《綠色短評》

 | | | 轉寄

郭台銘hām眠teh講gōng話！

作者 李南衡, ChoânTâijī/全台字 by Chng Hūiphêng 2023.07.30




Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng》 Lí Lâmhêng

　　　　　　　　Koeh Tâibêng hāmbîn teh kóng gōng ōe!

　　 Chhitgoe̍h cha̍pchhit, Hônghái chi̍pthoân chhòngpānjîn Koeh Tâibêng tâu su Bíkok 《Hôasēngtùn Iûpò 》 chíchhut, Tâioân kah Tiongkok chi kan, kòekhì tī "it tiong kok piáu " ê "kiújī kiōngsek" chihā, chinchē nî lâi tùi kok niáhe̍k gītê chìnhêng liáu ū sênghāu ê hia̍psiong, mā ta̍tsêng liáu ētàng ūnchok ê kauliû, tānsī tī 2016 nî Chhòa Engbûn tòngsoán chóngthóng liáuāu, Tiongkok í Chhòa Engbûn kīchoa̍t chiapsiū Pakkiaⁿ kā Tâioân khòaⁿ choh Tiongkok chi̍tpō͘hūn ê káisek choh líiû, chiongchí nn̄g hōaⁿ tùiōe, kàu taⁿ iáu bōe hôeho̍k. Koeh Tâibêng chíchhut, sūsi̍t siōng, hō͘ chipchèng ê Bînchìntóng khòaⁿ choh gántiong teng, the̍h tiāu chiah ē hoaⁿhí ê "kiújī kiōngsek", tī kòekhì 30 nî lāi íkeng chhiokchìn liáu nn̄g hōaⁿ chi kan kui pah bān piàn ê hō͘ hóng, tōa kuibô͘ tâuchu kah siang hiòng bō͘e̍k, kengchè chengtióng, múi lépài kúi pah panchhù ê ti̍thâng hângpan, hō͘ kíntiuⁿ kio̍ksè oānhô lo̍h·lâi, siūⁿ beh hòngkhì "it tiong kok pió" khengkè lâi kah Tiongkok tâmphòaⁿ, kiatkó kantaⁿ ē kakiông chiàncheng uihia̍p, hō͘ Tâioân tī kokchè siōng chìn chi̍tpō͘ hông ko͘li̍p, súnhāi Tâioân ê kengchè, inūi chiàncheng gûihiám kā tâuchu chiá hehkiaⁿ cháukhì, hō͘ choân sèkài lóng jīnûi Tâioân chin bô anchoân. Koeh Tâibêng piáusī, i tn̂gkî chútiuⁿ sûisî hôeho̍k Tâioân kah Tiongkok chi kan ê ti̍tchiap nn̄g hōaⁿ tâmphòaⁿ, che sī oânkái kíntiuⁿ kio̍ksè, ûihō͘ Tâioân bînchú, chūiû kah hoattī ê ûṳt tô͘kèng, chinchiàⁿ iúhāu ê tâmphòaⁿ, bô engkai hō͘ soánkí kah koânle̍k līek phòhoāi, chhì tô͘ beh līiōng BíTiong tùikhòng lâi tittio̍h hóchhù, choa̍ttùi sī sǹg bē ha̍p, koh khah bô khólêng chhútāi chinchiàⁿ iúhāu ê tâmphòaⁿ, tio̍h hiānsi̍t bīntùi énghióng Tâioân bīlâi siōngkài tōa ê insò͘ "Tiongkok", liânsòa tùiōe kah hia̍psiong. Koeh Tâibêng jīnûi, tī chit khoán ê khengkè ēbīn, Tâioân ū kàugia̍h ê khongkan chhionghun póhō͘ i ê bînchú, chūiû kah sengoa̍h hongsek, siōng tiōngiàu·ê sī, ánne ētàng chhōe tio̍h chi̍t tiâu ē kā sianghong ùi choa̍tpiah piⁿ giú tńglâi ê tōlō͘.

　　 Kòekhì 30 nî, nn̄g hōaⁿ koanhē náchhiūⁿ ū khah oânhô, tānsī m̄thang bē kìtit, kúi cha̍p nî lâi Tiongkok itchài kiôngtiāu, ē chīn siōngtōa ê ló͘le̍k chhōekiû hôpêng thóngit ê chiânkéng, tānsī choa̍ttùi bô iôngjím jīmhô hunlia̍t kokka ê Tâito̍k kiâⁿchò, choa̍ttùi bô chiapsiū tī kokchè siōng bú "nn̄gê Tiongkok" ahsī "it Tiong it Tâi". Tiongkok kataⁿ ū "it Tiong"."It Tiong kokpiáu ê kiújī kiōngsek", Tiongkok chū lâi m̄bat chiapsiū kòe, Bînchìntóng mā m̄bat chiapsiū kòe, hiānchāi kah chionglâi, mā bô hithō siáⁿmi̍h "it Tiong kok piáu ê kiújī kiōngsek". 2022 nî cha̍pgoe̍h cha̍pla̍k, Tiongkiōng chóngsukì 習近平 tī Jīcha̍ptōa khuibō͘sek hoatpiáu chèngtī pòkò ê sî piáusī, káikoat Tâioân būntê sī Tiongkok lâng kakī ê tāichì, tio̍h iû Tiongkok lâng lâi koattēng. Tiongkiōng kianchhî í siōng tōa sêngì, chīn siōng tōa ló͘le̍k chengchhú hôpêng thóngit ê chiânkéng, tānsī choa̍ttùi put sênglo̍k hòngkhì súiōng búle̍k. I kiôngtiāu,"chó͘ kok oânchoân thóngit ittēng beh si̍thiān, mā ittēng ē si̍thiān!" 習近平 ê tìlông ha̍kchiá Tēⁿ Éngnî kóng,"M̄ sī Tâioân beh thóngit ahsī m̄ ê būntê, si̍tchèsiōng sī siáⁿmi̍h sîchūn thóngit, ēng toh chi̍t chióng hongsek thóngit ê būntê."

　　Koeh Tâibêng kakī kóng 4 tang chêng thè tóng sī "nîkhin khùi sēng, chi̍tsî chhiongtōng", khòaⁿ i chòekīn ê tâusu lāṳông, kah nîkhin khùi sēng bô koanhē, náchhiūⁿ sī chi̍tê lâng hāmbîn teh kóng gōng ōe. 　　(230721)

Chù, 習近平chhiáⁿ liām Hôagí


Pe̍h-ōe-jī-pán/白話字版


《 Le̍k-sek toán-phêng》 Lí Lâm-hêng

　　　　　　　　Koeh Tâi-bêng hām-bîn teh kóng gōng ōe!

　　 Chhit-goe̍h cha̍p-chhit, Hông-hái chi̍p-thoân chhòng-pān-jîn Koeh Tâi-bêng tâu su Bí-kok 《Hôa-sēng-tùn Iû-pò 》 chí-chhut, Tâi-oân kah Tiong-kok chi kan, kòe-khì tī "it tiong kok piáu " ê "kiú-jī kiōng-sek" chi-hā, chin-chē nî lâi tùi kok niá-he̍k gī-tê chìn-hêng liáu ū sêng-hāu ê hia̍p-siong, mā ta̍t-sêng liáu ē-tàng ūn-chok ê kau-liû, tān-sī tī 2016 nî Chhòa Eng-bûn tòng-soán chóng-thóng liáu-āu, Tiong-kok í Chhòa Eng-bûn kī-choa̍t chiap-siū Pak-kiaⁿ kā Tâi-oân khòaⁿ choh Tiong-kok chi̍t-pō͘-hūn ê kái-sek choh lí-iû, chiong-chí nn̄g hōaⁿ tùi-ōe, kàu taⁿ iáu bōe hôe-ho̍k. Koeh Tâi-bêng chí-chhut, sū-si̍t siōng, hō͘ chip-chèng ê Bîn-chìn-tóng khòaⁿ choh gán-tiong teng, the̍h tiāu chiah ē hoaⁿ-hí ê "kiú-jī kiōng-sek", tī kòe-khì 30 nî lāi í-keng chhiok-chìn liáu nn̄g hōaⁿ chi kan kui pah bān piàn ê hō͘ -hóng, tōa kui-bô͘ tâu-chu kah siang hiòng bō͘-e̍k, keng-chè cheng-tióng, múi lé-pài kúi pah pan-chhù ê ti̍t-hâng hâng-pan, hō͘ kín-tiuⁿ kio̍k-sè oān-hô lo̍h-·lâi, siūⁿ beh hòng-khì "it tiong kok pió" kheng-kè lâi kah Tiong-kok tâm-phòaⁿ, kiat-kó kan-taⁿ ē ka-kiông chiàn-cheng ui-hia̍p, hō͘ Tâi-oân tī kok-chè siōng chìn chi̍t-pō͘ hông ko͘-li̍p, sún-hāi Tâi-oân ê keng-chè, in-ūi chiàn-cheng gûi-hiám kā tâu-chu chiá heh-kiaⁿ cháu-khì, hō͘ choân sè-kài lóng jīn-ûi Tâi-oân chin bô an-choân. Koeh Tâi-bêng piáu-sī, i tn̂g-kî chú-tiuⁿ sûi-sî hôe-ho̍k Tâi-oân kah Tiong-kok chi kan ê ti̍t-chiap nn̄g hōaⁿ tâm-phòaⁿ, che sī oân-kái kín-tiuⁿ kio̍k-sè, ûi-hō͘ Tâi-oân bîn-chú, chū-iû kah hoat-tī ê ûi-it tô͘-kèng, chin-chiàⁿ iú-hāu ê tâm-phòaⁿ, bô eng-kai hō͘ soán-kí kah koân-le̍k lī-ek phò-hoāi, chhì tô͘ beh lī-iōng Bí-Tiong tùi-khòng lâi tit-tio̍h hó-chhù, choa̍t-tùi sī sǹg bē ha̍p, koh khah bô khó-lêng chhú-tāi chin-chiàⁿ iú-hāu ê tâm-phòaⁿ, tio̍h hiān-si̍t bīn-tùi éng-hióng Tâi-oân bī-lâi siōng-kài tōa ê in-sò͘ "Tiong-kok", liân-sòa tùi-ōe kah hia̍p-siong. Koeh Tâi-bêng jīn-ûi, tī chit khoán ê kheng-kè ē-bīn, Tâi-oân ū kàu-gia̍h ê khong-kan chhiong-hun pó-hō͘ i ê bîn-chú, chū-iû kah seng-oa̍h hong-sek, siōng tiōng-iàu-·ê sī, án-ne ē-tàng chhōe tio̍h chi̍t tiâu ē kā siang-hong ùi choa̍t-piah piⁿ giú tńg-lâi ê tō-lō͘.

　　 Kòe-khì 30 nî, nn̄g hōaⁿ koan-hē ná-chhiūⁿ ū khah oân-hô, tān-sī m̄-thang bē kì-tit, kúi cha̍p nî lâi Tiong-kok it-chài kiông-tiāu, ē chīn siōng-tōa ê ló͘-le̍k chhōe-kiû hô-pêng thóng-it ê chiân-kéng, tān-sī choa̍t-tùi bô iông-jím jīm-hô hun-lia̍t kok-ka ê Tâi-to̍k kiâⁿ-chò, choa̍t-tùi bô chiap-siū tī kok-chè siōng bú "nn̄g-ê Tiong-kok" ah-sī "it Tiong it Tâi". Tiong-kok ka-taⁿ ū "it Tiong"."It Tiong kok-piáu ê kiú-jī kiōng-sek", Tiong-kok chū lâi m̄-bat chiap-siū kòe, Bîn-chìn-tóng mā m̄-bat chiap-siū kòe, hiān-chāi kah chiong-lâi, mā bô hit-hō siáⁿ-mi̍h "it Tiong kok piáu ê kiú-jī kiōng-sek". 2022 nî cha̍p-goe̍h cha̍p-la̍k, Tiong-kiōng chóng-su-kì 習近平 tī Jī-cha̍p-tōa khui-bō͘-sek hoat-piáu chèng-tī pò-kò ê sî piáu-sī, kái-koat Tâi-oân būn-tê sī Tiong-kok lâng ka-kī ê tāi-chì, tio̍h iû Tiong-kok lâng lâi koat-tēng. Tiong-kiōng kian-chhî í siōng tōa sêng-ì, chīn siōng tōa ló͘-le̍k cheng-chhú hô-pêng thóng-it ê chiân-kéng, tān-sī choa̍t-tùi put sêng-lo̍k hòng-khì sú-iōng bú-le̍k. I kiông-tiāu,"chó͘ kok oân-choân thóng-it it-tēng beh si̍t-hiān, mā it-tēng ē si̍t-hiān!" 習近平 ê tì-lông ha̍k-chiá Tēⁿ Éng-nî kóng,"M̄ sī Tâi-oân beh thóng-it ah-sī m̄ ê būn-tê, si̍t-chè-siōng sī siáⁿ-mi̍h sî-chūn thóng-it, ēng toh chi̍t chióng hong-sek thóng-it ê būn-tê."

　　Koeh Tâi-bêng ka-kī kóng 4 tang chêng thè tóng sī "nî-khin khùi sēng, chi̍t-sî chhiong-tōng", khòaⁿ i chòe-kīn ê tâu-su lāi-iông, kah nî-khin khùi sēng bô koan-hē, ná-chhiūⁿ sī chi̍t-ê lâng hām-bîn teh kóng gōng ōe. 　　(230721)

Chù, 習近平chhiáⁿ liām Hôa-gí



　　七月十七，鴻海集團創辦人郭台銘投書美國《華盛頓郵報》指出，台灣kah中國之間，過去tī「一中各表」ê「九二共識」之下，真chē年來對各領域議題進行了有成效ê協商，mā達成了ē-tàng運作ê交流，但是tī 2016年蔡英文當選總統了後，中國以蔡英文拒絕接受北京kā台灣看作中國一部分ê解釋作理由，終止兩岸對話，到taⁿ猶未恢復。郭台銘指出，事實上，hō͘執政ê民進黨看作眼中釘，the̍h掉chiahē歡喜ê「九二共識」，tī過去30年內已經促進了兩岸之間歸百萬遍ê互訪、大規模投資kah雙向貿易、經濟增長、每禮拜幾百班次ê直航航班， hō͘緊張局勢緩和落來，想beh放棄「一中各表」框架來kah中國談判，結果kan-taⁿē加強戰爭威脅，hō͘台灣tī國際上進一步hông孤立，損害台灣ê經濟，因為戰爭危險kā投資者heh驚走去，hō͘全世界lóng認為台灣真無安全。郭台銘表示，伊長期主張隨時恢復台灣kah中國之間ê直接兩岸談判，che是緩解緊張局勢、維護台灣民主、自由kah法治ê唯一途徑，真正有效ê談判，無應該hō͘選舉kah權力利益破壞，試圖beh利用美中對抗來得tio̍h好處，絕對是算bē合，koh khah無可能取代真正有效ê談判，tio̍h現實面對影響台灣未來上kài大ê因素「中國」，持續對話kah協商。郭台銘認為，tī chit款ê框架下面，台灣有夠額ê空間充分保護伊ê民主、自由kah生活方式，上重要ê是，án-neē-tàng chhōe tio̍h一條ēkā雙方ùi絕壁邊giú轉來ê道路。

　　過去30年，兩岸關係ná像有khah緩和，但是m̄-thang bē記得，幾十年來中國一再強調，ē盡尚大ê努力尋求和平統一ê前景，但是絕對不容忍任何分裂國家ê台獨行徑，絕對無接受tī國際上舞「兩個中國」ah是「一中一台」。中國ka-taⁿ有「一中」。「一中各表ê九二共識」，中國自來m̄-bat接受過，民進黨mā m̄-bat接受過，現在kah將來，mā無hit號啥物「一中各表ê九二共識」。2022年十月十六，中共總書記習近平tī二十大開幕式發表政治報告ê時表示，解決台灣問題是中國人家己ê代誌，tio̍h由中國人來決定。中共堅持以尚大誠意、盡尚大努力爭取和平統一ê前景，但是絕對不承諾放棄使用武力。伊強調，「祖國完全統一一定beh實現，mā一定ē實現！」習近平ê智囊學者鄭永年講，「M̄是台灣beh統一ah是m̄ê問題，實際上是啥物時陣統一，用toh一種方式統一ê問題。」

　　郭台銘家己講4冬前退黨是「年輕氣盛、一時衝動」，看伊最近ê投書內容，kah年輕氣盛無關係，ná像是一個人hām眠teh講gōng話。　　(230721)

註：習近平　　請唸華語