《綠色短評》

 | | | 轉寄

郭台銘kah中國lóng假ná m̄-chiâⁿgín-á！

作者 李南衡, ChoânTâijī/全台字 by Chng Hūi-phêng 2023.11.05




Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》 Lí Lâmhêng

　　 Koeh Tâibêng kah Tiongkok lóng ké ná m̄chiâⁿ gíná!

　　 Cha̍pgoe̍h jījī, Tiongkok koaⁿhong mûithé 《 khoân kiû sîpò 》 ínsu̍t siausit pòtō, sòebū pō͘mn̂g kīnkî íhoat tùi Pùsūkhong chi̍pthoân, tī Kńgtang, Kangso͘ ê tiōngtiám khìgia̍p chìnhêng sòebū khéchhâ, Chūjiân Chugoân Pō͘mn̂g tùi Pùsūkhong tī Hôlâm, Ô͘pak ê tiōngtiám khìgia̍p ēng tē chênghóng, chìnhêng hiāntiûⁿ tiâucha.

　　 Cha̍pgoe̍h jīsaⁿ àm, châikeng choanka Siā Kimhô tī bīnchheh kóng, Τiongkiōng tùi Pùsūkhong choânbīn chhâ sòe ê siausit, pàṳt siausit thoânchhut liáuāu hō͘ choânkiû kimiông chhītiûⁿ tōa tio̍hkiaⁿ, kokchè mûithé siocheⁿ pòtō,"tī Siōnghái kó͘chhī chiūⁿchhī ê kanggia̍p Pùliân khui pôaⁿ to̍h lo̍hthêng, jîchhiáⁿ chi̍t kè kàuté, kó͘ kè poa̍h 1.62 jînbîn pè, chhīta̍t chenghoat kiuchúi 321 ek jînbînpè, Tâioân ê Hônghái poa̍h 3 kho͘, kó͘kè biānlîm 100 kho͘ póūichiàn, chit kang, kuiê Hônghái chi̍pthoân chhīta̍t chìchió chiatsún chhiaukòe 2,000 ek sintâipè, che sī tùi Koehtáng chiâⁿū satsiongla̍t ê chi̍t kang."

　　 Tiongkok ná ē ánne ka siulí? kiⁿî pehgoe̍h jīpeh, Koeh Tâibêng soanpò͘ chhamsoán chóngthóng ê sî, hôeèng mûithé the̍hmn̄g, siatsú Τiongkiōng nā inūi lí Koeh Tâibêng bô thiaⁿ ōe, to̍h beh kā Hônghái ê châisán bu̍tsiu, lí beh ánchóaⁿ? Koeh Tâibêng khòaⁿ·khí·lāi ná chhiūⁿ chiâⁿ ū pàkhùi, ìn kóng"Yes, Please do it, nāsī Τiongkiōng bô phah Tâioân, góa ēsài tiôngsin chò bô͘á kanglâng, góa bētàng thiaⁿ i (Τiongkiōng) ê chíphài, góa chū lâi m̄bat siū Τiongkiōng ê khòngchè, lí lâi phah góa, bu̍tsiu góa ê châisán, góa iûgoân bô siū uihia̍p."Koeh Tâibêng kinpún sī teh kóng gíná ōe. Tiongkok khòaⁿ Koeh Tâibêng chinchiàⁿ teh piàⁿ beh soán chóngthóng, jîchhiáⁿ cha̍pgoe̍h cha̍pkáu hùchhiú Lōa Phòehâ tī bīnchheh soanpò͘ íkeng chèngsek the̍h tio̍h sòngsit Bíkok kokchek chèngsu, Tiongkok to̍h chhutchhiú kā i siulí.

　　 Ji̍tpún “ Sánkeng Sinbûn” Tāipak chikio̍ktiúⁿ Yaita Akio kekiám khoe kóng, chit piàn Koeh Tâibêng kah Τiongkiōng ê hō͘tōng, ná chhinchhiūⁿ "Tiongkok tangpak ê m̄chiâⁿ gíná teh oanke siophah". A kóng,"lí khòaⁿ siáⁿ?" B kóng,"khòaⁿ lí, sī ánchóaⁿ?"A kóng,"hótáⁿ koh khòaⁿ chi̍t piàn khòaⁿ māi!" B kóng,"khòaⁿ to̍h khòaⁿ sī ánchóaⁿ!" kipún siōng kàu chit ê sîchūn, nn̄g pêng tio̍h ē khaisí khíkha tāngchhiú, siàn chhùiphóe, cheng paktó͘, kiatkó tāikhài sianghong lóng ū tio̍hsiong, bô lâng phah iâⁿ.

Chènglūnka 汪浩 ti̍tpe̍h kóng,"Chitmá Τiongkiōng lâi chhâ chúipió, Koehtáng íkeng 24 tiámcheng tiāmtiām m̄ káⁿ chhut siaⁿ! Chit chióng lâng kóng beh kah Xíjìnpíng tâm hôpêng hia̍pgī? Khah chá khùn khah ū bîn!"

Siā Kimhô kóng,"Τiongkiōng giâm chhâ Pùsūkhong, sī m̄ sī beh hō͘ Koehtáng tilân jîthè, kaji̍p chéngha̍p Nâpe̍h ê hânglia̍t. Τiongkiōng giâm chhâ Pùsūkhong lēnggōa chi̍tê ìhâm sī Tâisiong mā sī tī kiōngtông hùjū chi lia̍t. Chit piàn chhâ sòe, Pùsūkhong khólêng mā tio̍h chhinchhiūⁿ Alí Pápah, Thn̂gsìn, kauchhut chi̍t tōa pit chukim chiah ē soah."

Thiaⁿkóng Hônghái tī Tiongkok ê khìgia̍p Pùsūkhong hō͘ Tiongkok chhâ chúipió, Bînchìntóng Lōa Chhengtek kóng, góa hibāng lán choânkok bînchiòng engkai to̍h chichhî Hônghái, chichhî Tâioân ê khìgia̍p. Pêⁿpêⁿ sī chit piàn chóngthóng chhamsoánjîn, Tiongkok Kokbîntóng ê Hâu Iúgî kah Bînchiòngtóng ê Koa Bûntiat, tiām chiⁿchiⁿ koai kah ná niauá leh!

　　 Tiongkok nā khòaⁿ lâng bē sóng to̍h beh chhutchhiú phah lâng, Koeh Tâibêng kantaⁿ chhut chi̍t ki chhùi ké ióng. Nn̄gê lóng ké ná m̄chiâⁿ gíná! 　　(231027)


Chù, 汪浩 chhiáⁿ liām Hôagí



Pe̍h-ōe-jī-pán/白話字版


《 Le̍k-sek toán-phêng 》 Lí Lâm-hêng

　　 Koeh Tâi-bêng kah Tiong-kok lóng ké ná m̄-chiâⁿ gín-á!

　　 Cha̍p-goe̍h jī-jī, Tiong-kok koaⁿ-hong mûi-thé 《 khoân kiû sî-pò 》 ín-su̍t siau-sit pò-tō, sòe-bū pō͘-mn̂g kīn-kî í-hoat tùi Pù-sū-khong chi̍p-thoân, tī Kńg-tang, Kang-so͘ ê tiōng-tiám khì-gia̍p chìn-hêng sòe-bū khé-chhâ, Chū-jiân Chu-goân Pō͘-mn̂g tùi Pù-sū-khong tī Hô-lâm, Ô͘-pak ê tiōng-tiám khì-gia̍p ēng tē chêng-hóng, chìn-hêng hiān-tiûⁿ tiâu-cha.

　　 Cha̍p-goe̍h jī-saⁿ àm, châi-keng choan-ka Siā Kim-hô tī bīn-chheh kóng, Τiong-kiōng tùi Pù-sū-khong choân-bīn chhâ sòe ê siau-sit, pài-it siau-sit thoân-chhut liáu-āu hō͘ choân-kiû kim-iông chhī-tiûⁿ tōa tio̍h-kiaⁿ, kok-chè mûi-thé sio-cheⁿ pò-tō,"tī Siōng-hái kó͘-chhī chiūⁿ-chhī ê kang-gia̍p Pù-liân khui pôaⁿ to̍h lo̍h-thêng, jî-chhiáⁿ chi̍t kè kàu-té, kó͘ -kè poa̍h 1.62 jîn-bîn pè, chhī-ta̍t cheng-hoat kiu-chúi 321 ek jîn-bîn-pè, Tâi-oân ê Hông-hái poa̍h 3 kho͘, kó͘-kè biān-lîm 100 kho͘ pó-ūi-chiàn, chit kang, kui-ê Hông-hái chi̍p-thoân chhī-ta̍t chì-chió chiat-sún chhiau-kòe 2,000 ek sin-tâi-pè, che sī tùi Koeh-táng chiâⁿ-ū sat-siong-la̍t ê chi̍t kang."

　　 Tiong-kok ná ē án-ne ka siu-lí? kin-nî peh-goe̍h jī-peh, Koeh Tâi-bêng soan-pò͘ chham-soán chóng-thóng ê sî, hôe-èng mûi-thé the̍h-mn̄g, siat-sú Τiong-kiōng nā in-ūi lí Koeh Tâi-bêng bô thiaⁿ ōe, to̍h beh kā Hông-hái ê châi-sán bu̍t-siu, lí beh án-chóaⁿ? Koeh Tâi-bêng khòaⁿ-·khí-·lāi ná chhiūⁿ chiâⁿ ū pà-khùi, ìn kóng"Yes, Please do it, nā-sī Τiong-kiōng bô phah Tâi-oân, góa ē-sài tiông-sin chò bô͘-á kang-lâng, góa bē-tàng thiaⁿ i (Τiong-kiōng) ê chí-phài, góa chū lâi m̄-bat siū Τiong-kiōng ê khòng-chè, lí lâi phah góa, bu̍t-siu góa ê châi-sán, góa iû-goân bô siū ui-hia̍p."Koeh Tâi-bêng kin-pún sī teh kóng gín-á ōe. Tiong-kok khòaⁿ Koeh Tâi-bêng chin-chiàⁿ teh piàⁿ beh soán chóng-thóng, jî-chhiáⁿ cha̍p-goe̍h cha̍p-káu hù-chhiú Lōa Phòe-hâ tī bīn-chheh soan-pò͘ í-keng chèng-sek the̍h tio̍h sòng-sit Bí-kok kok-chek chèng-su, Tiong-kok to̍h chhut-chhiú kā i siu-lí.

　　 Ji̍t-pún “ Sán-keng Sin-bûn” Tāi-pak chi-kio̍k-tiúⁿ Yaita Akio ke-kiám khoe kóng, chit piàn Koeh Tâi-bêng kah Τiong-kiōng ê hō͘-tōng, ná chhin-chhiūⁿ "Tiong-kok tang-pak ê m̄-chiâⁿ gín-á teh oan-ke sio-phah". A kóng,"lí khòaⁿ siáⁿ?" B kóng,"khòaⁿ lí, sī án-chóaⁿ?"A kóng,"hó-táⁿ koh khòaⁿ chi̍t piàn khòaⁿ māi!" B kóng,"khòaⁿ to̍h khòaⁿ sī án-chóaⁿ!" ki-pún siōng kàu chit ê sî-chūn, nn̄g pêng tio̍h ē khai-sí khí-kha tāng-chhiú, siàn chhùi-phóe, cheng pak-tó͘, kiat-kó tāi-khài siang-hong lóng ū tio̍h-siong, bô lâng phah iâⁿ.

Chèng-lūn-ka 汪浩 ti̍t-pe̍h kóng,"Chit-má Τiong-kiōng lâi chhâ chúi-pió, Koeh-táng í-keng 24 tiám-cheng tiām-tiām m̄ káⁿ chhut siaⁿ! Chit chióng lâng kóng beh kah Xíjìnpíng tâm hô-pêng hia̍p-gī? Khah chá khùn khah ū bîn!"

Siā Kim-hô kóng,"Τiong-kiōng giâm chhâ Pù-sū-khong, sī m̄ sī beh hō͘ Koeh-táng ti-lân jî-thè, ka-ji̍p chéng-ha̍p Nâ-pe̍h ê hâng-lia̍t. Τiong-kiōng giâm chhâ Pù-sū-khong lēng-gōa chi̍t-ê ì-hâm sī Tâi-siong mā sī tī kiōng-tông hù-jū chi lia̍t. Chit piàn chhâ sòe, Pù-sū-khong khó-lêng mā tio̍h chhin-chhiūⁿ A-lí Pá-pah, Thn̂g-sìn, kau-chhut chi̍t tōa pit chu-kim chiah ē soah."

Thiaⁿ-kóng Hông-hái tī Tiong-kok ê khì-gia̍p Pù-sū-khong hō͘ Tiong-kok chhâ chúi-pió, Bîn-chìn-tóng Lōa Chheng-tek kóng, góa hi-bāng lán choân-kok bîn-chiòng eng-kai to̍h chi-chhî Hông-hái, chi-chhî Tâi-oân ê khì-gia̍p. Pêⁿ-pêⁿ sī chit piàn chóng-thóng chham-soán-jîn, Tiong-kok Kok-bîn-tóng ê Hâu Iú-gî kah Bîn-chiòng-tóng ê Koa Bûn-tiat, tiām chiⁿ-chiⁿ koai kah ná niau-á leh!

　　 Tiong-kok nā khòaⁿ lâng bē sóng to̍h beh chhut-chhiú phah lâng, Koeh Tâi-bêng kan-taⁿ chhut chi̍t ki chhùi ké ióng. Nn̄g-ê lóng ké ná m̄-chiâⁿ gín-á! 　　(231027)


Chù, 　汪浩 chhiáⁿ liām Hôa-gí




　　十月二二，中國官方媒體《環球時報》引述消息報導，稅務部門近期依法對富士康集團，tī廣東、江蘇ê重點企業進行稅務稽查，自然資源部門對富士康tī河南、湖北ê重點企業用地情況，進行現場調查。

　　十月二三暗，財經專家謝金河tī面冊講，中共對富士康全面查稅ê消息，拜一消息傳出了後hō͘全球金融市場大tio̍h驚，國際媒體相爭報導，「tī上海股市上市ê工業富聯開盤to̍h跌停，而且一價到底，股價跋1.62人民幣，市值蒸發321億人民幣，台灣ê鴻海跋3元，股價面臨100元保衞戰，chit工，kui个鴻海集團市值至少折損超過2,000億新台幣，che是對郭董chiâⁿ有殺傷力ê一工。」

　　中國náēán-ne ka修理？今年八月二八，郭台銘宣布參選總統ê時，回應媒體提問，設使中共若因為你郭台銘無聽話，to̍h beh kā鴻海ê財產沒收，你beh按怎？郭台銘看起來ná像chiâⁿ有霸氣，應講「Yes、Please do it，若是中共無拍台灣，我ē-sài重新做模á工人，我bētàng聽伊（中共）ê指派，我自來m̄bat受中共ê控制，你來拍我，沒收我ê財產，我猶原無受威脅。」郭台銘根本是teh講gín-á話。中國看郭台銘真正teh拚beh選總統，而且十月十九副手賴佩霞tī面冊宣布已經正式the̍h tio̍h喪失美國國籍證書，中國to̍h出手kā伊修理。

　　日本《產經新聞》台北支局長Yaita Akio（矢板明夫）加減khoe講，chit遍郭台銘kah中共ê互動，ná親像「中國東北êm̄chiâⁿgín-á teh冤家相拍」。A講：「你看啥？」B講：「看你，是按怎？」A講：「好膽koh看一遍看māi！」B講：「看to̍h看是按怎！」基本上到chitê時陣，兩旁tio̍hē開始起腳動手，siàn嘴phóe、舂腹肚，結果大概雙方lóng有tio̍h傷，無人拍嬴。

政論家汪浩直剖講：「Chitmá中共來查水表，郭董已經24點鐘恬恬m̄敢出聲！Chit種人講beh kah習近平談和平協議？Khah早睏khah有眠！」

謝金河講，「中共嚴查富士康，是m̄是beh hō͘郭董知難而退，加入整合藍白ê行列。中共嚴查富士康另外一个意涵是台商mā是tī共同富裕之列。Chit遍查稅，富士康可能mā tio̍h親像阿里巴巴、騰訊，交出一大筆資金才ē煞。」

聽講鴻海tī中國ê企業富士康hō͘中國查水表，民進黨賴清德講：我希望咱全國民眾應該to̍h支持鴻海、支持台灣ê企業。平平是chit遍總統參選人，中國國民黨ê候友宜kah民眾黨ê柯文哲，恬chiⁿchiⁿ乖kah ná貓á咧！

　　中國若看人bē爽to̍h beh出手拍人，郭台銘kan-taⁿ出一枝嘴ké勇。兩个lóng假ná m̄chiâⁿgín-á！ 　　(231027)


註：跌停　　汪浩 請唸華語