《綠色短評》

 | | | 轉寄

中國國民黨gōng話講bē soah！

作者 李南衡, ChoânTâijī/全台字 by Chng Hūiphêng 2023.07.23



Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　 Lí Lâmhêng

　　　 Tiongkok Kokbîntóng gōng ōe kóng bē soah!

Tiongkok Kokbîntóng chóngthóng chhamsoánjîn Hâu Iúgî chòekīn ê bîntiāu bô khísek, chhitgoe̍h chhepeh, khiok thoânchhut Tiongkok Kokbîntóng ànsǹg Koeh Tâibêng chi loān káugoe̍h tiong ē soah, kàusî Koeh Tâibêng nā kui tūi, Hâu Iúgî ê bîntiāu tio̍h ē tòtńglâi kàu tējī, tio̍h ē khaisí kah Koa Bûntiat tâm ha̍pchok, chìnhêng hui Le̍k tōa chéngha̍p, jîchhiáⁿ bô pâithek "Hāu Koa phòe". Tiongkok Kokbîntóng kochàn ùithâu kàubóe ê thāitō͘, tio̍h sī beh ài Bînchiòngtóng chóngthóng chhamsoánjîn Koa Bûntiat "bô tiâukiāⁿ tâuhâng", Tiongkok Kokbîntóng bôkhólêng chiapsiū "Koa Hâu phòe".

Chhitgoe̍h chhepeh ēpo͘, Koa Bûntiat chhutse̍k iliâu sengki sángia̍p kìⁿbīnhōe koh ū hoatpiáu iánkáng. Kìchiá kā Koa Bûntiat kóng, Tiongkok Kokbîntóng kóng beh ài I "bô tiâukiāⁿ tâuhâng". Koa Bûntiat thiaⁿ·chi̍tē soah gāng·khì, ba̍kchiu tián tōatōa lúi tò mn̄g kóng,"bô tiâukiāⁿ tâuhâng?" náchhiūⁿ siongtong tio̍hkiaⁿ. Kìchiá mn̄g kóng, lí káⁿ ē tâuhâng? Koa Bûntiat soah haha tōachhiò kóng,"Ná ē ánne mn̄g? ‧‧ kuikhì ‧‧mài kóng chhiò." chiah ko͘h chhiòchhiòá kóng, ē hoat line taphok kìchiá.

Mài kóng Koa Bûntiat púnlâng thiaⁿtio̍h "bô tiâukiāⁿ tâuhâng" ē gāng·khì, lán bô sū lâng thiaⁿtio̍h mā kámkak thiⁿ o͘ chi̍t pêng. Lán seng lâi liáukái siáⁿmi̍h kiò choh "bô tiâukiāⁿ tâuhâng". Siochiàn sianghong, chiànsu ê hit pêng ūitio̍h hibāng kiatsok chiàncheng, ē thêchhut "bô tiâukiāⁿ tâuhâng", ínchún chiàn iâⁿ hit pêng sûi chāi ánchóaⁿ chhúlí, beh chian beh chú beh ánchóaⁿ koánlí khòngchè inê chèngtī kah siāhōe, lóng bô ìkiàn. Tānsī, nāsī khah iâⁿ hit pêng iaukiû tùihong "bô tiâukiāⁿ tâuhâng", ū khólêng ē ínkhí khah su hit pêng bē sóng kah hoânló, tìsú chiàncheng bô hoattō͘ kín kiatsok, tiantò kā chiàncheng thoa tn̂g.

　　 Nā chiàu chhitgoe̍h chhechhit《Hōelâu sinbûn bāng 》kongpò͘ siōng sin 7 goe̍hhūn chóngthóng tōasoán bîntiāu, tiâucha kiatkó hiánsī, ha̍ppèng chhīlāi tiānōe kah chhiúkiá ê tōaiūⁿpún tiāuchhâ tiong, Bînchiòngtóng Koa Bûntiat chichhî tō͘ í 30.8% tit tēit miâ, siókhóa niáseng chichhî tō͘ 29.3% ê Bînchìntóng Lōa Chhengtek, sianghong chhekū 1.5%, Tiongkok Kokbîntóng Hâu Iúgî phoa̍h phòa nn̄g siâⁿ, chichhî tō͘ kanta 18.5% siōngbóeá miâ.

Hônghái chi̍pthoân chhòngpānjîn Koeh Tâibêng chêng chi̍tchām thoânchhut kóng, iúì "Pēngkò͘ " Bînchiòngtóng. Chhitgoe̍h chhecha̍p Bînchiòngtóng chúse̍k, chóngthóng chhamsoánjîn Koa Bûntiat chèngsi̍t, koh kóng Koeh Tâibêng chòekīn iáu ū phah tiānōe hō͘ i, tānsī i chi̍tē khòaⁿ sī Koeh Tâibêng, i tio̍hkiaⁿ kah m̄ káⁿ chiap tiānōe. Ùi chittiám lán chaiiáⁿ, Koeh Tâibêng siūⁿ beh kah Koa Bûntiat ha̍pchok, m̄ sī kiò Koa Bûntiat "bô tiâukiāⁿ tâuhâng", sī chháichhú " Pēngkò͘ " Bînchiòngtóng ê hongsek, ìsù sī kóng Koa Bûntiat ētàng the̍h tio̍h chi̍t tōa pé kho͘ kho͘. Koeh Tâibêng sǹg sī ū sêngì.

　　 Chiàu Tiongkok Kokbîntóng kakī sóng ê sǹgpôaⁿ ánne phah, kàu bo̍kchêng ûichí chiànkó tēit miâ ê Koa Bûntiat, tio̍h hiòng chiànkó tēsaⁿ miâ ê Hâu Iúgî "bô tiâukiāⁿ tâuhâng". Tiongkok Kokbîntóng gōngōe kóng bē soah!

　　Khah kîkoài·ê sī, hoānnā tú tio̍h bô boánì ê tāichì, á·sī thiaⁿtio̍h bô ha̍hì ê ōe tio̍h ē sûisî thiàu khílâi mē lâng ê Koa Bûntiat, chit piàn Tiongkok Kokbîntóng kā i ánne sé bīn, kiò I "bô tiâukiāⁿ tâuhâng", Koa Bûntiat kèngjiân tiām chiⁿchiⁿ. Chit tiám ū siókhóa kîkoài. 　(230714)


Pe̍h-ōe-jī-pán/白話字版


《 Le̍k-sek toán-phêng 》　 Lí Lâm-hêng

　　　 Tiong-kok Kok-bîn-tóng gōng ōe kóng bē soah!

Tiong-kok Kok-bîn-tóng chóng-thóng chham-soán-jîn Hâu Iú-gî chòe-kīn ê bîn-tiāu bô khí-sek, chhit-goe̍h chhe-peh, khiok thoân-chhut Tiong-kok Kok-bîn-tóng àn-sǹg Koeh Tâi-bêng chi loān káu-goe̍h tiong ē soah, kàu-sî Koeh Tâi-bêng nā kui tūi, Hâu Iú-gî ê bîn-tiāu tio̍h ē tò-tńg-lâi kàu tē-jī, tio̍h ē khai-sí kah Koa Bûn-tiat tâm ha̍p-chok, chìn-hêng hui Le̍k tōa chéng-ha̍p, jî-chhiáⁿ bô pâi-thek "Hāu Koa phòe". Tiong-kok Kok-bîn-tóng ko-chàn ùi-thâu kàu-bóe ê thāi-tō͘, tio̍h sī beh ài Bîn-chiòng-tóng chóng-thóng chham-soán-jîn Koa Bûn-tiat "bô tiâu-kiāⁿ tâu-hâng", Tiong-kok Kok-bîn-tóng bô-khó-lêng chiap-siū "Koa Hâu phòe".

Chhit-goe̍h chhe-peh ē-po͘, Koa Bûn-tiat chhut-se̍k i-liâu seng-ki sán-gia̍p kìⁿ-bīn-hōe koh ū hoat-piáu ián-káng. Kì-chiá kā Koa Bûn-tiat kóng, Tiong-kok Kok-bîn-tóng kóng beh ài I "bô tiâu-kiāⁿ tâu-hâng". Koa Bûn-tiat thiaⁿ-·chi̍t-ē soah gāng-·khì, ba̍k-chiu tián tōa-tōa lúi tò mn̄g kóng,"bô tiâu-kiāⁿ tâu-hâng?" ná-chhiūⁿ siong-tong tio̍h-kiaⁿ. Kì-chiá mn̄g kóng, lí káⁿ ē tâu-hâng? Koa Bûn-tiat soah ha-ha tōa-chhiò kóng,"Ná ē án-ne mn̄g? ‧‧ kui-khì ‧‧mài kóng chhiò." chiah ko͘h chhiò-chhiò-á kóng, ē hoat line tap-hok kì-chiá.

Mài kóng Koa Bûn-tiat pún-lâng thiaⁿ-tio̍h "bô tiâu-kiāⁿ tâu-hâng" ē gāng-·khì, lán bô sū lâng thiaⁿ-tio̍h mā kám-kak thiⁿ o͘ chi̍t pêng. Lán seng lâi liáu-kái siáⁿ-mi̍h kiò choh "bô tiâu-kiāⁿ tâu-hâng". Sio-chiàn siang-hong, chiàn-su ê hit pêng ūi-tio̍h hi-bāng kiat-sok chiàn-cheng, ē thê-chhut "bô tiâu-kiāⁿ tâu-hâng", ín-chún chiàn iâⁿ hit pêng sûi chāi án-chóaⁿ chhú-lí, beh chian beh chú beh án-chóaⁿ koán-lí khòng-chè in-ê chèng-tī kah siā-hōe, lóng bô ì-kiàn. Tān-sī, nā-sī khah iâⁿ hit pêng iau-kiû tùi-hong "bô tiâu-kiāⁿ tâu-hâng", ū khó-lêng ē ín-khí khah su hit pêng bē sóng kah hoân-ló, tì-sú chiàn-cheng bô hoat-tō͘ kín kiat-sok, tian-tò kā chiàn-cheng thoa tn̂g.

　　 Nā chiàu chhit-goe̍h chhe-chhit《Hōe-lâu sin-bûn bāng 》kong-pò͘ siōng sin 7 goe̍h-hūn chóng-thóng tōa-soán bîn-tiāu, tiâu-cha kiat-kó hián-sī, ha̍p-pèng chhī-lāi tiān-ōe kah chhiú-ki-á ê tōa-iūⁿ-pún tiāu-chhâ tiong, Bîn-chiòng-tóng Koa Bûn-tiat chi-chhî tō͘ í 30.8% tit tē-it miâ, sió-khóa niá-seng chi-chhî tō͘ 29.3% ê Bîn-chìn-tóng Lōa Chheng-tek, siang-hong chhe-kū 1.5%, Tiong-kok Kok-bîn-tóng Hâu Iú-gî phoa̍h phòa nn̄g siâⁿ, chi-chhî tō͘ kan-ta 18.5% siōng-bóe-á miâ.

Hông-hái chi̍p-thoân chhòng-pān-jîn Koeh Tâi-bêng chêng chi̍t-chām thoân-chhut kóng, iú-ì "Pēng-kò͘ " Bîn-chiòng-tóng. Chhit-goe̍h chhe-cha̍p Bîn-chiòng-tóng chú-se̍k, chóng-thóng chham-soán-jîn Koa Bûn-tiat chèng-si̍t, koh kóng Koeh Tâi-bêng chòe-kīn iáu ū phah tiān-ōe hō͘ i, tān-sī i chi̍t-ē khòaⁿ sī Koeh Tâi-bêng, i tio̍h-kiaⁿ kah m̄ káⁿ chiap tiān-ōe. Ùi chit-tiám lán chai-iáⁿ, Koeh Tâi-bêng siūⁿ beh kah Koa Bûn-tiat ha̍p-chok, m̄ sī kiò Koa Bûn-tiat "bô tiâu-kiāⁿ tâu-hâng", sī chhái-chhú " Pēng-kò͘ " Bîn-chiòng-tóng ê hong-sek, ì-sù sī kóng Koa Bûn-tiat ē-tàng the̍h tio̍h chi̍t tōa pé kho͘ -kho͘. Koeh Tâi-bêng sǹg sī ū sêng-ì.

　　 Chiàu Tiong-kok Kok-bîn-tóng ka-kī sóng ê sǹg-pôaⁿ án-ne phah, kàu bo̍k-chêng ûi-chí chiàn-kó tē-it miâ ê Koa Bûn-tiat, tio̍h hiòng chiàn-kó tē-saⁿ miâ ê Hâu Iú-gî "bô tiâu-kiāⁿ tâu-hâng". Tiong-kok Kok-bîn-tóng gōng-ōe kóng bē soah!

　　Khah kî-koài-·ê sī, hoān-nā tú tio̍h bô boán-ì ê tāi-chì, á-·sī thiaⁿ-tio̍h bô ha̍h-ì ê ōe tio̍h ē sûi-sî thiàu khí-lâi mē lâng ê Koa Bûn-tiat, chit piàn Tiong-kok Kok-bîn-tóng kā i án-ne sé bīn, kiò I "bô tiâu-kiāⁿ tâu-hâng", Koa Bûn-tiat kèng-jiân tiām chiⁿ-chiⁿ. Chit tiám ū sió-khóa kî-koài. 　(230714)




中國國民黨總統參選人侯友宜最近ê民調無起色，七月初八，卻傳出中國國民黨預計郭台銘之亂九月中ēsoah，到時郭台銘若歸隊，侯友宜ê民調tio̍hē回轉來到第二，tio̍hē開始kah柯文哲談合作，進行非綠大整合，而且無排斥「侯柯配」。中國國民黨高層ùi頭到尾ê態度，tio̍h是beh愛民眾黨總統參選人柯文哲「無條件投降」，中國國民黨無可能接受「柯侯配」。

七月初八下晡，柯文哲出席醫療生技產業見面會koh有發表演講。記者kā柯文哲講，中國國民黨講beh愛伊「無條件投降」。柯文哲聽一下soah gāng去，目睭展大大蕊倒問講：「無條件投降？」ná-chhiūⁿ相當tio̍h驚。記者問講：你敢ē投降？柯文哲soah哈哈大笑講：「Ná ē án-ne問？‧‧歸氣‧‧mài講笑。」才ko͘h笑笑á講，ē發line答覆記者。

Mài講柯文哲本人聽tio̍h「無條件投降」ē gāng去，咱無事人聽tio̍h mā感覺天烏一旁。咱先來瞭解啥物叫作「無條件投降」。相戰雙方，戰輸ê hit pêng為tio̍h希望結朿戰爭，ē提出「無條件投降」，允准戰嬴hit pêng隨在按怎處理，beh煎beh煮beh按怎管理控制in-ê政治kah社會，lóng無意見。但是，若是khah嬴hit pêng要求對方「無條件投降」，有可能ē引起khah輸hit旁bē爽kah煩惱，致使戰爭無法度緊結束，顛倒kā戰爭拖長。

　　若照七月初七《匯流新聞網》公布上新7月份總統大選民調，調查結果顯示，合併市內電話kah手機á ê大樣本調查中，民眾黨柯文哲支持度以30.8%得第一名，小可領先支持度29.3% ê民進黨賴清德，雙方差距1.5%，中國國民黨侯友宜phoa̍h破兩成，支持度kan-ta18.5%上尾á名。

鴻海集團創辦人郭台銘前一站傳出講，有意「併購」民眾黨。七月初十民眾黨主席、總統參選人柯文哲證實，koh講郭台銘最近猶有拍打電話hō͘伊，但是伊一下看是郭台銘，伊tio̍h驚kah m̄敢接電話。Ùi chit點咱知影，郭台銘想beh kah柯文哲合作，m̄是叫柯文哲「無條件投降」，是採取「併購」民眾黨ê方式，意思是講柯文哲ē-tàng the̍h tio̍h一大把箍箍。郭台銘算是有誠意。

　　照中國國民黨家己爽ê算盤án-ne拍，到目前為止戰果第一名ê柯文哲，tio̍h向戰果第三名ê侯友宜「無條件投降」。中國國民黨gōng話講bēsoah！

　　Khah奇怪-·ê是，凡若抵tio̍h無滿意ê代誌，抑是聽tio̍h無合意ê話tio̍hē隨時跳起來罵人ê柯文哲，chit遍中國國民黨kā伊án-ne洗面、叫伊「無條件投降」，柯文哲竟然恬chiⁿ-chiⁿ。Chit點有小khóa奇怪。　(230714)