《綠色短評》

 | | | 轉寄

「漢奸」是siáⁿ-mi̍h碗糕？

作者 李南衡, ChoânTâijī/全台字 by Chng Hūiphêng 2022.01.16

Choânbîn Tâioânjī pán/全民台灣字版簡稱ChoânTâiJī


《 Le̍ksek toánphêng 》　　　　　　　　 Lí Lâmhêng

　　　　　　　　　”漢奸”sī siáⁿmi̍h óaⁿko?


Cha̍pjīgoe̍h cha̍ppeh, Sùtāi Kongtâu kiatkó Tiongkok Kokbîntóng lóng su, tóng lāi tio̍h ū lâng khaisí teh "chhōe chiànhoān". Kóng sī kǹgthi̍h Hânhún, chuchhim imga̍k lâng Lâu Kachhiong kuiê lâng pang·khì, tōasiaⁿ mē kóng,"Hâu Iúgî m̄ sī poāntô͘, siáⁿmi̍h chiah sī poāntô͘? " phàuhong Chu Li̍plûn" chhōa chi̍t kûn Hànkan, siáng ē tòe lí chò chiàniú?" i ho͘io̍k ūitio̍h sulī bô kò͘ tóngkok ê Hâu Iúgî kah Lô͘ Siùiàn tio̍h ka khaitû tiāu, koh tiám miâ Kokim Sò͘mûi, Kang Khésîn hunpia̍t soán Sinpakchhī kah Tâitiong chhītiúⁿ. I kóng "2024 sī Tionghôa Bînkok kah Tâioân to̍kli̍p chòeāu ê koatchiàn", i ho͘io̍k Koeh Tâibêng tángsūtiúⁿ, chhutbé thè goán kái simgoān. "Kokbîntóng nā beh ài hôpêng thóngit, tio̍h seng hō͘ Tâioân siàuliânlâng chaiiáⁿ kakī sī tó chi̍t kok ê lâng".

Tâioân lâng íkeng chin kú bô thiaⁿtio̍h “漢奸” chitê mēlâng ê gísû. Ē kìtit choh gíná ê sîchūn, ta̍k kang tio̍h ài chhiùⁿ chi̍t siú "hoán Kiōng khòng Gô koa", "打倒俄寇，反共產反共產；消滅朱毛，殺漢奸殺漢奸." gíná lâng chaiiáⁿ siáⁿmi̍h “漢奸” leh ? Tōahàn liáuāu khì chhōe chuliāu chiah chaiiáⁿ, oh! goânlâi tī gō͘chheng nî iukiú le̍ksú lāité, “漢奸” sǹg sī chi̍tê chin iùkhí ê miâsû, Boáná phah ji̍pkoan thóngtī kuiê tongsî ê Tiongkok, kiànli̍p Tōachheng Tèkok liáuāu, Boánchheng thóngtīchiá chútiuⁿ kakī kah Hànjîn līhāi siothong; mā sī ū Hànjîn jīnûi Boánchheng ê līek tio̍h sī Hànjîn ê līek, tìsú ū chin chē lâng kā Boán Hàn khòaⁿ choh itthé. Kiànnā ûipōe in ê līek ê lâng lóng kiò choh “漢奸”, ìsù sī thong te̍kjîn ê lâng. TōaChheng Tèkok thóngtī Tiongkok 276 nî (1636—1912), iûgoân ū chin chē chhinchhiūⁿ Sun Tiongsan chit khoán lâng, jīnûi Boáná kah Hànjîn pēng m̄sī itthé, só͘í i kekbēng ê chongchí ū chi̍t tiâu sī "驅逐韃虜", 韃虜 goânpún sī chí Tiongkok tāilio̍k pakhong Bôngkó͘, Lúchin téng iûbo̍k bîncho̍k, tongjiân m̄sī Hàn bîncho̍k ê lâng.

　　 Tiong Ji̍t chiàncheng tiong, óa Ji̍tpún chhimlio̍kchiá á·sī óa Ji̍tpún lâng só͘ hûchhî ê só͘ūi "Gūi chèngkoân" ê lâng, chèngkì chhionghun ê, lóngchóng chhengho͘ choh “漢奸”, khiòngchiàn sènglī liáuāu, hiahê “漢奸” lóng tio̍h siū símphòaⁿ tēngchōe.

　　 Chiúⁿ Κàichio̍h kah Tiongkok Kokbîntóng chènghú hō͘ Tiongkok Kiōngsántóng phah kah cháulō͘ lâi Tâioân, tongjiân tùi tongsî tī Mâu Te̍ktong, Chu Tek léngtōhā ê Tiongkok Kiōngsántóng hūn kàu ji̍pkut; tùi tī āupiah sáisú kah chioân ê So͘liân kiōngsántóng mē choh sī "俄寇","寇"sī chha̍tá thó͘húi. Thiaⁿkóng goán gíná sîtāi só͘ chhiùⁿ ê hitsiú "hoán kiōng khòng Gô koa"koasû sī Chiúⁿ Κàichio̍h siá ê, lán ētàng líkái i ná ē mē lâng “漢奸”.

　　 Hiānchhúsî tī Tiongkok, káucha̍pit hòe ê Chu Tiongkun lúsū, sī chi̍t ūi chin siū chunkèng ê kongkiōng tìsek hūnchú, i bat tamjīm kòe Tiongkok Siāhōe Khoha̍k īⁿ Bíkok Giánkiùsó͘ só͘tiúⁿ. I kóng, tùi bô kâng khoán ìkiàn ê lâng to̍h mē i sī “漢奸”,”漢奸” chitê sû soah piàn choh "kok mē", kā “漢奸” chitê sû ke tī ìkiàn kah góa bô kâng ê lâng sinchiūⁿ, mā sī "Tiongkok te̍ksek", jîchhiáⁿ sī hiānchāi ê "Tiongkok te̍ksek". Ánne, lán tio̍h chaiiáⁿ goânlâi Lâu Kachhiong lī lán Tâioân jōani̍h hn̄g.

　　 Kináji̍t tī Tâioân, ū kúiê lâng koansim,”漢奸” sī siáⁿmi̍h óaⁿko? 　　(211231)
Chù,"漢奸" 俄寇hoán Kiōng khòng Gô koakhek ê koasû chhiáⁿ liām Hôagí

Pe̍h-ōe-jī-pán/白話字版

《 Le̍k-sek toán-phêng 》　　　　　　　　 Lí Lâm-hêng
　　　　　　　　　”漢奸”sī siáⁿ-mi̍h óaⁿ-ko?

Cha̍p-jī-goe̍h cha̍p-peh, Sù-tāi Kong-tâu kiat-kó Tiong-kok Kok-bîn-tóng lóng su, tóng lāi tio̍h ū lâng khai-sí teh "chhōe chiàn-hoān". Kóng sī kǹg-thi̍h Hân-hún, chu-chhim im-ga̍k lâng Lâu Ka-chhiong kui-ê lâng pang-·khì, tōa-siaⁿ mē kóng,"Hâu Iú-gî m̄ sī poān-tô͘, siáⁿ-mi̍h chiah sī poān-tô͘? " phàu-hong Chu Li̍p-lûn" chhōa chi̍t kûn Hàn-kan, siáng ē tòe lí chò chiàn-iú?" i ho͘-io̍k ūi-tio̍h su-lī bô kò͘ tóng-kok ê Hâu Iú-gî kah Lô͘ Siù-iàn tio̍h ka khai-tû tiāu, koh tiám miâ Ko-kim Sò͘-mûi, Kang Khé-sîn hun-pia̍t soán Sin-pak-chhī kah Tâi-tiong chhī-tiúⁿ. I kóng "2024 sī Tiong-hôa Bîn-kok kah Tâi-oân to̍k-li̍p chòe-āu ê koat-chiàn", i ho͘-io̍k Koeh Tâi-bêng táng-sū-tiúⁿ, chhut-bé thè goán kái sim-goān. "Kok-bîn-tóng nā beh ài hô-pêng thóng-it, tio̍h seng hō͘ Tâi-oân siàu-liân-lâng chai-iáⁿ ka-kī sī tó chi̍t kok ê lâng".

Tâi-oân lâng í-keng chin kú bô thiaⁿ-tio̍h “漢奸” chit-ê mē-lâng ê gí-sû. Ē kì-tit choh gín-á ê sî-chūn, ta̍k kang tio̍h ài chhiùⁿ chi̍t siú "hoán Kiōng khòng Gô koa", "打倒俄寇，反共產反共產；消滅朱毛，殺漢奸殺漢奸." gín-á lâng chai-iáⁿ siáⁿ-mi̍h “漢奸” leh ? Tōa-hàn liáu-āu khì chhōe chu-liāu chiah chai-iáⁿ, oh! goân-lâi tī gō͘-chheng nî iu-kiú le̍k-sú lāi-té, “漢奸” sǹg sī chi̍t-ê chin iù-khí ê miâ-sû, Boán-á phah ji̍p-koan thóng-tī kui-ê tong-sî ê Tiong-kok, kiàn-li̍p Tōa-chheng Tè-kok liáu-āu, Boán-chheng thóng-tī-chiá chú-tiuⁿ ka-kī kah Hàn-jîn lī-hāi sio-thong; mā sī ū Hàn-jîn jīn-ûi Boán-chheng ê lī-ek tio̍h sī Hàn-jîn ê lī-ek, tì-sú ū chin chē lâng kā Boán Hàn khòaⁿ choh it-thé. Kiàn-nā ûi-pōe in ê lī-ek ê lâng lóng kiò choh “漢奸”, ì-sù sī thong te̍k-jîn ê lâng. Tōa-Chheng Tè-kok thóng-tī Tiong-kok 276 nî (1636—-1912), iû-goân ū chin chē chhin-chhiūⁿ Sun Tiong-san chit khoán lâng, jīn-ûi Boán-á kah Hàn-jîn pēng m̄-sī it-thé, só͘-í i kek-bēng ê chong-chí ū chi̍t tiâu sī "驅逐韃虜", 韃虜 goân-pún sī chí Tiong-kok tāi-lio̍k pak-hong Bông-kó͘, Lú-chin téng iû-bo̍k bîn-cho̍k, tong-jiân m̄-sī Hàn bîn-cho̍k ê lâng.

　　 Tiong Ji̍t chiàn-cheng tiong, óa Ji̍t-pún chhim-lio̍k-chiá á-·sī óa Ji̍t-pún lâng só͘ hû-chhî ê só͘-ūi "Gūi chèng-koân" ê lâng, chèng-kì chhiong-hun ê, lóng-chóng chheng-ho͘ choh “漢奸”, khiòng-chiàn sèng-lī liáu-āu, hiah-ê “漢奸” lóng tio̍h siū sím-phòaⁿ tēng-chōe.

　　 Chiúⁿ Κài-chio̍h kah Tiong-kok Kok-bîn-tóng chèng-hú hō͘ Tiong-kok Kiōng-sán-tóng phah kah cháu-lō͘ lâi Tâi-oân, tong-jiân tùi tong-sî tī Mâu Te̍k-tong, Chu Tek léng-tō-hā ê Tiong-kok Kiōng-sán-tóng hūn kàu ji̍p-kut; tùi tī āu-piah sái-sú kah chi-oân ê So͘-liân kiōng-sán-tóng mē choh sī "俄寇","寇"sī chha̍t-á thó͘-húi. Thiaⁿ-kóng goán gín-á sî-tāi só͘ chhiùⁿ ê hit-siú "hoán kiōng khòng Gô koa"koa-sû sī Chiúⁿ Κài-chio̍h siá ê, lán ē-tàng lí-kái i ná ē mē lâng “漢奸”.

　　 Hiān-chhú-sî tī Tiong-kok, káu-cha̍p-it hòe ê Chu Tiong-kun lú-sū, sī chi̍t ūi chin siū chun-kèng ê kong-kiōng tì-sek hūn-chú, i bat tam-jīm kòe Tiong-kok Siā-hōe Kho-ha̍k īⁿ Bí-kok Gián-kiù-só͘ só͘-tiúⁿ. I kóng, tùi bô kâng- khoán ì-kiàn ê lâng to̍h mē i sī “漢奸”,”漢奸” chit-ê sû soah piàn choh "kok mē", kā “漢奸” chit-ê sû ke tī ì-kiàn kah góa bô kâng ê lâng sin-chiūⁿ, mā sī "Tiong-kok te̍k-sek", jî-chhiáⁿ sī hiān-chāi ê "Tiong-kok te̍k-sek". Án-ne, lán tio̍h chai-iáⁿ goân-lâi Lâu Ka-chhiong lī lán Tâi-oân jōa-ni̍h hn̄g.

　　 Kin-á-ji̍t tī Tâi-oân, ū kúi-ê lâng koan-sim,”漢奸” sī siáⁿ-mi̍h óaⁿ-ko? 　　(211231)
Chù,"漢奸" 俄寇hoán Kiōng khòng Gô koa-khek ê koa-sû chhiáⁿ liām Hôa-gí



十二月十八，四大公投結果中國國民黨lóng輸，黨內tio̍h有人開始teh 「chhōe戰犯」。講是鋼鐵韓粉、資深音樂人劉家昌歸个人崩去、大聲罵講，「侯友宜m̄是叛徒，siáⁿ-mi̍h才是叛徒？」砲轟朱立倫「chhōa一群漢奸，siángē跟你做戰友？」伊呼籲為tio̍h私利無顧黨國ê侯友宜kah盧秀燕tio̍h ka開除掉，koh點名高金素梅、江啓臣分別選新北市kah台中市長。伊講「2024是中華民國kah台灣獨立最後ê決戰」，伊呼籲郭台銘董事長，出馬替阮解心願。「國民黨若beh愛和平統一，tio̍h先hō͘台灣少年人知影家己是tó一國ê人」。

台灣人已經真久無聽tio̍h「漢奸」chit-ê罵人ê語詞。Ē記得作gín-áê時陣，逐工tio̍h愛唱一首「反共抗俄歌」：「打倒俄寇，反共產反共產；消滅朱毛，殺漢奸殺漢奸。」gín-á人知影siáⁿ-mi̍h「漢奸」咧？大漢了後去chhōe資料才知影，oh！原來tī五千年悠久歷史內底，「漢奸」算是一个真幼齒ê名詞，滿á拍入關統治歸个當時ê中國，建立大清帝國了後，滿清統治者主張家己kah漢人利害相通；mā是有漢人認為滿清ê利益tio̍h是漢人ê利益，致使有真chē人kā滿漢看作一體。見若違背in ê利益ê人lóng叫作「漢奸」，意思是通敵人ê人。大清帝國統治中國276年（1636—-1912），猶原有真chē親像孫中山chit款人，認為滿á kah漢人並m̄是一體，所以伊革命ê宗旨有一條是「驅逐韃虜」，韃虜原本是指中國大陸北方蒙古、女真等遊牧民族，當然m̄是漢民族ê人。

　　中日戰爭中，倚日本侵略者á是倚日本人所扶持ê所謂「偽政權」ê人，證據充分ê，lóng總稱呼作「漢奸」，抗戰勝利了後，hiah-ê「漢奸」lóng tio̍h受審判定罪。

　　蔣介石kah中國國民黨政府hō͘中國共產黨拍kah走路來台灣，當然對當時tī毛澤東、朱德領導下ê中國共產黨恨到入骨；對tī後壁唆使kah支援ê蘇聯共產黨罵作是「俄寇」，「寇」是賊á土匪。聽講阮gín-á時代所唱ê hit首「反共抗俄歌」歌詞是蔣介石寫ê，咱ētàng理解伊那ē罵人「漢奸」。

　　現此時tī中國，九十一歲ê資中筠（kun）女士，是一位真受尊敬ê公共智識分子，伊bat擔任過中國社會科學院美國研究所所長。伊講：對無仝款意見ê人to̍h罵伊是「漢奸」，「漢奸」chit-ê 詞煞變作「國罵」，kā「漢奸」chit-ê 詞加tī意見kah我無仝ê人身上，mā是「中國特色」、而且是現在ê「中國特色」。Án-ne，咱tio̍h知影原來劉家昌離咱台灣jōa-ni̍h遠。

　　今á日tī台灣，有幾个人關心：「漢奸」是siáⁿ-mi̍h碗糕？　　(211231)
註：「漢奸」　　俄寇　　反共抗俄歌曲ê歌詞　　請唸華語