《綠色短評》 |
 |
 |
|
 轉寄 |
中國上gâu騙kah假！
作者 李南衡, ChoânTâijī/全台字 by Chng Hūi-phêng 2023.08.27
Choânbîn Tâioânjī pán/全民台灣字版簡稱ChoânTâiJī
《 Le̍ksek toánphêng 》 Lí Lâmhêng
Tiongkok siōng gâu phiàn kah ké!
Phiàn kah ké sī Tiongkok ê nn̄g tōa phiat pō͘. Ē kìtit 1981 nî Tiongkok jînkháu ta̍tkàu 10 ek, chiàm sèkài jînkháu 22%, bô jōa kú Tiongkok tio̍h liûthoân chi̍tê 順口溜,"十億人口九億騙", lí siūⁿ kóng iáu ū chi̍t siâⁿ láusi̍t lâng? chhò·liáu! inūi āu pòaⁿkù sī "還有一億在訓練." Téngsi phiàn ēsi, ēsi phiàn téngsi, chènghú phiàn jînbîn, jînbîn phiàn chènghú, jînbîn hō͘siong phiàn. Ēng siáⁿ phiàn? kóng ké chō ké lâi phiàn tùihong.
Siongsìn chin chē lâng lóng bat thiaⁿkòe chitê Tiongkok chō ké ê kò͘sū, chi̍tê lôngpeh·á khì bé chi̍t tōa pau chiéngchí, sinkhó͘ kúiá kang lo̍hkhì chèng koh ak chúi, kúi cha̍p kang āu hoatchhut chi̍t tōa phiàn ê cha̍pchháu, inūi i bé ê chéngchí sī ké·ê. Lôngpeh·á sêng siongsim, siūⁿ beh chūsat tio̍h khì bé lôngio̍h lâi lim, kiatkó bô sí, inūi lôngio̍h sī ké·ê. Ūitio̍h lôngpeh·á bô sí, khioh tio̍h miā, chhù·ni̍h ê lâng khì bé chiú lâi khèngchiok, kiatkó choânke tiòngto̍k sí·khì, inūi chiú sī ké·ê.
Chō ké pēng m̄ sī kanta Tiongkok ū niāniā, choân sèkài sìkè lóng ū lâng teh chō ké. Tānsī bô chi̍tê kokka chhinchhiūⁿ Tiongkok chō ké chō kah chiahni̍h chiâuûn chiahni̍h thiatté. Kéhòe biánkóng, bûnpêng mā ké. Nāsī liân chènghú hoatpò͘ ê sò͘kù mā sī ké·ê tio̍h ē hông kiaⁿ! Tiongkok chènghú kongpò͘ kiⁿî la̍kgoe̍h hūn siâⁿtìn 16 chì 24 hòe sitgia̍p lu̍t 21.3% sī le̍ksú siōng kài koân·ê. Tānsī Tiongkok
Pehgoe̍hchhe, sèkài Tiânkéng Chónghōe kongpò͘ chòe sin sèkài pâi miâ, khiok bô khòaⁿtio̍h Tiongkok nn̄gūi gōapiáu chapo͘thé ê lú soánchhiú Liāu Bēngseh kah Tông Chanhoan, mā hō͘ nn̄g lâng sèngpia̍t gî hûn chài tō͘ ínkhí thólūn. Liāu Bēngseh sī nn̄gpah kongchhioh kah sìpah kongchhioh kochhiú, Tông Chanhoan choan kong sìpah kongchhioh, nn̄g lâng kòekhì inūi bênghián ê āmkúnchu siuⁿkòe tōalia̍p téng lâmsèng ê gōa hêng, hông chitgî sī "châpo͘ sin". Sèkài Tiânkèng Chónghōe ū tī la̍kgoe̍h iaukiû Tiongkok Tiânkèng Hia̍phōe, tùi kok séngtūi ê lú soánchhiú chìnhêng "血睪酮" kiámchhek, ittàn chhiau pio tio̍h kìm sài. Só͘í chit nn̄g lâng hông tûmiâ khólêng kah chitê kuitēng iúkoan. Liân sèngpia̍t mā beh phiàn, khóliân!
Tiongkok tī in koklāi ánchóaⁿ phiàn ánchóaⁿ ké, sī in tau ê tāichì. Pàithok mài phiàn mài ké kàu Tâioân lâi! 2021 nî gō͘goe̍h, lán Tâioân tng bôêng phahpiàⁿ hôngtī Búhàn hìiām, tio̍h ū lâng ké choh .《 Chūiû Sîpò 》ê miâ khui siat Twitter siàuhō͘, sànpò͘ iâugiân kóng"Tāipak Sinpak chi̍t bió piànchoh kúiá siâⁿ, náchhiūⁿ sī Bānhôa tōaliōng hìiām ûithé chi̍ptiong hûnsio." Hêngsūkio̍k ū kàiji̍p chengpān, sī tùihōaⁿ bāngkun só͘ chò ê ké sinbûn.
Mênî chiaⁿgoe̍h cha̍psaⁿ, Tâioân beh soán chóngthóng hù chóngthóng kah li̍phoat úigoân, Tiongkok kakī ê jînbîn bô ài chiàukò͘ hō͘ hó, khiok chiâⁿ ū khólêng ē ēng phiàn kah ké ê siausit lâi jiáuloān Tâioân, lán bēsái bô chùì. (230818)
Chù, 順口溜 十億人口九億騙 還有一億在訓練 血睪酮 chhiáⁿ liām Hôagí
Pe̍h-ōe-jī-pán/白話字版
《 Le̍k-sek toán-phêng 》 Lí Lâm-hêng
Tiong-kok siōng gâu phiàn kah ké!
Phiàn kah ké sī Tiong-kok ê nn̄g tōa phiat pō͘. Ē kì-tit 1981 nî Tiong-kok jîn-kháu ta̍t-kàu 10 ek, chiàm sè-kài jîn-kháu 22%, bô jōa kú Tiong-kok tio̍h liû-thoân chi̍t-ê 順口溜,"十億人口九億騙", lí siūⁿ kóng iáu ū chi̍t siâⁿ láu-si̍t lâng? chhò-·liáu! in-ūi āu pòaⁿ-kù sī "還有一億在訓練." Téng-si phiàn ē-si, ē-si phiàn téng-si, chèng-hú phiàn jîn-bîn, jîn-bîn phiàn chèng-hú, jîn-bîn hō͘-siong phiàn. Ēng siáⁿ phiàn? kóng ké chō ké lâi phiàn tùi-hong.
Siong-sìn chin chē lâng lóng bat thiaⁿ-kòe chit-ê Tiong-kok chō ké ê kò͘-sū, chi̍t-ê lông-peh-·á khì bé chi̍t tōa pau chiéng-chí, sin-khó͘ kúi--á kang lo̍h-khì chèng koh ak chúi, kúi cha̍p kang āu hoat-chhut chi̍t tōa phiàn ê cha̍p-chháu, in-ūi i bé ê chéng-chí sī ké-·ê. Lông-peh-·á sêng siong-sim, siūⁿ beh chū-sat tio̍h khì bé lông-io̍h lâi lim, kiat-kó bô sí, in-ūi lông-io̍h sī ké-·ê. Ūi-tio̍h lông-peh-·á bô sí, khioh tio̍h miā, chhù-·ni̍h ê lâng khì bé chiú lâi khèng-chiok, kiat-kó choân-ke tiòng-to̍k sí-·khì, in-ūi chiú sī ké-·ê.
Chō ké pēng m̄ sī kan-ta Tiong-kok ū niā-niā, choân sè-kài sì-kè lóng ū lâng teh chō ké. Tān-sī bô chi̍t-ê kok-ka chhin-chhiūⁿ Tiong-kok chō ké chō kah chiah-ni̍h chiâu-ûn chiah-ni̍h thiat-té. Ké-hòe bián-kóng, bûn-pêng mā ké. Nā-sī liân chèng-hú hoat-pò͘ ê sò͘-kù mā sī ké-·ê tio̍h ē hông kiaⁿ! Tiong-kok chèng-hú kong-pò͘ kin-nî la̍k-goe̍h hūn siâⁿ-tìn 16 chì 24 hòe sit-gia̍p lu̍t 21.3% sī le̍k-sú siōng kài koân-·ê. Tān-sī Tiong-kok
Peh-goe̍h-chhe, sè-kài Tiân-kéng Chóng-hōe kong-pò͘ chòe sin sè-kài pâi miâ, khiok bô khòaⁿ-tio̍h Tiong-kok nn̄g-ūi gōa-piáu cha-po͘-thé ê lú soán-chhiú Liāu Bēng-seh kah Tông Chan-hoan, mā hō͘ nn̄g lâng sèng-pia̍t gî hûn chài tō͘ ín-khí thó-lūn. Liāu Bēng-seh sī nn̄g-pah kong-chhioh kah sì-pah kong-chhioh ko-chhiú, Tông Chan-hoan choan kong sì-pah kong-chhioh, nn̄g lâng kòe-khì in-ūi bêng-hián ê ām-kún-chu siuⁿ-kòe tōa-lia̍p téng lâm-sèng ê gōa hêng, hông chit-gî sī "châ-po͘ sin". Sè-kài Tiân-kèng Chóng-hōe ū tī la̍k-goe̍h iau-kiû Tiong-kok Tiân-kèng Hia̍p-hōe, tùi kok séng-tūi ê lú soán-chhiú chìn-hêng "血睪酮" kiám-chhek, it-tàn chhiau pio tio̍h kìm sài. Só͘-í chit nn̄g lâng hông tû-miâ khó-lêng kah chit-ê kui-tēng iú-koan. Liân sèng-pia̍t mā beh phiàn, khó-liân!
Tiong-kok tī in kok-lāi án-chóaⁿ phiàn án-chóaⁿ ké, sī in tau ê tāi-chì. Pài-thok mài phiàn mài ké kàu Tâi-oân lâi! 2021 nî gō͘-goe̍h, lán Tâi-oân tng bô-êng phah-piàⁿ hông-tī Bú-hàn hì-iām, tio̍h ū lâng ké choh .《 Chū-iû Sî-pò 》ê miâ khui siat Twitter siàu-hō͘, sàn-pò͘ iâu-giân kóng"Tāi-pak Sin-pak chi̍t bió piàn-choh kúi-á siâⁿ, ná-chhiūⁿ sī Bān-hôa tōa-liōng hì-iām ûi-thé chi̍p-tiong hûn-sio." Hêng-sū-kio̍k ū kài-ji̍p cheng-pān, sī tùi-hōaⁿ bāng-kun só͘ chò ê ké sin-bûn.
Mê-nî chiaⁿ-goe̍h cha̍p-saⁿ, Tâi-oân beh soán chóng-thóng hù chóng-thóng kah li̍p-hoat úi-goân, Tiong-kok ka-kī ê jîn-bîn bô ài chiàu-kò͘ hō͘ hó, khiok chiâⁿ ū khó-lêng ē ēng phiàn kah ké ê siau-sit lâi jiáu-loān Tâi-oân, lán bē-sái bô chù-ì. (230818)
Chù, 順口溜 十億人口九億騙 還有一億在訓練 血睪酮 chhiáⁿ liām Hôa-gí
騙kah假是中國ê兩大phiat步。Ē記得1981年中國人口達到10億，佔世界人口22%，無jōa久中國tio̍h流傳一个順口溜：「十億人口九億騙」，你想講iáu有一成老實人？錯了！因為後半句是「還有一億在訓練。」頂司騙下司，下司騙頂司，政府騙人民，人民騙政府，人民互相騙。用啥騙？講假造假來騙對方。
相信真chē人lóng bat聽過chit-ê中國造假ê故事：一个農伯á去買一大包種子，辛苦幾á工落去種koh沃水，幾十工後發出一大片ê雜草，因為伊買ê種子是假ê。農伯á誠傷心，想beh自殺tio̍h去買農藥來lim，結果無死，因為農藥是假ê。為tio̍h農伯á無死、拾（khioh）tio̍h命，厝裡ê人去買酒來慶祝，結果全家中毒死去，因為酒是假ê。
造假並m̄是kan-ta中國有niā-niā，全世界四界lóng有人teh造假。但是無一个國家親像中國造假造kah chiah-ni̍h齊勻（chiâu-ûn）chiah-ni̍h徹底。假貨免講，文憑mā假。若是連政府發佈ê數據mā是假ê tio̍hēhông驚！中國政府公佈今年六月份城鎮16至24歲失業率21.3%是歷史上kài koân-·ê。但是中國《財新網》引述北京大學副教授張丹丹研究指出，若將大約1,600萬名倒平平、kah食父母m̄做工課ê青年lóng看作失業，中國今年三月份青年實際失業率有46.5%。八月十五，中國國家統計局tī記者會宣佈，ùi今年八月起無beh koh發佈青年失業ê數據。繼續公佈ē真pháiⁿ看。Mài公佈總是比公佈假ê數據有khah好，但是án-nemā koh騙人講是為tio̍h調查統計工作ê「健全優化」。Che tio̍h是中國。
八月初，世界田徑總會公佈最新世界排名，卻無看tio̍h中國兩位外表查埔體ê女選手廖孟雪kah童曾歡，mā hō͘兩人性別疑雲再度引起討論。廖孟雪是二百公尺kah四百公尺高手、童曾歡專攻四百公尺，兩人過去因為明顯ê頷頸珠siuⁿ過大粒等男性ê外型，hông質疑是「查埔身」。世界田徑總會有tī六月要求中國田徑協會，對各省隊ê女選手進行「血睪酮」檢測，一旦超標tio̍h禁賽。所以chit兩人hông除名可能kah chit-ê規定有關。連性別mā beh騙，可憐！
中國tī in國內án怎騙án怎假，是in兜ê代誌。拜託mài騙mài假到台灣來！2021年五月，咱台灣tng無閒拍拼防治武漢肺炎，tio̍h有人假作《自由時報》ê名開設Twitter帳戶，散布謠言講「台北新北一秒變作鬼á城，ná像是萬華大量肺炎遺體集中焚燒。」刑事局有介入偵辦，是對岸網軍所做ê假新聞。
明年正月十三，台灣beh選總統副總統kah立法委員，中國家己ê人民無ài照顧hō͘好，卻chiâⁿ有可能ē用騙kah假ê消息來擾亂台灣，咱bē-sái無注意。 (230818)
註：順口溜 十億人口九億騙 還有一億在訓練 血睪酮 請唸華語
- 《綠色短評》文章索引 | RSS | 寄給朋友
- « 上一篇 | 下一篇 »
