對俄羅入侵行為ê支持聲音。自從第一批俄羅飛彈開始拍烏克蘭以來，幾百萬ê中國人來看伊tī微信（We Chat）頂面發表ê講話影片。真緊伊ê頻道tio̍h成作中國政府kah人民關注ê焦點，ē-tàng hō͘中國牆á內ê人看tio̍h hō͘戰火thún踏ê烏克蘭，kah中國thīn俄羅ê立場倒反，koh khah是kā中國替俄羅宣傳「烏克蘭軍當teh使用『納粹戰術』」ê假訊息煽嘴phóe。伊有tī一段影片中強調，「Chiah-ê烏克蘭警衛m̄是納粹，in是IT程式設計師、一般人、剃頭師傅，in只不過是平民。」

　　一個有良心ê中國人tī烏克蘭發聲，值得咱尊敬！　　(220325)


註：烏克蘭　奧德薩　微信　基輔　華爾街　納粹　　請用華語唸