《綠色短評》

 | | | 轉寄

罷免高雄市議員黃捷，是一場笑話！

作者 李南衡, ChoânTâijī/全台字 by Chng Hūiphêng 2021.02.14

Choânbîn Tâioânjī pán/全民台灣字版簡稱ChoânTâiJī



　　Hán fěn hoatkhí, Tiongkok Kokbîntóng choânle̍k ūnchok, pābián Hōngsoaⁿ khu soánchhut ê hiānsî bôtóngchek Ko’hiông chhīgīoân N̂g Chia̍p, jīgo̍eh chhela̍k tâuphiò, kiatkó sī tôngì phiò 55,261 phiò, 45.8%, bôtôngì phiò 65,392 phiò, 54.2%, N̂g Chia̍p pābián àn bô sêngli̍p. Chit tiûⁿ pābián oa̍htāng ùi khaisí liânsú itti̍t kàu tâuphiò kiatkó, chhiòōe bô tn̄g. Ēng "pòho̍k sèng ê pābián" lâi pābián chi̍t ūi chīnchit ê chhīgīoân, tio̍h sī chi̍tê chhiòōe.

　　Siáⁿmi̍h sī "pòho̍k sèng ê pābián" ? Lán khòaⁿ " pā Chia̍p" Chúchiong chi it ê Hán fěn hēngjîn ko giâ pābián N̂g Chia̍p ê pâi’á téngbīn siá, M̄thang bē kìtit la̍kgo̍eh chhela̍k ê thíjio̍k. Ēbīn ū chi̍t tōa tiuⁿ N̂g Chia̍p hoán pe̍hba̍k ê siòngphìⁿ. La̍kgo̍eh chhela̍k sī Hân Kokjû chhītiúⁿ hông pābián tiāu ê ji̍tchí, He sī siáⁿmi̍h thíjio̍k ê ji̍tchí ? Ēbīn hit tiuⁿ N̂g Chia̍p hoán pe̍hba̍k ê siòngphìⁿ, thêchhéⁿ lán 2019 nî gō͘go̍eh chhesaⁿ, Kohiông chhīgīhōe chìnhêng nn̄g hōaⁿ siócho͘ choanàn pòkò ê sî, Hân Kokjû chhītiúⁿ jīnûi Kohiông chhī ū koân siatli̍p "Chūiû kengchè bō͘e̍k khu", Sîtāile̍kliōng chhīgīoân N̂g Chia̍p mn̄g chhītiúⁿ, lí káⁿ chaiiáⁿ siáⁿmi̍h kiò choh "Chūiû kengchè bō͘e̍k khu"? Kūthé lāṳông sī siáⁿ? Beh ánchóaⁿ siat? Hân chhītiúⁿ liânsòa saⁿ piàn ìn kóng,"Kohiông hoat tōachâi! " N̂g Chia̍p chhīgīoân tongtiûⁿ hoán pe̍hba̍k. Ta̍kê chinài khòaⁿ N̂g Chia̍p gīoân ê chitsûn kah i hoán pe̍hba̍k ê kiàⁿthâu. Hân Kokjû chhītiúⁿ ê siaⁿsè chū ánne ná chúipangsoaⁿ, chi̍t kang pí chi̍t kang khah thô͘, kuibóe hông pābián tiāu chhītiúⁿ. Só͘í Hán fěn hēngjîn ko bô engkai kiò ta̍kê m̄thang bē kìtit la̍kgo̍eh chhela̍k, i engkai kiò ta̍kê m̄thang bē kìtit gō͘go̍eh chhesaⁿ chiah tio̍h.

　　 Tòngsoán ē ji̍t chêng kongkò pābián N̂g Chia̍p líiûsu, pā Chia̍p thoânthé lia̍tchhut líiû tē gō͘ tiám sī "Ûihoat kàiji̍p Káng pō chìnhêng bu̍tchu bō͘chi̍p, tùi Tiong thāitō͘ giâmtiōng siang piau" jīnûi i " bō͘chi̍p bu̍tchu pō͘hūn bênghián ûihoán kok’anhoat tē jīit tiâu". Tâioân ê kok’anhoat kantaⁿ ū cha̍p tiâu niāniā, Hiangkáng ê kok’anhoat chiah ū jīit tiâu. Pā Chia̍p thoânthé ēng Tiongkok ê khùikháu, ēng Hiangkáng kok’anhoat lâi pābián N̂g Chia̍p, m̄ sī hóchhiò, sī khóò͘ⁿ!

Itgo̍eh jīsaⁿ Hōngsoaⁿ pā Chia̍p iûhêng, Tiongkok Kokbîntóng tiongsiôngúi Sím Tìhūi tī iûhêng tiong, tōasiaⁿ hoah "Tâitiong ka’iû!" hāi chiokchē lâng chhiò kah chhùi ha̍p bē óa lâi.

　　 Tiongkok Kokbîntóng náchhiūⁿ chia̍htio̍h Hân Kokjû ê chhùinōa, kóngōe itti̍t chhinchhiūⁿ i "Kohiông hoat tōachâi" khekpôaⁿ thiàuchim , kiⁿî Tiongkok Kokbîntóng ti̍tti̍t thiàuchiam,"hoán Lâi (萊) ti". Pābián Kohiông chhīgīoân N̂g Chia̍p tio̍h ti̍tti̍t thiàuchim,"hoán Lâi ti, pā N̂g Chia̍p". Chhiò sílâng, Kohiông chhīgīoân kah Lâi ti ū siáⁿ koanhē? In sīmchì o͘pe̍h loāntôaⁿ kóng, pā N̂g Chia̍p ē kòe tio̍h ē chiongchí Lâi ti chìnkháu!

　　 Tiongkok Kokbîntóng chúse̍k Kang Khésîn lo̍hkhì Kohiông tok kun pābián N̂g Chia̍p oa̍htāng, kéngkò Bînchìntóng bēsái piàⁿ choântóng ê la̍t, nā ánne chò tio̍h sī kokka le̍kliōng kàiji̍p. Pā Chia̍p ê chêng chi̍t àm, Kang Khésîn chúse̍k kah tiôngsin ji̍p tóng ê Tiongkóng tángsūtiúⁿ Tiō Siáukhong ēng iáⁿphìⁿ ha̍p thé tōasiaⁿ hoah thoânkiat pā Chia̍p, pìsutiúⁿ Lí Khianliông chhōa cha̍p kúi ūi li̍púi kàu hiāntiûⁿ chō͘ tīn, choân tiûⁿ phàuhóe chiâⁿ béng, tōasiaⁿ hoah "pābián N̂g Chia̍p, kàuhùn Bînchìntóng".

Chit piàn pābián N̂g Chia̍p sī chi̍t tiûⁿ chhiòōe, mā hō͘ lán khòaⁿtio̍h Hōngsoaⁿ lâng hoán pe̍hba̍k hō͘ Tiongkok Kokbîntóng khòaⁿ. Kéngkò Tiongkok Kokbîntóng, nā itti̍t ánne nāu chhiòōe, Tiongkok Kokbîntóng ē tò! 　(210206)
Chù, hoán （péng） pe̍hba̍k

Pe̍h-ōe-jī-pán/白話字版



　　Hán fěn hoat-khí, Tiong-kok Kok-bîn-tóng choân-le̍k ūn-chok, pā-bián Hōng-soaⁿ khu soán-chhut ê hiān-sî bô tóng chek Ko-hiông chhī gī-oân N̂g Chia̍p, jī-go̍eh chhe-la̍k tâu-phiò, kiat-kó sī tông-ì phiò 55,261phiò, 45.8%, bô-tông-ì phiò 65,392 phiò, 54.2%, N̂g Chia̍p pā-bián àn bô sêng-li̍p. Chit tiûⁿ pā-bián oa̍h-tāng ùi khai-sí liân-sú it-ti̍t kàu tâu-phiò kiat-kó, chhiò-ōe bô tn̄g. Ēng "pò-ho̍k sèng ê pā-bián" lâi pā-bián chi̍t ūi chīn-chit ê chhī gī-oân, tio̍h sī chi̍t-ê chhiò-ōe.

　　Siáⁿ-mi̍h sī "pò-ho̍k sèng ê pā-bián" ? Lán khòaⁿ " pā Chia̍p" Chú-chiong chi it ê Hán fěn hēng-jîn ko giâ pā-bián N̂g Chia̍p ê pâi-á téng-bīn siá, M̄-thang bē kì-tit la̍k-go̍eh chhe-la̍k ê thí-jio̍k. Ē-bīn ū chi̍t tōa tiuⁿ N̂g Chia̍p hoán pe̍h-ba̍k ê siòng-phìⁿ. La̍k-go̍eh chhe-la̍k sī Hân Kok-jû chhī-tiúⁿ hông pā-bián tiāu ê ji̍t-chí, He sī siáⁿ-mi̍h thí-jio̍k ê ji̍t-chí ? Ē-bīn hit tiuⁿ N̂g Chia̍p hoán pe̍h-ba̍k ê siòng-phìⁿ, thê-chhéⁿ lán 2019 nî gō͘-go̍eh chhe-saⁿ, Ko-hiông chhī-gī-hōe chìn-hêng nn̄g hōaⁿ sió-cho͘ choan-àn pò-kò ê sî, Hân Kok-jû chhī-tiúⁿ jīn-ûi Ko-hiông chhī ū koân siat-li̍p "Chū-iû keng-chè bō͘-e̍k khu", Sî-tāi-le̍k-liōng chhī gī-oân N̂g Chia̍p mn̄g chhī-tiúⁿ, lí káⁿ chai-iáⁿ siáⁿ mi̍h kiò choh "Chū-iû keng-chè bō͘-e̍k khu"? Kū-thé lāi-iông sī siáⁿ? Beh án-chóaⁿ siat? Hân chhī-tiúⁿ liân-sòa saⁿ piàn ìn kóng,"Ko-hiông hoat tōa-châi! " N̂g Chia̍p chhī gī-oân tong-tiûⁿ hoán pe̍h-ba̍k. Ta̍k-ê chin-ài khòaⁿ N̂g Chia̍p gī-oân ê chit-sûn kah i hoán pe̍h-ba̍k ê kiàⁿ-thâu. Hân Kok-jû chhī-tiúⁿ ê siaⁿ-sè chū án-ne ná chúi pang soaⁿ, chi̍t kang pí chi̍t kang khah thô͘, kui-bóe hông pā-bián tiāu chhī-tiúⁿ. Só͘-í Hán fěn hēng-jîn ko bô eng-kai kiò ta̍k-ê m̄-thang bē kì-tit la̍k-go̍eh chhe-la̍k, i eng-kai kiò ta̍k-ê m̄-thang bē kì-tit gō͘-go̍eh chhe-saⁿ chiah tio̍h.

　　 Tòng-soán ē ji̍t chêng kong-kò pā-bián N̂g Chia̍p lí-iû-su, pā Chia̍p thoân-thé lia̍t-chhut lí-iû tē gō͘ tiám sī "Ûi-hoat kài-ji̍p Káng pō chìn-hêng bu̍t-chu bō͘-chi̍p, tùi Tiong thāi-tō͘ giâm-tiōng siang piau" jīn-ûi i " bō͘-chi̍p bu̍t-chu pō͘-hūn bêng-hián ûi-hoán Kok-an-hoat tē jī-it tiâu". Tâi-oân ê Kok- an-hoat kan-taⁿ ū cha̍p tiâu niā-niā, Hiang-káng ê kok-an-hoat chiah ū jī-it tiâu. Pā Chia̍p thoân-thé ēng Tiong-kok ê khùi-kháu, ēng Hiang-káng kok-an -hoat lâi pā-bián N̂g Chia̍p, m̄ sī hó-chhiò, sī khó-ò͘ⁿ! It-go̍eh jī-saⁿ Hōng-soaⁿ pā chia̍p iû-hêng, Tiong-kok Kok-bîn-tóng tiong-siông-úi Sím Tì-hūi tī iû-hêng tiong, tōa-siaⁿ hoah "Tâi-tiong ka-iû!" hāi chiok-chē lâng chhiò kah chhùi ha̍p bē óa lâi.

　　 Tiong-kok Kok-bîn-tóng ná-chhiūⁿ chia̍h-tio̍h Hân Kok-jû ê chhùi-nōa, kóng-ōe it-ti̍t chhin-chhiūⁿ i "Ko-hiông hoat tōa-châi" khek-pôaⁿ thiàu-chim , kin-nî Tiong-kok Kok-bîn-tóng ti̍t-ti̍t thiàu-chiam,"hoán Lâi (萊) ti". Pā-bián Ko-hiông chhī-gī-oân N̂g Chia̍p tio̍h ti̍t-ti̍t thiàu-chim,"hoán lâi ti, pā N̂g Chia̍p". Chhiò sí-lâng, Ko-hiông chhī-gī-oân kah Lâi ti ū siáⁿ koan-hē? In sīm-chì o͘-pe̍h loān-tôaⁿ kóng, pā N̂g Chia̍p ē kòe tio̍h ē chiong-chí Lâi ti chìn-kháu!

　　 Tiong-kok Kok-bîn-tóng chú-se̍k Kang Khé-sîn lo̍h-khì Ko-hiông tok kun pā-bián N̂g Chia̍p oa̍h-tāng, kéng-kò Bîn-chìn-tóng bē-sái piàⁿ choân-tóng ê la̍t, nā án-ne chò tio̍h sī kok-ka le̍k-liōng kài-ji̍p. Pā Chia̍p ê chêng chi̍t àm, Kang Khé-sîn chú-se̍k kah tiông-sin ji̍p tóng ê Tiong-kóng táng-sū-tiúⁿ Tiō Siáu-khong ēng iáⁿ-phìⁿ ha̍p thé tōa-siaⁿ hoah thoân-kiat pā Chia̍p, pì-su-tiúⁿ Lí Khian-liông chhōa cha̍p kúi ūi li̍p-úi kàu hiān-tiûⁿ chō͘ tīn, choân tiûⁿ phàu- hóe chiâⁿ béng, tōa-siaⁿ hoah "pā-bián N̂g Chia̍p, kàu-hùn Bîn-chìn-tóng".

Chit piàn pā-bián N̂g Chia̍p sī chi̍t tiûⁿ chhiò-ōe, mā hō͘ lán khòaⁿ-tio̍h Hōng-soaⁿ lâng hoán pe̍h-ba̍k hō͘ Tiong-kok Kok-bîn-tóng khòaⁿ. Kéng-kò Tiong-kok Kok-bîn-tóng, nā it-ti̍t án-ne nāu chhiò-ōe, Tiong-kok Kok-bîn-tóng ē tò! 　(210206)
Chù, hoán （péng） pe̍h-ba̍k

　　韓粉發起、中國國民黨全力運作，罷免鳳山區選出ê現時無黨籍高雄市員黃捷，二月初六投票，結果是同意票55,261票、45.8%，不同意票65,392票、54.2%，黃捷罷免案無成立。Chit場罷免活動ùi開始連署一直到投票結果，笑話無斷。用「報復性ê罷免」來罷免一位盡職ê市議員，tio̍h是一个笑話。

　　Siáⁿ物是「報復性ê罷免」？咱看「罷捷」主將之一ê韓粉杏仁哥giâ罷免黃捷ê牌á頂面寫：M̄-thang bē記得六月初六ê恥辱。下面有一大張黃捷反白目ê相片。六月初六是韓國瑜市長hông罷免掉ê日子，He是siáⁿ物恥辱ê日子？下面hit張黃捷反白目ê相片，提醒咱2019年五月初三，高雄市議會進行兩岸小組專案報告ê時，韓國瑜市長認為高雄市有權設立「自由經濟貿易區」，時代力量市議員黃捷問市長，你敢知影siáⁿ物叫作「自由經濟貿易區」？具體內容是siáⁿ？Beh án怎設？韓市長連續三遍應講：「高雄發大財！」黃捷市議員當場反白目。Ta̍k个真愛看黃捷議員ê質詢kah伊反白目ê鏡頭。韓國瑜市長ê聲勢自按呢ná水崩山，一工比一工khah土，歸尾hông罷免掉市長。所以韓粉杏仁哥無應該叫ta̍k个m̄-thang bē記得六月初六，伊應該叫ta̍k个m̄-thang bē記得五月初三chiah tio̍h。

　　中選會日前公告罷免黃捷理由書，罷捷團體列出理由第五點是「違法介入港暴進行物資募集，對中態度嚴重雙標」認為伊「募集物資部分明顥違反國安法第二一條」。台灣ê國安法kan-taⁿ有十條niā-niā，香港ê國安法才有二一條。罷捷團體用中國ê氣口、用香港國安法來罷免黃捷，m̄是好笑，是可惡！

一月二三鳳山罷捷遊行，中國國民黨中常委沈智慧tī遊行中，大聲喝「台中加油！」害足chē人笑kah嘴合bē倚來。

　　中國國民黨ná像食tio̍h韓國瑜ê嘴nōa，講話一直親像伊「高雄發大財」曲盤跳針，今年中國國民黨直直跳針：「反萊豬」。罷免高雄市議員黃捷tio̍h直直跳針：「反萊豬，罷黃捷」。笑死人，高雄市議員kah萊豬有siáⁿ關係？In甚至烏白亂彈講：罷黃捷ē過tio̍h ē終止萊豬進口！

　　中國國民黨主席江啟臣落去高雄督軍罷免黃捷活動，警告民進黨bē-sái拼全黨ê力，若án-ne做tio̍h是國家力量介入。罷捷ê前一暗，江啟臣主席kah重新入黨ê中廣董事長趙少康用影片合體大聲喝團結罷捷，秘書長李乾龍chhōa十幾位立委到現場助陣，全場砲火誠猛，大聲喝「罷免黃捷、教訓民進黨」。

Chit遍罷免黃捷是一場笑話，mā hō͘咱看tio̍h鳳山人反白目hō͘中國國民黨看。警告中國國民黨，若一直án-ne鬧笑話，中國國民黨ē倒！　(210206)

註：反（péng）白目