《綠色短評》

 | | | 轉寄

孔子公講：危險ê所在m̄好去！

作者 李南衡, ChoânTâijī/全台字 by Chng Hūiphêng 2023.06.11



Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　 Lí Lâmhêng

　　　　 Κhóngchú kong kóng, gûihiám ê só͘chāi m̄hó khì!

Háigōa líiû chin chē Tâioân lâng ē soánte̍k khì Ji̍tpún, goânin sī "anchoân". Tīan ê anchoân, kauthong ê anchoân, chia̍hmi̍h ê anchoân, chióngchióng ê anchoân. Bôlūn lí beh khì tó chi̍t kok líiû, ittēng tio̍h ài ē kìtit Κhóngchú kong kóng ê ōe,"Gûi pang put ji̍p" ìsù sī kóng, gûihiám ê só͘chāi m̄hó khì. Siáⁿmi̍h só͘chāi gûihiám? ū chiàncheng pōloān bô antēng ê só͘chāi; ū tōa hongthai, khó͘ hōaⁿ, tōa tētāng, im tōachúi kok chióng thianchai thiⁿ piàn ê só͘chāi; lēnggōa sī ū bó͘chióng thoânjiámpēⁿ tōa liûhêng ê só͘chāi.

　　 Gō͘goe̍h cha̍pkáu, Tiongkok Koktâipān hoatgiânjîn Bé Hiáukng kóng, hiòng iúkoan chúkoán pō͘mn̂g liáukái, ùi kináji̍t khí, hoeho̍k líhêngsiā kengêng Tâioân kubîn lâi Tāilio̍k thoân líiû gia̍pbū. I kóng,"jia̍tsêng hoangêng Tâioân tôngpau lâi Tāilio̍k líiû koankong, iûlám tāihó hôsan. "Tùi chittiám, Kauthongpō͘ Koankong kio̍ktiúⁿ Tiuⁿ Siahchhong sûisî hôeèng kóng, lán hibāng sianghong tôngpō͘ khàihòng m̄ sī tanbīn, jîchhiáⁿ tio̍h thàukòe "Sió nn̄g hōe" hia̍psiong, khàihòng khansia̍p tio̍h tùiténg goânchek, iû Lio̍kúihōe chiàu chéngthé chêngsè insò͘ kiámthó pêngko͘, bo̍kchêng kìmchí líhênggia̍p chiá chiapthāi kah cho͘thoân chiânóng tùihōaⁿ ê "kìm thoân lēng" iáu bōe káitû. Lio̍kúihōe hoatgiânjîn Chiam Chìhông kiôngtiāu, inūi siūtio̍h e̍kchêng énghióng, choân sèkài koankong líiû chiāmthêng kúiá nî, Nn̄ghōaⁿ mā kāngkhoán, nā beh tiôngsin hoeho̍k, chin chē tāichì tio̍h tâm,"m̄ sī jīmhô chi̍t pêng soanpò͘ bînáchài lâi khàihòng, bô hiahni̍h kántan."

Iuchit Líiû Hia̍phōe lísūtiúⁿ Lí Kîga̍k khiā tī líiûgia̍p ê li̍ptiûⁿ jīnûi,"e̍kchêng chìnchêng ê 2019 nî, Tâioân lâng chi̍t nî chhutkéng chhaputto ū 1,700 bān lâng pái, ū sìpah gōa bān lâng pái sī khì Tiongkok Tāilio̍k, gia̍pchiá ê simthài lâi kóng, hibāng tī Nn̄ghōaⁿ kauliû téngbīn tio̍h ke chi̍tkóa kauliû, kiám chi̍tkóa chèngtī kanjiáu."

Lán kanta kóngtio̍h khólī anchoân, líiû nā bô anchoân, siáⁿmi̍h lóng biánkóng! Tio̍h sī Κhóngchú kong só͘ kóng ê, gûihiám ê só͘chāi m̄ hókhì.

　　2022 nî cha̍pjīgoe̍h jīchhit, Tiongkok soanpò͘ hônge̍k tōa kái hong, 2023 nî itgoe̍h chhepeh khàihòng piankéng koánchè. Tété chi̍t kò goe̍h lāi, ùi siōng kài giâmkeh ê tōngthài chheng lêng, kàu goântē tó pêⁿ, bô kohchài thongpò khakchín ê ànsò͘, mā kā "Sinkoàn hìiām" kái miâ choh "Sinkoàn kámjiám". Ánne" Sinkoàn hìiām"tio̍h ē tī Tiongkok bô khì sī boh? tongjiân sī bôkhólêng!

　　 Gō͘goe̍h jījī, Tiongkok Khoha̍kīⁿ īⁿsū Chiong Lâmsan tī "2023 Tōaoankhu khoha̍k lūntôaⁿ"piáusī, íkeng īchhek" Sinkoàn kámjiám" XBB piànīchu ē tī Tiongkok koh hoatsio, gō͘goe̍h té chiūⁿ koânhong kámjiám jînsò͘ múi lépài 4,000 bān lâng, la̍kgoe̍h té chi̍t lépài ē ta̍tkàu iok 6,500 bān lâng. Lán sǹg gō͘goe̍h té chi̍t lépài ke la̍kgoe̍h ê saⁿ lépài, pêngkin múi lépài 4,000 bān lâng, tio̍h ū 1 ek 6,000 bān lâng, la̍kgoe̍h té chi̍t lépài ke chhitgoe̍h chheit lépài, nn̄g lépài tio̍h ū 1 ek 3,000 bān lâng, tàu khílâi tio̍h ū 2 ek 9,000 bān lâng. Gō͘goe̍h té íchêng ê saⁿ lépài kah chhitgoe̍h chho͘ íāu ê saⁿ lépài lóng bô sǹg, tioh ū chiahchē lâng khakchín ê kokka káⁿ bô sǹg sī gûihiám ê só͘chāi? ūitio̍h Tâioân lâng ê anchoân, lán bô engkai cho͘thoân a̍h sī kòjîn khì Tiongkok líiû, tôngsî mā bô engkai khàihòng Tiongkok líhêng thoân a̍h sī kòjîn lâi Tâioân líiû. (230602)


Pe̍h-ōe-jī-pán/白話字版


《 Le̍k-sek toán-phêng 》　 Lí Lâm-hêng

　　　　 Κhóng-chú kong kóng, gûi-hiám ê só͘-chāi m̄-hó khì!

Hái-gōa lí-iû chin chē Tâi-oân lâng ē soán-te̍k khì Ji̍t-pún, goân-in sī "an-choân". Tī-an ê an-choân, kau-thong ê an-choân, chia̍h-mi̍h ê an-choân, chióng-chióng ê an-choân. Bô-lūn lí beh khì tó chi̍t kok lí-iû, it-tēng tio̍h ài ē kì-tit Κhóng-chú kong kóng ê ōe,"Gûi pang put ji̍p" ì-sù sī kóng, gûi-hiám ê só͘-chāi m̄-hó khì. Siáⁿ-mi̍h só͘-chāi gûi-hiám? ū chiàn-cheng pō-loān bô an-tēng ê só͘-chāi; ū tōa hong-thai, khó͘ -hōaⁿ, tōa tē-tāng, im tōa-chúi kok chióng thian-chai thiⁿ piàn ê só͘-chāi; lēng-gōa sī ū bó͘-chióng thoân-jiám-pēⁿ tōa liû-hêng ê só͘-chāi.

　　 Gō͘-goe̍h cha̍p-káu, Tiong-kok Kok-tâi-pān hoat-giân-jîn Bé Hiáu-kng kóng, hiòng iú-koan chú-koán pō͘-mn̂g liáu-kái, ùi kin-á-ji̍t khí, hoe-ho̍k lí-hêng-siā keng-êng Tâi-oân ku-bîn lâi Tāi-lio̍k thoân lí-iû gia̍p-bū. I kóng,"jia̍t-sêng hoan-gêng Tâi-oân tông-pau lâi Tāi-lio̍k lí-iû koan-kong, iû-lám tāi-hó hô-san. "Tùi chit-tiám, Kau-thong-pō͘ Koan-kong kio̍k-tiúⁿ Tiuⁿ Siah-chhong sûi-sî hôe-èng kóng, lán hi-bāng siang-hong tông-pō͘ khài-hòng m̄ sī tan-bīn, jî-chhiáⁿ tio̍h thàu-kòe "Sió nn̄g hōe" hia̍p-siong, khài-hòng khan-sia̍p tio̍h tùi-téng goân-chek, iû Lio̍k-úi-hōe chiàu chéng-thé chêng-sè in-sò͘ kiám-thó pêng-ko͘, bo̍k-chêng kìm-chí lí-hêng-gia̍p chiá chiap-thāi kah cho͘-thoân chiân-óng tùi-hōaⁿ ê "kìm thoân lēng" iáu bōe kái-tû. Lio̍k-úi-hōe hoat-giân-jîn Chiam Chì-hông kiông-tiāu, in-ūi siū-tio̍h e̍k-chêng éng-hióng, choân sè-kài koan-kong lí-iû chiām-thêng kúi-á nî, Nn̄g-hōaⁿ mā kāng-khoán, nā beh tiông-sin hoe-ho̍k, chin chē tāi-chì tio̍h tâm,"m̄ sī jīm-hô chi̍t pêng soan-pò͘ bîn-á-chài lâi khài-hòng, bô hiah-ni̍h kán-tan."

Iu-chit Lí-iû Hia̍p-hōe lí-sū-tiúⁿ Lí Kî-ga̍k khiā tī lí-iû-gia̍p ê li̍p-tiûⁿ jīn-ûi,"e̍k-chêng chìn-chêng ê 2019 nî, Tâi-oân lâng chi̍t nî chhut-kéng chha-put-to ū 1,700 bān lâng pái, ū sì-pah gōa bān lâng pái sī khì Tiong-kok Tāi-lio̍k, gia̍p-chiá ê sim-thài lâi kóng, hi-bāng tī Nn̄g-hōaⁿ kau-liû téng-bīn tio̍h ke chi̍t-kóa kau-liû, kiám chi̍t-kóa chèng-tī kan-jiáu."

Lán kan-ta kóng-tio̍h khó-lī an-choân, lí-iû nā bô an-choân, siáⁿ-mi̍h lóng bián-kóng! Tio̍h sī Κhóng-chú kong só͘ kóng ê, gûi-hiám ê só͘-chāi m̄ hó-khì.

　　2022 nî cha̍p-jī-goe̍h jī-chhit, Tiong-kok soan-pò͘ hông-e̍k tōa kái hong, 2023 nî it-goe̍h chhe-peh khài-hòng pian-kéng koán-chè. Té-té chi̍t kò goe̍h lāi, ùi siōng kài giâm-keh ê tōng-thài chheng lêng, kàu goân-tē tó pêⁿ, bô koh-chài thong-pò khak-chín ê àn-sò͘, mā kā "Sin-koàn hì-iām" kái miâ choh "Sin-koàn kám-jiám". Án-ne" Sin-koàn hì-iām"tio̍h ē tī Tiong-kok bô khì sī boh? tong-jiân sī bô-khó-lêng!

　　 Gō͘-goe̍h jī-jī, Tiong-kok Kho-ha̍k-īⁿ īⁿ-sū Chiong Lâm-san tī "2023 Tōa-oan-khu kho-ha̍k lūn-tôaⁿ"piáu-sī, í-keng ī-chhek" Sin-koàn kám-jiám" XBB piàn-ī-chu ē tī Tiong-kok koh hoat-sio, gō͘-goe̍h té chiūⁿ koân-hong kám-jiám jîn-sò͘ múi lé-pài 4,000 bān lâng, la̍k-goe̍h té chi̍t lé-pài ē ta̍t-kàu iok 6,500 bān lâng. Lán sǹg gō͘-goe̍h té chi̍t lé-pài ke la̍k-goe̍h ê saⁿ lé-pài, pêng-kin múi lé-pài 4,000 bān lâng, tio̍h ū 1 ek 6,000 bān lâng, la̍k-goe̍h té chi̍t lé-pài ke chhit-goe̍h chhe-it lé-pài, nn̄g lé-pài tio̍h ū 1 ek 3,000 bān lâng, tàu khí-lâi tio̍h ū 2 ek 9,000 bān lâng. Gō͘-goe̍h té í-chêng ê saⁿ lé-pài kah chhit-goe̍h chho͘ í-āu ê saⁿ lé-pài lóng bô sǹg, tioh ū chiah-chē lâng khak-chín ê kok-ka káⁿ bô sǹg sī gûi-hiám ê só͘-chāi? ūi-tio̍h Tâi-oân lâng ê an-choân, lán bô eng-kai cho͘-thoân a̍h sī kò-jîn khì Tiong-kok lí-iû, tông-sî mā bô eng-kai khài-hòng Tiong-kok lí-hêng thoân a̍h sī kò-jîn lâi Tâi-oân lí-iû. (230602)




海外旅遊真chē台灣人ē選擇去日本，原因是「安全」。治安ê安全、交通ê安全、食物ê安全、種種ê安全。無論你beh去tó一國旅遊，一定tio̍h愛ē記得孔子公講ê話：「危邦不入」（gûi-pang putji̍p）意思是講，危險ê所在m̄好去。啥物所在危險？有戰爭暴亂無安定ê所在；有大風颱、苦旱、大地動、淹大水各種天災天變ê所在；另外是有某種傳染病大流行ê所在。

　　五月十九，中國國台辦發言人馬曉光講，向有關主管部門了解，ùi今á日起，恢復旅行社經營台灣居民來大陸團旅遊業務。伊講：「熱誠歡迎台灣同胞來大陸旅遊觀光，遊覽大好河山。」對chit點，交通部觀光局長張錫聰隨時回應講，咱希望雙向同步開放m̄是單面，而且tio̍h透過「小兩會」協商，開放牽涉tio̍h對等原則，由陸委會照整體情勢因素檢討評估，目前禁止旅行業者接待kah組團前往對岸ê「禁團令」猶未解除。陸委會發言人詹志宏強調，因為受tio̍h疫情影響，全世界觀光旅遊暫停幾á年，兩岸mā仝款，若beh重新恢復，真chē代誌tio̍h談，「m̄是任何一pêng宣布明á載來開放，無hiah-ni̍h簡單。」

優質旅遊協會理事長李奇嶽khiātī旅遊業ê立場認為，「疫情進前ê2019年，台灣人一年出境差不多有1,700萬人次，有四百外萬人次是去中國大陸，業者ê心態來講，希望tī兩岸交流頂面tio̍h加一寡交流，減一寡政治干擾。」

咱kan-ta講tio̍h考慮安全，旅遊若無安全，啥物lóng免講！Tio̍h是孔子公所講ê，危險ê所在m̄好去。

　　2022年十二月二七，中國宣布防疫大解封，2023年一月初八開放邊境管制。短短一個月內，ùi上kài嚴格ê動態清零，到原地倒平，無koh再通報確診個案數，mā kā「新冠肺炎」改名作「新冠感染」。Án-ne「新冠肺炎」tio̍hētī中國無去是boh？當然是無可能！

　　五月二二，中國科學院院士鍾南山tī「2023大灣區科學論壇」表示，已經預測「新冠感染」XBB變異株ētī中國koh發燒，五月底上高峰感染人數每禮拜4,000萬人，六月底一禮拜ē達到約6,500萬人。咱算五月底一禮拜加六月ê三禮拜，平均每禮拜4,000萬人，tio̍h有1億6,000萬人，六月底一禮拜加七月初一禮拜，兩禮拜tio̍h有1億3,000萬人，tàu起來tio̍h有2億9,000 萬人。五月底以前ê三禮拜kah七月初以後ê三禮拜lóng無算，tioh有chiahchē人確診ê國家敢無算是危險ê所在？為tio̍h台灣人ê安全，咱無應該組團a̍h是個人去中國旅遊，同時mā無應該開放中國旅行團a̍h是個人來台灣旅遊。 (230602)


註：大好（tāi-hó）