《綠色短評》

 | | | 轉寄

Phô͘中國ê kha-chhng愛phô͘ tio̍h位！

作者 李南衡, ChoânTâijī/全台字 by Chng Hūiphêng 2023.07.16



Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　　 Lí Lâmhêng

　　　　　　　　Phô͘ Tiongkok ê khachhng ài phô͘ tio̍h ūi!

La̍kgoe̍h jīsaⁿ, Tiongkok Kokbîntóng chóngthóng chhamsoánjîn Hâu Iúgî khì Thôhn̂g chhamhiuⁿ, kóngtio̍h nn̄g hōaⁿ gītê ê sî piáusī i ē kèsio̍k ló͘le̍k, hō͘ nn̄g hōaⁿ chi kan ētàng chhinchhiūⁿ chi̍t ke lâng, hôhâi úntēng, bi̍tchhiat ê tùiōe kah kaulâu. Ēpo͘ mûithé mn̄g khí i nn̄g hōaⁿ lūnsu̍t "兩岸一家人", kah Bînchiòngtóng chóngthóng chhamsoánjîn Koa Bûntiat ê "兩岸一家親" ū siáⁿ bô kâng? Hâu Iúgî ti̍tchiap phoe kóng, Koa Bûntiat ê nn̄g hōaⁿ chèngchhek piànlâi piànkhì, kóng ê ōe tiantian tótó. Chhò·liáu! Koa Bûntiat ùithâu kàubóe tio̍h sī chi̍t kù ōe "兩岸一家親".

Thiaⁿ Hâu Iúgî ánne kóng, lán tio̍h chaiiáⁿ i ēng chit kù ōe beh phô͘ Tiongkok ê khachhng, chha Koa Bûntiat chi̍tbān peh chhianlí! ū sinbûn mûithé kóng,"兩岸一家親" m̄ sī Koa Bûntiat thâu chi̍tê kóng·ê. Tongjiân! nāsī Koa Bûntiat thâu chi̍tê kóng "兩岸一家親", kah Hâu Iúgî kóng"兩岸一家人" kāngkhoán, ná chhiūⁿ pàng phùi chi̍tsiaⁿ, bô lâng ē chhap i. Tiōngiàu·ê sī "兩岸一家親" siáⁿ lâng seng kóng·ê? 習近平.

　　 Lán chaiiáⁿ, 2013 nî cha̍pgoe̍h chhela̍k, Tiongkok kokka chúse̍k習近平 tī Ìnnî Bâlîtó chhamka Athài kengchè ha̍pchok hōegī (APEC) tē 21 kài hōegī, koh hōekiàn Siau Bāntiâng ê sî, tēit piàn chèngsek thêchhut "兩岸一家親"ê kónghoat. 習近平 kóng,"nn̄g hōaⁿ sianghong engkai kianchhî kiâⁿ nn̄g hōaⁿ koanhē hôpêng hoattián ê chèngkhak tōlō͘, soantō “兩岸一家親” ê líliām, kakiông kauliû ha̍pchok, kiōngtông chhiokchìn Tionghôa Bîncho̍k úitāi ho̍kheng. "2014 nî jīgoe̍h cha̍ppeh, 習近平 tī Pakkiaⁿ hōekiàn Tiongkok Kokbîntóng êngū chúse̍k Liân Chiàn ê sî, hoatpiáu liáu "kiōng îⁿ Tionghôa Bîncho̍k úitāi ho̍kheng ê Tiongkok bāng" ê tiōngiàu kóngōe, 習近平 kiôngtiāu,"hibāng nn̄g hōaⁿ sianghong péngchhî “兩岸一家親” ê líliām, sūnsè jîūi, chêsim hia̍ple̍k, chhuitōng nn̄g hōaⁿ koanhē hôpêng hoattián chhútit koh khah hó ê sêngkó, chōhok nn̄g hōaⁿ bînchiòng, kiōng îⁿ Tionghôa Bîncho̍k úitāi ho̍kheng ê Tiongkok bāng."che sī 習近平 tī sin hêngsè hē bīntùi nn̄g hōaⁿ koanhē hoattián só͘ choh ê tiōngiàu koh choânbīn ê lūnsu̍t.

Kiⁿî chiaⁿgoe̍h chhejī, Tiongkok kokka chúsek 習近平 hoatpiáu 2023 siⁿî tùi Tâioân hōsû, kah kūnî goântàn kiôngtiāu ê "itkoklióngchè" bô kâng, kiⁿî kantaⁿ thêkhí" 海峽兩岸一家親". Suijiân náchhiūⁿ ū khah hôoān, tānsī Τiongkiōng kunki kunkàm chiàusiông lâi "chhin", lâi jiáuloān Tâioân. Lán ùi chittiám mā ētàng khòaⁿchhut 習近平 púnlâng kah Tiongkok chènghú, jōanī khòaⁿtiōng chit kù "兩岸一家親"!

Tùi Tiongkok kio̍ksè "hóphīⁿsai" ê Koa Bûntiat chiok bô kántan, 2014 nî cha̍pitgoe̍h jīkáu tòngsoán Tâipakchhītiúⁿ, hoantńgnî (2015) pehgoe̍h cha̍pchhit khì Siōnghái chhamka "siang siâⁿ lūn tôaⁿ", tī hia thâuchi̍t piàn kóngchhut "兩岸一家親". I náchhiūⁿ cháchá tio̍h phīⁿ chhut 習近平 ū chi̍t kang ē choh hôngtè, Koa Bûntiat kín tī Siōnghái soantho̍k "sèngchí". Tī Koa Bûntiat soantho̍k "sèngchí" chìnchêng, i tongjiân mā chaiiáⁿ lán Hoatbūpō͘ Tiâuchakiok chiamtùi "兩岸一家親" ū choh kòe thóngchiàn tiâucha pòkò. Koa Bûntiat ê tiōngtiám sī tī Tâioân itti̍t soantho̍k 習近平 ê sèngchí "兩岸一家親", só͘í chiah ē tit Tiongkok sioh, chiahni̍h tit Tiongkok sioh ê chèngkheh tī Tâioân chhōe bô tējīê, bo̍kkoài Tiongkok hit hongbīn itti̍t beh ài Koa Bûntiat soán chóngthóng.

Ánne lán tio̍h chai, phô͘ Tiongkok ê khachhng ài phô͘ tio̍h ūi! (230707)

Chù, 兩岸一家人　兩岸一家親　習近平　海峽兩岸一家親 chhiáⁿ liām Hôagí


Pe̍h-ōe-jī-pán/白話字版


《 Le̍k-sek toán-phêng 》　　 Lí Lâm-hêng

　　　　　　　　Phô͘ Tiong-kok ê kha-chhng ài phô͘ tio̍h ūi!

La̍k-goe̍h jī-saⁿ, Tiong-kok Kok-bîn-tóng chóng-thóng chham-soán-jîn Hâu Iú-gî khì Thô-hn̂g chham-hiuⁿ, kóng-tio̍h nn̄g hōaⁿ gī-tê ê sî piáu-sī i ē kè-sio̍k ló͘-le̍k, hō͘ nn̄g hōaⁿ chi kan ē-tàng chhin-chhiūⁿ chi̍t ke lâng, hô-hâi ún-tēng, bi̍t-chhiat ê tùi-ōe kah kau-lâu. Ē-po͘ mûi-thé mn̄g khí i nn̄g hōaⁿ lūn-su̍t "兩岸一家人", kah Bîn-chiòng-tóng chóng-thóng chham-soán-jîn Koa Bûn-tiat ê "兩岸一家親" ū siáⁿ bô kâng? Hâu Iú-gî ti̍t-chiap phoe kóng, Koa Bûn-tiat ê nn̄g hōaⁿ chèng-chhek piàn-lâi piàn-khì, kóng ê ōe tian-tian tó-tó. Chhò-·liáu! Koa Bûn-tiat ùi-thâu kàu-bóe tio̍h sī chi̍t kù ōe "兩岸一家親".

Thiaⁿ Hâu Iú-gî án-ne kóng, lán tio̍h chai-iáⁿ i ēng chit kù ōe beh phô͘ Tiong-kok ê kha-chhng, chha Koa Bûn-tiat chi̍t-bān peh chhian-lí! ū sin-bûn mûi-thé kóng,"兩岸一家親" m̄ sī Koa Bûn-tiat thâu chi̍t-ê kóng-·ê. Tong-jiân! nā-sī Koa Bûn-tiat thâu chi̍t-ê kóng "兩岸一家親", kah Hâu Iú-gî kóng"兩岸一家人" kāng-khoán, ná chhiūⁿ pàng phùi chi̍t-siaⁿ, bô lâng ē chhap i. Tiōng-iàu-·ê sī "兩岸一家親" siáⁿ lâng seng kóng-·ê? 習近平.

　　 Lán chai-iáⁿ, 2013 nî cha̍p-goe̍h chhe-la̍k, Tiong-kok kok-ka chú-se̍k習近平 tī Ìn-nî Bâ-lî-tó chham-ka A-thài keng-chè ha̍p-chok hōe-gī (APEC) tē 21 kài hōe-gī, koh hōe-kiàn Siau Bān-tiâng ê sî, tē-it piàn chèng-sek thê-chhut "兩岸一家親"ê kóng-hoat. 習近平 kóng,"nn̄g hōaⁿ siang-hong eng-kai kian-chhî kiâⁿ nn̄g hōaⁿ koan-hē hô-pêng hoat-tián ê chèng-khak tō-lō͘, soan-tō “兩岸一家親” ê lí-liām, ka-kiông kau-liû ha̍p-chok, kiōng-tông chhiok-chìn Tiong-hôa Bîn-cho̍k úi-tāi ho̍k-heng. "2014 nî jī-goe̍h cha̍p-peh, 習近平 tī Pak-kiaⁿ hōe-kiàn Tiong-kok Kok-bîn-tóng êng-ū chú-se̍k Liân Chiàn ê sî, hoat-piáu liáu "kiōng îⁿ Tiong-hôa Bîn-cho̍k úi-tāi ho̍k-heng ê Tiong-kok bāng" ê tiōng-iàu kóng-ōe, 習近平 kiông-tiāu,"hi-bāng nn̄g hōaⁿ siang-hong péng-chhî “兩岸一家親” ê lí-liām, sūn-sè jî-ūi, chê-sim hia̍p-le̍k, chhui-tōng nn̄g hōaⁿ koan-hē hô-pêng hoat-tián chhú-tit koh khah hó ê sêng-kó, chō-hok nn̄g hōaⁿ bîn-chiòng, kiōng îⁿ Tiong-hôa Bîn-cho̍k úi-tāi ho̍k-heng ê Tiong-kok bāng."che sī 習近平 tī sin hêng-sè hē bīn-tùi nn̄g hōaⁿ koan-hē hoat-tián só͘ choh ê tiōng-iàu koh choân-bīn ê lūn-su̍t.

Kin-nî chiaⁿ-goe̍h chhe-jī, Tiong-kok kok-ka chú-sek 習近平 hoat-piáu 2023 sin-nî tùi Tâi-oân hō-sû, kah kū-nî goân-tàn kiông-tiāu ê "it-kok-lióng-chè" bô kâng, kin-nî kan-taⁿ thê-khí" 海峽兩岸一家親". Sui-jiân ná-chhiūⁿ ū khah hô-oān, tān-sī Τiong-kiōng kun-ki kun-kàm chiàu-siông lâi "chhin", lâi jiáu-loān Tâi-oân. Lán ùi chit-tiám mā ē-tàng khòaⁿ-chhut 習近平 pún-lâng kah Tiong-kok chèng-hú, jōa-nī khòaⁿ-tiōng chit kù "兩岸一家親"!

Tùi Tiong-kok kio̍k-sè "hó-phīⁿ-sai" ê Koa Bûn-tiat chiok bô kán-tan, 2014 nî cha̍p-it-goe̍h jī-káu tòng-soán Tâi-pak-chhī-tiúⁿ, hoan-tńg-nî (2015) peh-goe̍h cha̍p-chhit khì Siōng-hái chham-ka "siang siâⁿ lūn tôaⁿ", tī hia thâu-chi̍t piàn kóng-chhut "兩岸一家親". I ná-chhiūⁿ chá-chá tio̍h phīⁿ chhut 習近平 ū chi̍t kang ē choh hông-tè, Koa Bûn-tiat kín tī Siōng-hái soan-tho̍k "sèng-chí". Tī Koa Bûn-tiat soan-tho̍k "sèng-chí" chìn-chêng, i tong-jiân mā chai-iáⁿ lán Hoat-bū-pō͘ Tiâu-cha-kiok chiam-tùi "兩岸一家親" ū choh kòe thóng-chiàn tiâu-cha pò-kò. Koa Bûn-tiat ê tiōng-tiám sī tī Tâi-oân it-ti̍t soan-tho̍k 習近平 ê sèng-chí "兩岸一家親", só͘-í chiah ē tit Tiong-kok sioh, chiah-ni̍h tit Tiong-kok sioh ê chèng-kheh tī Tâi-oân chhōe bô tē-jī-ê, bo̍k-koài Tiong-kok hit hong-bīn it-ti̍t beh ài Koa Bûn-tiat soán chóng-thóng.

Án-ne lán tio̍h chai, phô͘ Tiong-kok ê kha-chhng ài phô͘ tio̍h ūi! (230707)

Chù, 兩岸一家人　兩岸一家親　習近平　海峽兩岸一家親 chhiáⁿ liām Hôa-gí




六月二三，中國國民黨總統參選人侯友宜去桃園chham香，講tio̍h兩岸議題ê時表示伊ē繼續努力，hō͘兩岸之間ē-tàng親像一家人，和諧穩定，密切ê對話kah交流。下晡媒體問起伊兩岸論述「兩岸一家人」，kah民眾黨總統參選人柯文哲ê「兩岸一家親」有啥無仝？侯友宜直接批講，柯文哲ê兩岸政策變來變去，講ê話顛顛倒倒。錯了！柯文哲ùi頭到尾tio̍h是一句話「兩岸一家親」。

聽侯友宜án-ne講，咱tio̍h知影伊用chit句話beh phô͘中國ê尻川，差柯文哲一萬八千里！有新聞媒體講：「兩岸一家親」m̄是柯文哲頭一個講ê。當然！若是柯文哲頭一個講「兩岸一家親」，kah侯友宜講「兩岸一家人」仝款，ná像放屁一聲，無人ē插伊。重要ê是「兩岸一家親」啥人先講ê？習近平。

　　咱知影，2013年十月初六，中國國家主席習近平tī印尼巴厘島參加亞太經濟合作會議 (APEC) 第21届會議，Koh會見蕭萬長ê時，第一遍正式提出「兩岸一家親」ê講法。習近平講：「兩岸雙方應該堅持行兩岸關係和平發展ê正確道路，宣導『兩岸一家親』ê理念，加強交流合作，共同促進中華民族偉大復興。」2014年二月十八，習近平tī北京會見中國國民黨榮譽主席連戰ê時，發表了「共圓中華民族偉大復興ê中國夢」ê重要講話，習近平強調，「希望兩岸雙方秉持『兩岸一家親』ê理念，順勢而為，齊心協力，推動兩岸關係和平發展取得koh khah好ê成果，造福兩岸民眾，共圓中華民族偉大復興ê中國夢。」這是習近平tī新形勢下面對兩岸關係發展所作ê重要koh全面ê論述。

今年正月初二，中國國家主席習近平發表2023新年對台灣賀詞，kah舊年元旦強調ê「一國兩制」無仝，今年kan-taⁿ提起「海峽兩岸一家親」．雖然ná像有khah和緩，但是中共軍機軍艦照常來「親」、來擾亂台灣。咱ùi chit點māē-tàng看出習近平本人kah中國政府，jōa-nī看重chit句「兩岸一家親」！

對中國局勢「好鼻師」ê柯文哲足無簡單，2014年十一月二九當選台北市長，翻轉年（2015）八月十七去上海參加「雙城論壇」，tīhia頭一遍講出「兩岸一家親」。伊ná像早早tio̍h鼻出習近平有一工ē作皇帝，柯文哲緊tī上海宣讀「聖旨」。Tī柯文哲宣讀「聖旨」進前，伊當然mā知影咱法務部調查局針對「兩岸一家親」有作過統戰調查報告。柯文哲ê重點是tī台灣一直宣讀習近平ê聖旨「兩岸一家親」，所以才ē得中國惜，chiah-ni̍h得中國惜ê政客tī台灣chhōe無第二個，莫怪中國hit方面一直beh愛柯文哲選總統。

Án-ne咱tio̍h知：phô͘中國ê尻川愛phô͘ tio̍h位！ (230707)

註：兩岸一家人　　兩岸一家親　　習近平　　海峽兩岸一家親　請唸華語